Tito 1 - Ang Biblia (1982)

Pag-abiabi

¹ Si Pablo, nga ulipon sang Dios kag pinadala ni Jesu-Cristo, sa pagpasanyog sang pagtoo sang mga pinili sang Dios kag sang ila pagkilala sang kamatooran nga sono sa pagkadiosnon,

² sa paglaum sa kabuhi nga walay katapusan nga ginsaad sang Dios, nga indi makabutig, sa wala pa ang mga katuigan nga nagligad

³ kag sa nagakaigo nga tion ginpahayag sa iya polong paagi sa pagwali nga gintugyan sa akon sono sa sogo sang Dios nga aton Manluluwas;

⁴ Sa kay Tito, nga akon matuud nga anak sa kalabilogan nga pagtoo: Ang bugay kag paghidait gikan sa Dios nga Amay kag kay Cristo Jesus nga aton Manluluwas.

Mga Kinahanglan sa mga Tigulang kag mga Manugtatap

⁵ Sa sining kabangdanan ginbilin ko ikaw sa Creta, agud nga makaayo mo ang may sayup, kag magtangdo ka sing mga tigulang sa tagsa ka banwa, sono sa gintulin ko sa imo,

⁶ mga tawo nga disalawayon, nga bana sang isa ka asawa, nga may kabataan nga nagatoo nga wala ginasumbung nga mapinatuyangon ukon balingag.

⁷ Kay ang manugtatap dapat magdisalawayon, subong nga tinugyanan sang Dios; indi sia bugalon ukon maakigon ukon palahobog ukon makiawayon ukon dalok sang daug,

⁸ kondi masinapopohon, mahigugmaon sang maayo, but-anan, matarung, balaan, kag mapinugungon;

⁹ dapat sia magpangalig-on sa polong nga matuud nga sono sa natudlo, agud nga makasarang sia sa pagpanglaygay sa maayo nga pagtolon-an kag pagpasanag man sa mga nagasumpung sini.

¹⁰ Kay may madamu nga balingag nga tawo, mga palahambal sang walay pulus kag mga madaya, labi na gid sila nga sa circuncision;

¹¹ sila pagpahipuson, sanglit ginatublag nila ang bug-os nga mga panimalay bangud sa pagtudlo tungud sa didungganon nga daug sang indi dapat itudlo nila.

¹² Ang isa sa ila, isa ka manalagna nga ila kaugalingon, nagsiling, “Ang mga taga-Creta butigon sing dalayon, mga sapat nga malaut, mga mahakug nga matamad.”

¹³ Ining panaksi matuud. Busa sabdonga sila sing matigdas, agud nga magmaayo sila sa pagtoo,

¹⁴ nga indi magmatinalupangdon sa patopato nga mga sugilanon nga Jinudio ukon sa mga sogo sang mga tawo nga nagasikway sang kamatooran.

¹⁵ Sa mga putli ang tanan nga butang putli, apang sa mga nadagtaan kag dimatinoohon walay bisan ano nga putli; ang ila mga hunahuna kag kaisipan gid ginapangdagtaan.

¹⁶ Nagatu-ad sila nga nagakilala sila sa Dios, apang sa ila mga buhat ginapanghiwala nila sia; sila mga kalangil-aran, dimasinolondon, ditakus sa bisan ano nga maayong buhat.