Panalambiton 3 - Ang Biblia (1982)

Paglaum sang Kaumpawan paagi sa Kalooy sang Dios

¹ Ako ang tawo nga nakakita sing kapipit-an paagi sa bilogon sang iya kasingkal;

² gintuytuyan niya ako kag ginpalakat sa kadudulman kag indi sa kapawa;

³ sa pagkamatuud batok sa akon ginaliso niya ang iya kamut sa liwat kag liwat sa bug-os nga adlaw.

⁴ Ang akon unud kag ang akon panit ginpatigulang niya, ginboong niya ang akon mga tul-an;

⁵ nagpatindug sia batok sa akon kag ginlibutan ako sing kapaitan lag kasaktan;

⁶ ginpapuyo niya ako sa madulum nga mga duug subong sang mga napatay sing dugay na.

⁷ Gindingdingan niya ako palibut agud nga indi ako makagowa; ginpabug-at niya ang akon mga talikala;

⁸ bisan magsinggit ako kag magpanawag sing tabang, gintakpan niya ang akon pangamuyo;

⁹ gindingdingan niya ang akon mga dalanon sing mga bato nga binasbasan, ginpatiko niya ang akon mga banas.

¹⁰ Sia subong sa akon sang oso nga nagapuut, subong sang leon sa natago nga mga duug;

¹¹ ginpatalang niya ang akon mga dalanon kag ginkusnit ako; ginpamingaw niya ako;

¹² ginbingat niya ang iya pana kag ginbutang ako nga iligoon sang baslay.

¹³ Ginpalapus niya sa akon mga tagimislon ang mga olongan sang iya baslayan;

¹⁴ nangin-ululigaon ako sa bug-os ko nga katawohan, kalantahon nila sa bug-os nga adlaw.

¹⁵ Ginpuno niya ako sing kapaitan, ginbusug niya ako sing ajenjo.

¹⁶ Ginbingaw niya ang akon mga ngipon sang magamay nga mga bato, gintampokan niya ako sing mga abo;

¹⁷ ginpahilayo mo ang akon kalag sa paghidait, nalimtan ko ang kauswagan;

¹⁸ kag nagsiling ako, “Nawala ang akon kusug, kag ang akon ginapaabut sa Ginoo.”

¹⁹ Dumduma ang akon kapipit-an kag ang akon pagkamakalolooy, ang ajenjo kag ang apdo!

²⁰ Ang akon kalag nagadumdum pa sa ila kag nagaantus sa sulud nakon.

²¹ Ini ginadumdum ko sa akon hunahuna, busa may paglaum ako:

²² Ini gikan sa malig-on nga paghigugma sang Ginoo nga wala kita pagpapasa, bangud nga ang iya mga kalooy wala nagauntat;

²³ bag-o sila agaaga; daku ang imo pagkatutum.

²⁴ “Ang Ginoo ang akon bahin,” nagasiling ang akon kalag, “busa magalaum ako sa iya.”

²⁵ Maayo ang Ginoo sa mga nagahulat sa iya, sa kalag nga nagapangita sa iya.

²⁶ Maayo nga ang tawo maglaum kag maghulat sing hipus sang kaluwasan sang Ginoo.

²⁷ Maayo sa tawo nga magdala sang gota sa iya pagkapamatan-on.

²⁸ Maglingkod sia sing isa lamang kag maghipus bangud nga ginpapas-an niya ini sa iya;

²⁹ ibutang niya ang iya baba sa yab-ok— basi pa nga may paglaum;

³⁰ itaya niya ang iya pisngi sa nagatampa sa iya, manginpuno sia sing kahuluy-an.

³¹ Kay ang Ginoo indi magsikway sing dayon,

³² kay, bisan nagapakalisud sia, apang may kalooy sia sono sa kadam-an sang iya malig-on nga paghigugma;

³³ kay wala sia nagapapiot sing kinabubut-on ukon nagapakalisud sang mga anak sang mga tawo.

