Mateo 17 - Ang Biblia (1982)

Ang Pagbalhin sang Dagway

¹ Kag sa tapus sang anum ka adlaw gin-upud ni Jesus si Pedro kag si Santiago kag si Juan nga iya utud, kag gindala sila sing pahain sa bukid nga mataas.

² Kag nagbalhin ang iya dagway sa atubangan nila, kag nagsilaw ang iya nawung subong sang adlaw, kag ang iya mga panapton nagputi subong sang kapawa.

³ Kag yari karon, nagpahayag sa ila si Moises kag si Elias, nga nagapakighambal sa iya.

⁴ Kag si Pedro nagsiling kay Jesus, “Ginoo, maayo nga magpabilin kita diri; kon buut ka, mabuhat ako diri sing tatlo ka payag, isa sa imo kag isa kay Moises kag isa kay Elias.”

⁵ Sang nagapakighambal pa sia, yari karon, isa ka panganud nga masiga naglikop sa ila, kag may tingug gikan sa panganud nga nagsiling, “Ini hinigugma kong Anak, nga sa iya nahamuut ako; pamati kamo sa iya.”

⁶ Sang nakabati sini ang mga gintoton-an, naghapa sila, kag nahadluk sing tama.

⁷ Apang si Jesus nagpalapit kag nagtandug sa ila, kag nagsiling, “Tindug kamo, kag indi magkahadluk.”

⁸ Kag sang nagtangla sila sang ila mga mata, wala sila sing nakita bisan sin-o kondi si Jesus lamang.

Ang Pag-abut ni Elias

⁹ Kag sang nagdolhog sila sa bukid, nagsogo sa ila si Jesus, “Dili kamo magpanugid bisan kay sin-o sang palanan-awon, tubtub nga ang Anak sang tawo mabanhaw.”

¹⁰ Kag ang iya mga gintoton-an nagpamangkot sa iya, “Ngaa bala nagasiling ang mga escriba nga si Elias dapat magkari sing una?”

¹¹ Nagsabat sia, “Matuud si Elias magakari, kag magapasag-uli sang tanan nga butang;

¹² apang nagasiling ako sa inyo nga si Elias nakakari na, kag wala nila sia makilal-i, kondi ginhimo nila sa iya ang bisan ano nga ila naluyagan. Subong man ang Anak sang tawo paantuson nila.”

¹³ Niyan nahangup sang mga gintoton-an nga naghambal sia sa ila nahanungud kay Juan Bautista.

Si Jesus Nagaayo sang Bata nga Kuyapon

¹⁴ Kag sang nag-abut sila sa kadam-an, nagpalapit sa iya ang isa ka tawo nga nagaluhud kag nagasiling,

¹⁵ “Ginoo, kalooyi ang akon anak nga lalaki, kay kuyapon sia kag nagaantus sing tama; kay sa makadamu nagakapukan sia sa kalayo, kag sa makadamu sa tubig.

¹⁶ Kag gindala ko sia sa imo mga gintoton-an, kag indi sila makaayo sa iya.”

¹⁷ Kag si Jesus nagsabat, “O kaliwatan nga dimatinoohon kag balingag, tubtub san-o pa bala magaupud ako sa inyo? Tubtub san-o pa bala magabatas ako sa inyo? Dalha sia diri sa akon.”

¹⁸ Kag si Jesus nagsabdong sa iya, kag naggowa ang yawa sa iya, kag ang bata nag-ayo sa gilayon.

¹⁹ Niyan nagpalapit sing pahain kay Jesus ang mga gintoton-an kag nagpamangkot, “Ngaa bala nga indi kami makasobol sang yawa?”

²⁰ Nagsabat sia sa ila, “Bangud sang inyo diotay nga pagtoo. Kay sa pagkamatuud, nagasiling ako sa inyo, kon kamo may pagtoo subong sa lamigas sang mostaza, magasiling kamo sa sining bukid, ‘Saylo didto,’ kag ini magasaylo; kag wala gid sing dimahimo ninyo. [

²¹ Apang ining yawa indi maggowa luwas paagi sa pangamuyo kag puasa.]”

Si Jesus Nagatagna Liwat sang Iya Kamatayon

²² Sang nagpabilin sila sa Galilea, si Jesus nagsiling sa ila, “Ang Anak sang tawo itugyan sa mga kamut sang mga tawo,

²³ kag patyon nila sia, kag sa ikatlong adlaw banhawon sia.” Kag nagkasubu sila sing lakas.

Pagbayad sang Buhis sang Templo

²⁴ Sang nag-abut sila sa Capernaum, nagpalapit kay Pedro ang mga manugsukot sang katunga nga siclo nga buhis kag nagsiling, “Wala bala nagabayad ang inyo manunudlo sing buhis sang templo?”

²⁵ Nagsiling sia, “Hoo, nagabayad.” Kag sang nagsulud sia sa balay, nagpamangkot si Jesus sing una sa iya, nga nagasiling, “Ano bala sa hunahuna mo, Simon? Sa kay sin-o bala nagasukot sing mga balayran ukon buhis ang mga hari sa duta? Sa ila mga anak ukon sa mga dumoloong?”

²⁶ Kag sang nagsabat sia, “Sa mga dumoloong,” si Jesus nagsiling sa iya, “Busa ang mga anak hilway.

²⁷ Apang, agud nga indi naton sila mapasandad, kadto ka sa dagat kag itawtaw ang taga, kag dakpa ang una nga isda nga maghulik, kag kon matingal mo ini, makita mo ang isa ka siclo; kuhaa ina kag ihatag mo sa ila tungud sa akon kag sa imo.”