Job 4 - Ang Biblia (1982)

Si Elifaz Nagasabdong kay Job

¹ Niyan nagsabat si Elifaz nga Temanhon:

² “Kon ang isa magpangahas sa paghambal sa imo, magkasakit ka bala? Apang sin-o bala ang makapugong sang iya kaugalingon sa pagpamolong?

³ Yari karon, ikaw nakatudlo sa madamu, kag nakapabaskug ka sang maluya nga mga kamut.

⁴ Ang imo mga polong nakapapag-on sa iya nga nagakapukan, kag ginpabakud mo ang maluya nga mga tuhud.

⁵ Apang karon ini nag-abut sa imo, kag ginapunaw ka; ini nagatandug sa imo, kag nalisang ka.

⁶ Indi bala ang imo kahadluk sa Dios pagsalig mo, kag ang pagkatarung sang imo mga dalanon imo paglaum?

⁷ “Panumduma, sin-o bala ang nawala nga wala sing sala? Ukon diin bala ang mga matarung ginapapas?

⁸ Sono sa nakita ko, sila nga nagaarado sing kalautan kag nagasab-ug sing kagamo nagaani sang amo.

⁹ Tungud sa gininhawa sang Dios nawala sila, kag tungud sa pusnga sang iya kaakig napapas sila.

¹⁰ Ang ngurub sang leon, ang tingug sang mabangis nga leon, ang mga ngipon sang totoy nga mga leon, nagakaboong.

¹¹ Ang tigulang nga leon nagakawala tungud sa kakulang sing tulukbon, kag ang mga totoy sang leon nga inang nagaaplaag.

¹² “Karon ang isa ka butang gindala sa akon sing tago, ang akon dulunggan nakabaton sing hutik sini.

¹³ Sa mga panghunahuna gikan sa mga palanan-awon sang kagab-ihon, sang nag-abut ang hamook nga katologon sa mga tawo,

¹⁴ nag-abut sa akon ang kahadluk, kag ang palangurug, nga nagpakibang sang tanan ko nga mga tul-an.

¹⁵ Niyan isa ka espiritu naglabay sa akon nawung; nagpalanindug ang balahibo sang akon lawas.

¹⁶ Nagdolog ini, apang indi ako makakilala sang iya dagway. May dagway sa atubangan sang akon mga mata; may katinong, kag nabatian ko ang isa ka tingug:

¹⁷ ‘Magalabi pa bala katarung sa Dios ang tawong mamalatyon? magalabi pa bala kaputli ang tawo sa iya Magbubuhat?

¹⁸ Wala sia nagasalig bisan sa iya mga alagad, kag ang iya mga manugtunda ginapabangdan niya sing kabuangan;

¹⁹ daw ano pa gid sila nga nagapuyo sa mga balay nga lunang, nga ang iya sadsaran yara sa yab-ok, nga ginapigsa kaangay sang sipit.

²⁰ Kutub sa kaagahon tubtub sa kagab-ihon ginalaglag sila; nagakawala sing dayon nga wala sing bisan sin-o nga nagasapak sini.

²¹ Kon bugrason ang ila banting sang layanglayang sa sulud nila, wala bala nagakapatay sila, kag nga wala sing kaalam?’