Miqueas 1 - Ang Biblia (1982)

Panalabiton tungud sa Samaria kag Jerusalem

¹ Ang polong sang Ginoo nga nag-abut kay Miqueas nga Morasnon, sa mga adlaw ni Jotam, ni Acas, kag ni Ezequias, mga hari sang Juda, nga iya nakita nahanungud sa Samaria kag sa Jerusalem.

² Pamati, kamo nga mga katawohan, tanan kamo; pamatii, O duta, kag tanan nga yara sa iya; kag ang Ginoong Dios magsaksi batok sa inyo, ang Ginoo kutub sa iya balaan nga templo.

³ Kay yari karon, ang Ginoo nagagowa sa iya duug, kag magapanaug kag magatapak sa mataas nga mga duug sang duta.

⁴ Kag ang kabukiran matunaw sa idalum niya kag ang mga nalupyakan magalitik, subong sang talo sa atubangan sang kalayo, subong sang mga tubig nga ginaula sa bakilid nga duug.

⁵ Kay amo ini tanan tungud sang paglalis ni Jacob kag tungud sa mga sala sang balay sang Israel. Ano bala ang paglalis ni Jacob? Indi bala ang Samaria? Kag ano bala ang mataas nga mga duug sang Juda? Indi bala ang Jerusalem?

⁶ Busa himoon ko ang Samaria subong sang tinumpok sang latagon, subong sang mga duug nga talamnan sing ulubasan; kag iula ko ang iya mga bato sa nalupyakan, kag ipadayag ko ang iya mga sadsaran.

⁷ Ang tanan niya nga tinigban nga mga larawan bukbukon, ang tanan niya nga hinakay sonogon sa kalayo, kag ang tanan niya nga diosdios pamingawon ko; kay sa hinakay sang makihilawason gintipon niya sila, kag sa hinakay sang makihilawason ibalik sila.

⁸ Tungud sini magapanalabiton ako kag magahaya; magalakat ako nga hublas kag hubo; magahaya ako subong sang mga chacal, kag magapanalabiton ako subong sang mga avestruz.

⁹ Kay ang iya mga pilas dimapaayo; kag nagalambut ini tubtub gid sa Juda, nagalambut ini tubtub sa gawang sang akon katawohan, tubtub sa Jerusalem.

¹⁰ Dili ini pag-isugid sa Gat, dili gid kamo maghibi; nagaligid ako sa yab-ok sa Bet-le-afra.

¹¹ Taliwan, O pumuluyo sang Safir, sa kahubo kag kahuya; ang pumuluyo sang Zaanan wala maggowa; ang paghaya sang Bet-ezel magakuha sa inyo sang iya sakdag.

¹² Kay ang pumuluyo sang Marot nagalangkag sang kaayohan, kay ang malaut nagapanaug gikan sa Ginoo tubtub sa gawang sang Jerusalem.

¹³ Itakud ang kangga sa kabayo nga madasig, O pumuluyo sang Laquis; sia amo ang kamunoan sang sala sa babayi nga anak sang Sion, kay sa imo nakita ang mga paglalis sang Israel.

¹⁴ Busa maghatag ka sing dolot sa pagtaliwan sa Moreset-gat; ang mga panimalay sang Aczib manginmalimbongon nga butang sa mga hari sang Israel.

¹⁵ Dalhon ko pa sa imo ang nagatag-iya sa imo, O pumuluyo sang Maresa; ang himaya sang Israel magalambut tubtub sa Adullam.

¹⁶ Magpabolog ka kag magpaalot sang imo bohok, tungud sa mga anak nga imo nahamut-an; palapara ang imo pagkabolog subong sang aguila, kay ginbihag sila gikan sa imo.