Tito 2 - Ang Biblia (1982)

Ang Pagpanudlo sang Putling Pagtolon-an

¹ Apang nahanungud sa imo, itudlo ang nagakaigo sa putling pagtolon-an.

² Laygayi ang mga magulang pa nga lalaki nga maghaganhagan, talahoron, but-anan, kag putli sa pagtoo, sa gugma, kag sa pagkalig-on.

³ Laygayi ang magulang pa nga mga babayi man nga magmatinahoron sa paggawi, indi mapatopatoon ukon naulipon sa alak; magtudlo sila sang maayo,

⁴ kag sa amo hanason ang pamatan-on nga mga babayi sa paghigugma sang ila mga bana kag mga anak

⁵ nga magbut-anan, putli, matinatapon sa balay, malolo, kag mapinasakupon sa ila mga bana, agud nga indi mapasipalahan ang polong sang Dios.

⁶ Subong man laygayi ang mga pamatan-on nga lalaki nga magpugong sang ila kaugalingon.

⁷ Sa tanan nga bagay magpakita ka imo nga huwaran sang maayong mga buhat, kag sa imo pagtolon-an ipakita ang pagkabunayag, pagkahalangdon,

⁸ kag putling halambalanon nga indi mabadlong, agud nga ang kasumpung mahuy-an, nga walay malain nga ikasiling nahanungud sa aton.

⁹ Laygayi ang mga ulipon nga magpasakup sa ila kaugalingon nga mga agalon kag magpahamuut sa tanan nga bagay; dili sila magmabinatoon,

¹⁰ ukon magpangawatkawat, kondi magpakita sing bug-os kag matuud nga pagkatutum, agud nga mapunihan nila ang pagtolon-an sang Dios nga aton Manluluwas sa tanan nga butang.

¹¹ Kay ang bugay sang Dios nagpahayag nga sa kaluwasan sang tanan nga tawo,

¹² nga nagatudlo sa aton nga magsikway sang pagkadidiosnon kag kalibutanon nga mga kailigbon, kag magkabuhi sang but-anan, matarung, kag diosnon nga mga kabuhi sa sining kalibutan,

¹³ nga nagahulat sang bulahan naton nga paglaum, ang pagpahayag sang himaya ni Jesu-Cristo nga aton daku nga Dios kag Manluluwas,

¹⁴ nga naghatag sang iya kaugalingon tungud sa aton sa pagtubus sa aton gikan sa tanan nga kalautan kag sa pagtinlo nga sa iya kaugalingon sang katawohan nga iya nga makugi sa maayong mga buhat.

¹⁵ Ining mga butang ibantala mo; maglaygay kag magsabdong sa bug-os nga pagbulut-an. Walay sin-o nga magtamay sa imo.