Mateo 28 - Ang Biblia (1982)

Ang Pagkabanhaw ni Jesus

¹ Karon sa tapus ang adlaw nga inugpahuway, sa pagpamanagbanag sang nahaunang adlaw sang semana, nagkadto si Maria Magdalena kag ang isa ka Maria sa pagtan-aw sang lulubngan.

² Kag yari karon, may daku nga linog; kay isa ka manugtunda sang Ginoo nagkunsad gikan sa langit kag nag-abut kag ginpaligid ang bato, kag naglingkod sa sini.

³ Ang iya dagway subong sang kilat, kag ang iya panapton maputi subong sang nieve.

⁴ Kag sa kahadluk sa iya nagkurug ang mga bantay kag nangin-subong sang patay nga mga tawo.

⁵ Apang ang manugtunda nagsiling sa mga babayi, “Dili kamo mahadluk; kay nakahibalo ako nga kamo nagapangita kay Jesus nga ginlansang sa cruz.

⁶ Wala sia diri; kay nabanhaw sia, subong sang ginsiling niya. Kari kamo, tan-awa ninyo ang duug nga ginhamyangan sang Ginoo.

⁷ Niyan lakat kamo sing dalidali kag sugiran ang iya mga gintoton-an nga nabanhaw sia, kag yari karon, nagauna sia sa inyo sa Galilea; didto makita ninyo sia. Yari karon, nasiling ko sa inyo.”

⁸ Gani naghalin sila sing dalidali sa lulubngan, nga may kahadluk kag daku nga kalipay, kag nagdalagan sa pagbalita sa iya mga gintoton-an.

⁹ Kag yari karon, si Jesus nagsugata sa ila kag nagsiling, “Paano kamo!” Kag sila nagpalapit kag naghakus sa iya mga tiil kag nagsimba sa iya.

¹⁰ Niyan si Jesus nagsiling sa ila, “Dili kamo mahadluk; kadto kamo kag sugiran ang akon mga utud nga magkadto sila sa Galilea, kag didto makita ako nila.”

Ang Panugid sang Bantay

¹¹ Sang nagapakadto sila, yari karon, ang iban sang mga bantay nag-abut sa banwa kag nagsugid sa puno nga mga sacerdote sang tanan nga butang nga nahanabu.

¹² Kag sang nagtilipon sila kaupud sang mga tigulang kag nakasapul, naghatag sila sing madamu nga cuarta sa mga soldado

¹³ kag nagsiling, “Isiling ninyo, ‘Ang iya mga gintoton-an nagkari sa kagab-ihon kag nagkawat sa iya sang katolog kami.’

¹⁴ Kag kon ini mabatian sang pangolo-puud, buyokon namon sia kag luwason kamo sa kaliligban.”

¹⁵ Gani ginbaton nila ang cuarta kag naghimo sono sa gintudlo sa ila; kag ini nga patopato ginpalapnag sang mga Judio tubtub karon nga adlaw.

Ang Dakung Panugyan

¹⁶ Karon ang napulog isa ka gintoton-an nagkadto sa Galilea, sa bukid nga gintangdo ni Jesus sa ila.

¹⁷ Kag sang nakita nila sia nagsimba sila sa iya; apang ang iban nagduhaduha.

¹⁸ Kag nagpalapit si Jesus kag nagpamolong sa ila, “Ang bug-os nga pagbulut-an sa langit kag sa duta natugyan sa akon.

¹⁹ Busa lakat kamo kag himoon nga mga gintoton-an ang tanan nga kapungsuran, nga nagabautiso sa ila sa ngalan sang Amay kag sang Anak kag sang Espiritu Santo,

²⁰ nga nagapanudlo sa ila sa pagtuman sang tanan nga ginsogo ko sa inyo; kag yari karon, ako kaupud ninyo sa gihapon, tubtub sa katapusan sang katuigan.”