Isaias 3 - Ang Biblia (1982)

Ang Paghukom sang Ginoo sa Juda kag sa Jerusalem

¹ Kay, yari karon, ang Ginoo, ang Ginoo sang mga kasoldadosan, nagakuha sa Jerusalem kag sa Juda sang inugsagud kag sang inugsakdag, ang bug-os nga inugsagud nga kalan-on, kag ang bug-os nga inugsagud nga tubig;

² ang gamhanan nga tawo kag ang tawo nga hangaway, ang hukom kag ang manalagna, ang manugpakot kag ang tigulang,

³ ang pangolo sang kalim-an kag ang dungganon nga tawo, ang manuglaygay kag ang lantip nga manugtiwtiw kag ang sampaton nga manugbabaylan.

⁴ Kag magahatag ako sing kabataan nga mangin-ila principe, kag ang mga bata magagahum sa ila.

⁵ Kag ang katawohan piguson, ang tagsatagsa sang isa kag ang tagsatagsa sang iya isigkatawo; ang bata magapabugal batok sa tigulang nga tawo, kag ang huroshuros batok sa dungganon.

⁶ Kon ang tawo magdakup sang iya utud sa balay sang iya amay, nga nagasiling: “May panapton ka; manginmanugdumala ka namon, kag ini nga kalaglagan manginsa idalum sang imo kamut”;

⁷ sa sadtong adlaw magasinggit sia, nga nagasiling: “Indi ako magmanugbolong; kay sa akon balay wala sing kalan-on ukon panapton; indi ninyo ako paghimoa nga manugdumala sang katawohan.”

⁸ Kay ang Jerusalem nalaglag, kag ang Juda napukan; kay ang ila dila kag ang ila mga binuhatan batok sa Ginoo, sa pagpaakig sang mga mata sang iya himaya.

⁹ Ang pahayag sang ila nawung nagasaksi batok sa ila; ginabantala nila ang ila sala subong sang Sodoma, wala nila pagtagoa ini. Kailo sa ila kalag! Kay nakahimo sila sing malaut sa ila kaugalingon.

¹⁰ Isiling ninyo sa matarung nga manginmaayo sa ila, kay magakaon sila sang bunga sang ila mga hinimoan.

¹¹ Kailo sa malauton! Manginmalain sa iya, kay ang nahimo sang iya mga kamut himoon sa iya.

¹² Nahanungud sang akon katawohan—ang kabataan amo ang ila mga manugpigus, kag ang mga babayi nagagahum sa ila. O katawohan ko, ang mga nagatuytuy sa imo nagapasayup sa imo, kag nagalaglag sang dalanon sang imo mga banas.

¹³ Ang Ginoo nagatindug sa pagsuay, nagatindug sia sa paghukom sang mga katawohan.

¹⁴ Ang Ginoo magasulud sa hukmanan upud sang mga tigulang sang iya katawohan kag upud sang mga principe niya: “Kamo amo ang nagkaon sang ulubasan, ang inagaw sa imol yara sa inyo mga balay.

¹⁵ Ano bala ang buut ninyo isiling nga ginaligis ninyo ang akon katawohan, nga ginagaling ang nawung sang imol?” nagasiling ang Ginoong Dios sang mga kasoldadosan.

Ang Paghukom sa mga Babaying Anak sang Sion

¹⁶ Ang Ginoo nagsiling: Bangud nga ang babayi nga mga anak sang Sion palabilabihon kag nagalakat nga nagapatiskog sang mga liog, nga nagapasiplat sang mga mata, nga nagapaikit sing tikang sa nagapadayon sila, kag nagapalagting sang ila mga tiil;

¹⁷ busa ang Ginoo magasakit sing palangugan sang alimpuduan sang olo sang mga babayi nga anak sang Sion, kag ang Ginoo magapadayag sang ila tinago nga mga bahin.

¹⁸ Sa sadtong adlaw kuhaon sang Ginoo ang katahum sang mga singsing sa bukobuko, ang mga pinuna, kag ang mga linati;

¹⁹ ang mga pakabit, ang mga pulseras, kag ang mga takurung;

²⁰ ang mga gura, ang mga talikala sa bukobuko, ang mga wagkus, ang mga suludlan sang pahumut, kag ang mga anting-anting;

²¹ ang mga singsing kag ang mga huluyason sa ilong;

²² ang mga panapton nga malaba sa piesta, ang mga panapton nga masangkad, ang mga kunup, kag ang mga puyopuyo;

²³ ang mga salaming nga ginakaptan, ang lino nga manipis, ang mga turbante, kag ang mga takurung.

²⁴ Sa baylo sang maamyon nga mga pahumut amo ang pagkadunut; kag sa baylo sang wagkus, kalat; kag sa baylo sang napatahum nga bohok, pagkaupaw; kag sa baylo sang panapton nga malaba, pagwagkus sang panapton nga sako; pagmarka sa baylo sang katahum.

²⁵ Ang imo mga tawo magakapukan sa espada kag ang imo gamhanan sa inaway.

²⁶ Kag ang iya mga gawang magapanalabiton kag magalalaw; sia magamingaw kag magalingkod sa duta.