Job 2 - Ang Biblia (1982)

¹ Sa liwat may adlaw sang nag-abut ang mga lalaking anak sang Dios sa pag-atubang sa Ginoo, kag si Satanas nag-abut man sa tunga nila sa pag-atubang sa Ginoo.

² Kag ang Ginoo nagsiling kay Satanas, “Diin ka bala maghalin?” Si Satanas nagsabat sa Ginoo, “Gikan sa paglibutlibut sa duta, kag sa paglakatlakat sa sini.”

³ Kag ang Ginoo nagsiling kay Satanas, “Natalupangdan mo bala ang akon alagad nga si Job, nga wala na sing kaangay sa iya sa duta, tawo nga himpit kag matarung, nga mahadlukon sa Dios kag nagalikaw sa malaut? Ginahuptan pa niya sing malig-on ang iya pagkatarung, bisan pa gintandug mo ako batok sa iya, sa paglaglag sa iya sa wala sing kabangdanan.”

⁴ Niyan si Satanas nagsabat sa Ginoo, “Panit sa panit! Ang tanan nga iya sang tawo ihatag niya tungud sa iya kabuhi.

⁵ Apang untaya karon ang imo kamut, kag tanduga ang iya tul-an kag ang iya unud, kag sikwayon ka niya sa imo nawung.”

⁶ Kag ang Ginoo nagsiling kay Satanas, “Yari karon, sia yara sa imo kamut; lamang andami ang iya kabuhi.”

⁷ Gani naghalin si Satanas sa atubangan sang Ginoo, kag ginsakit si Job sing tama nga hubag kutub sa dapadapa sang iya tiil tubtub sa iya alimpudwan.

⁸ Kag nagkuha sia sing bika nga inugkalot niya, kag naglingkod sia sa mga abo.

⁹ Niyan nagsiling sa iya ang iya asawa, “Ginahuptan pa bala nimo sing malig-on ang imo pagkatarung? Sikwaya ang Dios, kag panginmatay.”

¹⁰ Apang sia nagsiling sa iya, “Nagapamolong ka subong sang pagpamolong sang isa sang mga babayi nga kulangkulang. Batonon bala naton ang maayo sa kamut sang Dios, kag indi naton pagbatonon ang malaut?” Sa sini tanan wala makasala si Job sa iya mga bibig.

¹¹ Karon sang nakabati ang tatlo ka abyan ni Job sini tanan nga malaut nga nag-abut sa iya, nag-abut ang tagsa sa ila gikan sa iya kaugalingon nga duug, si Elifaz nga Temanhon, si Bildad nga Suhanon, kag si Zofar nga Naamanhon. Nagkasugut sila sa pagkadto sa pagpangalisud sa iya kag sa paglipay sa iya.

¹² Kag sang nalantawan nila sia sa malayo, wala nila sia makilala; kag nagbayaw sila sang ila mga tingug kag naghibi; kag ang tagsatagsa nagkusnit sang iya kunup kag nagsabwag sing yab-ok sa ila olo nayon sa langit.

¹³ Gani naglingkod sila upud sa iya sa duta sing pito ka adlaw kag pito ka gab-i, kag wala sing bisan sin-o sa ila nga nagpamolong sing isa ka polong sa iya, kay nakita nila nga ang iya kasakit tama gid kadaku.