³⁴ Sa paglinas sang tanan nga binilanggo sang duta,

³⁵ sa pagpatalang sang matarung sang tawo sa atubangan sang nawung sang Labing Mataas,

³⁶ sa pagpatalang sa tawo sa iya kasaba, ang Ginoo wala nagapakamaayo.

³⁷ Sin-o bala ang nagasiling kag ini nahanabu, kon ang Ginoo wala nagasogo sini?

³⁸ Wala bala nagagowa sa baba sang Labing Mataas ang malaut kag ang maayo?

³⁹ Ngaa bala ang tawo nga buhi nagayamo, ang tawo, tungud sa pagsilot sang iya mga sala?

⁴⁰ Usisaon naton kag tungkaron ang aton mga dalanon, kag magbalik sa Ginoo!

⁴¹ Bayawon naton ang aton tagiposoon upud sa aton mga kamut sa Dios sa mga langit:

⁴² “Naglalis kami kag nagbato, wala ka magpatawad.

⁴³ “Nagputus ka sang kaakig kag naglagas sa amon, nagpatay ka kag wala ka magkaawa;

⁴⁴ nagpanabon ka sing panganud sa bagay nga wala sing pangamuyo nga makalapus.

⁴⁵ Ginhimo mo kami nga sagbut kag higku sa tunga sang mga katawohan.

⁴⁶ “Ang tanan namon nga kaaway nagnganga sang ila baba batok sa amon;

⁴⁷ ang kahadluk kag ang boho nag-abut sa amon, ang kawagwagan kag ang kalaglagan;

⁴⁸ ang akon mga mata nagailig sing mga kasulgan sang tubig tungud sang kalaglagan sang babayi nga anak sang akon katawohan.

⁴⁹ “Ang akon mga mata nagaula kag wala nagauntat, sa wala gid sing pal-at,

⁵⁰ tubtub nga ang Ginoo kutub sa mga langit magtamud kag maglantaw;

⁵¹ ang akon mga mata nagatublag sang akon kalag bangud sang tanan nga babayi nga mga anak sang akon banwa.

⁵² “Ginlagas nila ako sing tama kaangay sang pispis sila nga akon mga kaaway sa wala sing kabangdanan;

⁵³ gin-utas nila ang akon kabuhi sa bilanggoan nga madulum kag naghaboy sing bato sa akon;

⁵⁴ ang mga tubig naglapaw sa akon olo; nagsiling ako, ‘Nautas na ako.’

⁵⁵ “Nagpanawag ako sa imo ngalan, O Ginoo, gikan sa naidalum gid nga bilanggoan nga madulum;

⁵⁶ nabatian mo ang akon tingug, ‘Indi paglipdi ang imo idulungug sa akon pagginhawa sa akon pagtuaw!’

⁵⁷ Nagpalapit ka sa adlaw nga nagpanawag ako sa imo; nagsiling ka, ‘Dili magkahadluk!’

⁵⁸ “O Ginoo, gin-apinan mo ang mga kasaba sang akon kalag, gintubus mo ang akon kabuhi.

⁵⁹ O Ginoo, nakita mo ang akon sayup; hukmi ang akon kasaba.

⁶⁰ Nakita mo ang bug-os nila nga pagtimalus, ang tanan nila nga pahito batok sa akon.

⁶¹ “Nabatian mo ang ila mga pagpakahuya, O Ginoo, ang tanan nila nga mga pahito batok sa akon.

⁶² Ang mga bibig sang mga nagtindug batok sa akon kag ang ila kalantahon nagabatok sa akon sa bug-os nga adlaw.

⁶³ Toloka ang ila paglingkod kag ang ila pagtindug; ako ang ila kalantahon.

⁶⁴ “Tumbasan mo sila, O Ginoo, sono sa binuhatan sang ila mga kamut.

⁶⁵ Hatagan mo sila sing katig-a sang tagiposoon; ang imo pagkamalaut manginsa ila.

⁶⁶ Lagson mo sila sa imo kaakig kag laglagon sila gikan sa idalum sang mga langit sang Ginoo.”