Isaias 2 - Ang Biblia (1982)

Ang Makigdaiton nga Paghari sang Ginoo sa Bug-os nga Kalibutan

¹ Ang polong nga nakita ni Isaias nga anak ni Amoz nahanungud sang Juda kag sang Jerusalem.

² Mahanabu sa olihing mga adlaw nga ang bukid sang balay sang Ginoo tukuron sa putokputokan sang kabukiran, kag pakataason sa ibabaw sang kabakoloran; kag magaduguk sa iya ang tanan nga pungsud,

³ kag ang madamung mga katawohan magakadto, kag magasiling: “Kari kamo, magataklad kita sa bukid sang Ginoo, sa balay sang Dios ni Jacob; kag tudloan niya kita sang iya mga dalanon kag magalakat kita sa iya mga banas.” Kay gikan sa Sion magagowa ang kasogoan, kag ang polong sang Ginoo gikan sa Jerusalem.

⁴ Sia magahukom sa tunga sang mga pungsud, kag magahusay nahanungud sa madamung mga katawohan; kag ang ila mga espada salsalon nila nga mga punta sang arado, kag ang ila mga bangkaw nga mga galab nga inughagbas; ang pungsud indi magbayaw sing espada batok sa pungsud, kag indi na sila magtoon sing inaway.

Ang Paghukom sang Ginoo sa mga Bugalon

⁵ O balay ni Jacob, kari kamo, maglakat kita sa kapawa sang Ginoo.

⁶ Kay ginbayaan mo ang imo katawohan, nga panimalay ni Jacob, bangud nga napuno sila sang mga pamatasan gikan sa sidlangan kag mga manugpakot kaangay sang mga Filistinhon, kag sila nagapakigdagpi sing mga kamut sa mga anak sang mga dumuloong.

⁷ Ang ila duta puno sang pilak kag bulawan, kag walay katapusan ang ila mga bahandi; ang ila duta man puno sang mga kabayo, kag walay katapusan ang ila mga kangga.

⁸ Ang ila duta puno man sang mga diosdios; ginasimba nila ang binuhatan sang ila kaugalingon nga mga kamut, nga ginhimo sang ila kaugalingon nga mga tudlo.

⁹ Gani ang kubus nga tawo ginapayaub, kag ang dakung tawo ginapapaubus— busa dili sila pagpatawara!

¹⁰ Sulud sa igang, kag panago ka sa yab-ok gikan sa kakugmat sang Ginoo, kag gikan sa himaya sang iya pagkahari.

¹¹ Ang matinaastaason nga mga panolok sang tawo paubson, kag ang pagkapalabilabihon sang mga tawo payaubon; kag ang Ginoo lamang ang pakataason sa sadtong adlaw.

¹² Kay may adlaw nga iya sang Ginoo sang mga kasoldadosan sa tanan nga bugalon kag palabilabihon, sa tanan nga matinaastaason kag papaubson ini;

¹³ sa tanan nga cedro sang Libano, nga mataas kag labaw; kag sa tanan nga terebinto sang Basan;

¹⁴ sa tanan nga mataas nga kabukiran, kag sa tanan nga kabakoloran nga matinaastaason;

¹⁵ sa tagsa ka torre nga mataas, kag sa tagsa ka kuta nga napamakuran;

¹⁶ sa tanan nga sakayan sang Tarsis, kag sa tanan nga matahum nga tololokon.

¹⁷ Kag ang pagkamatinaastaason sang tawo paubson, kag ang pagkapalabilabihon sang mga tawo panuboon; kag ang Ginoo lamang ang pakataason sa sadtong adlaw.

¹⁸ Kag ang mga diosdios magataliwan sing bug-os.

¹⁹ Kag ang mga tawo magasulud sa mga gikab sang mga igang kag sa mga boho sang duta, gikan sa atubangan sang kakugmat sang Ginoo, kag gikan sa atubangan sang himaya sang iya pagkahari, kon magtindug sia sa pag-uyog sing mabaskug sang duta.

²⁰ Sa sadtong adlaw ipilak sang tawo ang ila mga diosdios nga pilak kag ang ila mga diosdios nga bulawan, nga ginhimo nga simbahon sila, sa mga topo kag sa mga kabug,

²¹ sa pagsulud sa mga lungib sang mga igang kag sa mga litik sang gasanggasang nga mga igang, gikan sa kakugmat sa Ginoo, kag gikan sa himaya sang iya pagkahari, kon magtindug sia sa pag-uyog sing mabaskug sang duta.

²² Bayai ninyo ang tawo nga ang iya ginhawa yara sa iya mga ilong, kay diin bala sia pakamahalon?