Job 8 - Ang Biblia (1982)

Si Bildad Nagapamatuud sang Pagkatarung sang Dios

¹ Niyan si Bildad nga Suhanhon nagsabat,

² “Tubtub bala san-o ang pagpamolong mo sini nga mga butang, kag ang mga polong sang imo baba manginkaangay sa mamadlus nga hangin?

³ Ginapatiko bala sang Dios ang katarungan? Ukon ginapatiko sang Makaako ang pagkamatarung?

⁴ Kon ang imo mga anak nakasala batok sa iya, gintugyan niya sila sa kamut sang ila pagkamalalison.

⁵ Kon ikaw magdangup sing makugihon sa Dios kag mag-ampo ka sa Makaako,

⁶ kon ikaw putli kag matarung, sa pagkamatuud karon magapulaw sia sa imo kag magapauswag sang puluy-an sang imo pagkamatarung.

⁷ Kag bisan ang imo pagpamuno diotay, apang ang imo kaolihian magadugang sing daku.

⁸ “Kay pakiana ka, ginaampo ko sa imo, nahanungud sa una nga panuigon, kag magtalupangud ka sang nausisaan sang ila mga ginikanan;

⁹ kay kahapon lamang kita, kag wala sing nahibaloan, bangud nga ang aton mga adlaw sa duta landong.

¹⁰ Indi bala sila magtudlo sa imo, kag magsugid sa imo, kag magmitlang sing mga polong gikan sa ila tagiposoon?

¹¹ “Makatubo bala ang papiro sa wala sing lunang? Makatubo bala ang bagaas sa wala sing tubig?

¹² Samtang nga hilaw pa sia kag wala matapas, nagakalaya sia una sa iban nga gamhon.

¹³ Amo ini ang mga banas sang tanan nga nagakalipat sa Dios; ang paglaum sang didiosnon nga tawo mawala.

¹⁴ Ang iya pagsalig mabugto, kag ang iya pagsalig amo ang lawa sang damang.

¹⁵ Magasandig sia sa iya balay, apang indi ini magtindug; magakapyot sia sing malig-on sa iya, apang indi ini magapadayon.

¹⁶ Hilaw sia sa dayag sang adlaw, kag ang iya mga salingsing nagalapnag sa iya katamnan.

¹⁷ Ang iya mga gamut nagapangabud sa tinumpok nga bato; nagatolok sia sa duug sang mga bato.

¹⁸ Kon laglagon sia sa iya duug, niyan ini magapanghiwala sa iya, nga nagasiling, ‘Wala ako makakita sa imo.’

¹⁹ Yari karon, amo ini ang kalipay sang iya dalanon; kag gikan sa duta magagowa ang iban.

²⁰ “Yari karon, ang Dios dili magsikway sa tawo nga himpit, kag dili sia magtib-ong sa mga manughimo sing malaut.

²¹ Pun-on pa niya ang imo baba sing kinadlaw, kag ang imo mga bibig sing sininggit.

²² Ang nagadumut sa imo panaptan sing kahuluy-an, kag ang layanglayang sang malauton mawala.”