Numero 9 - Ang Biblia (1982)

Ang Paghiwat sang Pascua

¹ Kag ang Ginoo nagpamolong kay Moises sa kamingawan sang Sinai, sa nahauna nga bulan sang ikaduha nga tuig sa tapus naggowa sila sa duta sang Egipto, nga nagasiling,

² “Ang katawohan sang Israel maghiwat sang pascua sa iya tinangdo nga panag-on.

³ Hiwaton ini sa iya tinangdo nga panag-on, sa ikanapulo kag apat nga adlaw sini nga bulan, sa kahaponon; sono sa tanan niya nga mga palatukuran kag sono sa tanan niya nga mga pagsolondan hiwaton ninyo ini.”

⁴ Gani si Moises nagpamolong sa katawohan sang Israel nga maghiwat sila sang pascua.

⁵ Kag ginhiwat nila ang pascua sa nahauna nga bulan, sa ikanapulo kag apat nga adlaw sang bulan, sa kahaponon, sa kamingawan sang Sinai; sono sa tanan nga ginsogo sang Ginoo kay Moises, amo ang ginhimo sang katawohan sang Israel.

⁶ Kag may pila ka tawo nga dimatinlo bangud sang bangkay, sa bagay nga indi sila makahiwat sang pascua sa sadto nga adlaw; kag nagkadto sila sa atubangan ni Moises kag sa atubangan ni Aaron sa sadto nga adlaw;

⁷ kag yadto nga mga tawo nagsiling sa iya, “Kami dimatinlo bangud sang bangkay; busa ginasablagan bala kami agud nga indi kami makadolot sang halad sa Ginoo sa iya tinangdo nga panag-on sa tunga sang katawohan sang Israel?”

⁸ Kag si Moises nagsiling sa ila, “Hulat kamo, agud nga makabati ako sang isogo sang Ginoo nahanungud sa inyo.”

⁹ Ang Ginoo nagpamolong kay Moises,

¹⁰ “Ipamolong sa katawohan sang Israel, Kon bisan sin-o nga tawo sa inyo ukon sa inyo mga kaliwatan magdimatinlo bangud sang bangkay, ukon yadto sa panlakatan sa malayo, wala sing sapayan maghiwat sia sing pascua sa Ginoo.

¹¹ Sa bulan nga ikaduha sa ikanapulo kag apat nga adlaw sang bulan sa kahaponon hiwaton nila ini; kaonon nila ini nga may tinapay nga walay tapay kag may gamhon nga mapait.

¹² Dili gid nila pagbilinan ini tubtub sa aga, kag dili pagbalion ang tul-an niya; sono sa tanan nga palatukuran sang pascua hiwaton nila ini.

¹³ Apang ang tawo nga matinlo kag wala sa panlakatan, kag nagadumili sa paghiwat sang pascua, ina nga kalag utdon gikan sa iya katawohan, bangud nga wala sia magdolot sang halad sang Ginoo sa iya tinangdo nga panag-on; ina nga tawo magaantus sang iya sala.

¹⁴ Kag kon magpanlugayaw sa tunga ninyo ang isa ka dumuloong, kag maghiwat sang pascua sa Ginoo, sono sa palatukuran sang pascua kag sono sa pagsolondan sini, amo ini ang iya buhaton; mangin-isa lamang ang inyo palatukuran, sa manlulugayaw kag sa tumandok sang duta.”

Ang Panganud sa Ibabaw sang Kayangkayang

¹⁵ Sa adlaw nga napatindug ang kayangkayang, ginputus sang panganud ang kayangkayang, ang layanglayang sang pagpamatuud; kag sa kahaponon sa ibabaw sang kayangkayang ini nga daw dagway sang kalayo tubtub sa aga.

¹⁶ Amo ini sa gihapon; ang panganud nagaputus sini [sa adlawon], kag ang dagway sang kalayo sa gab-i.

¹⁷ Kag kon ang panganud maghayaw sa ibabaw sang Layanglayang, niyan sa tapus sina ang katawohan sang Israel naglakat; kag sa duug diin ang panganud nagdolog, didto ang katawohan sang Israel nagpahamtang sing dologan.

¹⁸ Sa sogo sang Ginoo ang katawohan sang Israel naglakat, kag sa sogo sang Ginoo sila nagpahamtang sing dologan; samtang nga ang panganud nagdolog sa ibabaw sang kayangkayang, nagpabilin sila sa dologan.

¹⁹ Bisan kon ang panganud magpabilin sa ibabaw sang kayangkayang sing madamu nga mga adlaw, ang katawohan sang Israel nagbantay sang tinulin sang Ginoo, kag wala maglakat.

²⁰ Kon kaisa ang panganud yara sa ibabaw sang kayangkayang sing pila ka adlaw, kag sono sa sogo sang Ginoo nagpabilin sila sa dologan; niyan sono sa sogo sang Ginoo naglakat sila.

²¹ Kag kon kaisa ang panganud yara kutub sa kahaponon tubtub sa aga; kag kon maghayaw ang panganud sa aga, naglakat sila, ukon kon ini magpadayon sa adlaw kag sa gab-i, kon maghayaw ang panganud, naglakat sila.

²² Bisan ini duha ka adlaw, ukon isa ka bulan, ukon isa ka tuig, nga ang panganud nagpabilin sa ibabaw sang kayangkayang, nga nagadolog sa ibabaw niya, ang katawohan sang Israel nagpabilin sa dologan kag wala maglakat; apang kon ini maghayaw naglakat sila.

²³ Sa sogo sang Ginoo nagdolog sila, kag sa sogo sang Ginoo naglakat sila; ginbantayan nila ang tinulin sang Ginoo, sa sogo sang Ginoo paagi kay Moises.