Panalambiton 5 - Ang Biblia (1982)

Pangamuyo nga Kalooyan

¹ Dumduma, O Ginoo, ang nag-abut sa amon; toloka, kag tan-awa ang amon kahuluy-an!

² Ang amon panublion ginsaylo sa mga tagaluwas, ang amon mga balay sa mga dumuloong.

³ Mga ilo kami, wala sing amay; ang amon mga iloy subong sang mga balo.

⁴ Paagi sa cuarta gin-inum namon ang amon tubig, ang amon kahoy ginabaligya sa amon.

⁵ Ang amon mga manuglagas yari sa amon mga liog; ginalapyo kami, wala kami sing pahuway.

⁶ Gintugyan namon ang kamut sa mga Egiptohanon, kag sa mga Asiriahanon, nga busgon sing kalan-on.

⁷ Nagpakasala ang amon mga ginikanan, kag wala na; kag gin-antus namon ang ila mga kalautan.

⁸ Ang mga alagad nagagahum sa amon; wala gid sing magaluwas sa amon sa ila kamut.

⁹ Nagakuha kami sang amon kalan-on sa katalagman sang amon kabuhi, bangud sa espada sang kamingawan.

¹⁰ Ang amon panit maitum kaangay sang pugon bangud sang nagadabdab nga kainit sang tiggulutum.

¹¹ Ginpanglugus nila ang mga babayi sa Sion, ang mga ulay sa kabanwaanan sang Juda.

¹² Sa ila mga kamut ginbitay ang mga principe; wala pagtahora ang mga nawung sang mga tigulang.

¹³ Ang mga pamatan-on nga lalaki nagdala sang galingan; kag ang kabataan nagadusmo sa idalum sang kahoy.

¹⁴ Ang mga tigulang wala na sa gawang, ang mga lalaki nga pamatan-on wala na sa ila lanton.

¹⁵ Nag-untat ang kalipay sang amon tagiposoon; ang amon sinaut nabaylo sa paglalaw.

¹⁶ Naholog ang purungpurung gikan sa amon olo! kailo kami, kay nakasala kami!

¹⁷ Tungud sini ang amon tagiposoon napunaw, tungud sini nga mga butang nagdulum ang amon mga mata,

¹⁸ tungud sa Bukid sang Sion nga mamingaw; ginalaktan ini sang mga ido nga talonon.

¹⁹ Ikaw, O Ginoo, nagapabilin sa gihapon; ang imo trono kutub sa kaliwatan tubtub sa kaliwatan.

²⁰ Ngaa bala nga nalipatan mo kami sa gihapon, kag ginabayaan mo kami sa malawig nga tion?

²¹ Pabalika kami sa imo, O Ginoo, kag mapabalik kami! Bag-oha ang amon mga adlaw subong sang dumaan!

²² Apang ginsikway mo bala kami sing bug-os? Nasingkal gid bala ikaw sa amon?