Mateo 16 - Ang Biblia (1982)

Ang Pagkinahanglan sing Tanda

¹ Kag nagpalapit ang mga Fariseo kag ang mga Saduceo, kag sa pagtilaw sa iya nagpangayo nga pakitaan sila sing tanda gikan sa langit.

² Nagsabat sia sa ila, “Sa kahaponanon, nagasiling kamo, ‘Magalinong; kay ang langit mapula.’

³ Kag sa aga, ‘Karon magabagyo, kay ang langit mapula kag maguum.’ Makahibalo kamo maghangup sang dagway sang langit, apang indi kamo makahangup sang mga tanda sang mga tion.

⁴ Isa ka kaliwatan nga malaut kag makilahion nagapangita sing tanda, apang walay tanda nga ihatag sa iya kondi ang tanda ni Jonas.” Gani ginbayaan niya sila kag nagtaliwan.

Ang Tapay sang mga Fariseo kag mga Saduceo

⁵ Sang nag-abut ang iya mga gintoton-an sa tabok, nalimot sila sa pagdala sing tinapay.

⁶ Si Jesus nagsiling sa ila, “Magtalupangud kag mag-andam kamo sang tapay sang mga Fariseo kag sang mga Saduceo.”

⁷ Kag nagbinaisay sila, nga nagasiling, “Wala kita magdala sing tinapay.”

⁸ Apang si Jesus, sang nakahantup sini, nagsiling, “Kamo nga diotay sing pagtoo, ngaa bala nagabinaisay kamo bangud nga wala kamo sing tinapay?

⁹ Wala pa bala kamo makahantup? Wala bala kamo makadumdum sang lima ka tinapay sa lima ka libo, kag kon pila ka alat ang ginhimos ninyo?

¹⁰ Ukon sang pito ka tinapay sa apat ka libo, kag kon pila ka alat ang ginhimos ninyo?

¹¹ Paano bala nga wala kamo makahantup nga indi nahanungud sa tinapay ang akon ginpamolong sa inyo? Andam kamo sang tapay sang mga Fariseo kag mga Saduceo.”

¹² Niyan nakahangup sila nga wala sia magpaandam sa ila sang tapay sang tinapay, kondi sang pagtolon-an sang mga Fariseo kag sang mga Saduceo.

Ang Pagtu-ad ni Pedro

¹³ Karon sang nagsulud si Jesus sa ginsakpan sang Cesarea ni Filipo, nagpamangkot sia sa iya mga gintoton-an, “Sin-o bala siling sang mga tawo ang Anak sang tawo?”

¹⁴ Kag nagsabat sila, “Ang iban nagasiling si Juan Bautista, ang iban nagasiling si Elias, kag ang iban si Jeremias ukon isa sang mga manalagna.”

¹⁵ Nagpamangkot sia sa ila, “Apang sin-o bala ako sa inyo?”

¹⁶ Nagsabat si Simon Pedro, “Ikaw ang Cristo, ang Anak sang Dios nga buhi.”

¹⁷ Kag si Jesus nagsabat sa iya, “Bulahan ikaw, Simon Bar-Jonas! Kay wala pag-ipahayag ini sa imo sang unud kag dugo, kondi sang akon Amay nga yara sa langit.

¹⁸ Kag ako man nagasiling sa imo, ikaw si Pedro, kag sa ibabaw sining igang tukuron ko ang akon iglesia, kag ang mga gahum sang kamatayon indi makalandas sa iya.

¹⁹ Sa imo akon ihatag ang mga yabi sang ginharian sang langit, kag ang bisan ano nga imo gapuson sa duta gapuson sa langit, kag ang bisan ano nga imo hubaran sa duta hubaran sa langit.”

²⁰ Niyan nagtugon gid sia sa iya mga gintoton-an nga indi sila magsugid sa bisan kay sin-o nga sia amo ang Cristo.

Si Jesus Nagapanagna sang Iya Kamatayon

²¹ Kutub sadtong tion nagsugud si Jesus sa pagpahayag sa iya mga gintoton-an nga kinahanglan sia magkadto sa Jerusalem kag mag-antus sing madamung butang sa mga tigulang kag sa puno nga mga sacerdote kag mga escriba, kag nga pagpatyon, kag pagbanhawon sa ikatlong adlaw.

²² Kag ginpain sia ni Pedro kag nagsugud sia sa pagsabdong sa iya, nga nagasiling, “Magmalayo ini sa imo, Ginoo! Indi gid ini mahanabu sa imo.”

²³ Apang nagliso sia kag nagsiling kay Pedro, “Halin ka sa atubangan ko, Satanas! Kasandaran ka sa akon; kay wala ka nagapanghunahuna sang mga butang nga iya sang Dios, kondi sang iya sang mga tawo.”

²⁴ Niyan si Jesus nagsiling sa iya mga gintoton-an, “Kon sin-ong tawo ang buut magsonod sa akon, magdumili sia sang iya kaugalingon kag magpas-an sang iya cruz kag magsonod sa akon.

²⁵ Kay ang bisan sin-o nga buut magluwas sang iya kabuhi madulaan sini, kag ang bisan sin-o nga magdula sang iya kabuhi bangud sa akon makakita sini.

²⁶ Kay ano bala ang mapulus sang tawo, kon maangkon niya ang bug-os nga kalibutan kag madula ang iya kalag? Ukon ano bala ang ihatag sang tawo nga baylo sang iya kalag?

²⁷ Kay ang Anak sang tawo magakari sa himaya sang iya Amay upud sang iya mga manugtunda, kag ugaling magatumbas sia sa tagsa ka tawo sono sa iya binuhatan.

²⁸ Sa pagkamatuud, nagasiling ako sa inyo, may iban sang mga nagatindug diri nga indi makatilaw sang kamatayon tubtub nga makita nila ang Anak sang tawo nga nagakari sa iya ginharian.”