Hulubaton 2 - Ang Biblia (1982)

Ang Balus sang Pagpangita sang Kaalam

¹ Anak ko, kon batonon mo ang akon mga polong kag tipigan ang akon mga sogo sa imo,

² sa paglingig sang imo idulungug sa kaalam kag sa pagpahamtang sang imo tagiposoon sa paghangup;

³ hoo, kon magtuaw ka sono sa paghantup kag magbayaw sang imo tingug tungud sa paghangup,

⁴ kon pangitaon mo sia subong sang pilak kag mag-usisa sa iya subong sang mga bahandi nga natago;

⁵ niyan mahangup mo ang kahadluk sa Ginoo kag makita mo ang ihibalo sang Dios.

⁶ Kay ang Ginoo nagahatag sing kaalam; gikan sa iya baba nagagowa ang ihibalo kag paghangup;

⁷ sia nagatipon sing maayo nga kaalam nga sa matadlong; sia taming sa mga nagalakat sa kadungganan,

⁸ agud nga mabantayan niya ang mga banas sang katarungan kag matipigan ang dalan sang iya mga balaan.

⁹ Niyan mahangpan mo ang pagkamatarung kag katarungan kag ang pag-alangay, ang tagsa ka maayo nga banas;

¹⁰ kay ang kaalam magasulud sa imo tagiposoon, kag ang ihibalo manginkahamut-an sa imo kalag;

¹¹ ang pagbinagbinag magabantay sa imo; ang paghangup magatipig sa imo;

¹² sa pagluwas sa imo sa dalanon sang malaut, sa mga tawo nga nagapamolong sing mga butang nga tiko,

¹³ nga nagabiya sang mga banas sang katadlongan sa paglakat sa mga dalan sang kadudulman,

¹⁴ nga nagakasadya sa paghimo sing malaut kag nagakalipay sa pagkabalingag sang malaut;

¹⁵ nga tiko sa ila mga dalanon, kag balingag sa ila mga banas.

¹⁶ Sa pagluwas sa imo sa babayi nga malain, bisan sa dumuloong nga nagaoloolo sa iya mga polong,

¹⁷ nga nagabiya sang abyan sang iya pagkapamatan-on kag nagalimot sang katipan sang iya Dios;

¹⁸ kay ang iya balay nagahuyug sa kamatayon, kag ang iya mga banas sa mga patay;

¹⁹ wala sing nagakadto sa iya nga nagabalik kag wala sila nagalambut sa mga banas sang kabuhi.

²⁰ Agud nga maglakat ka sa dalanon sang mga tawo nga maayo kag magbantay sang mga banas sang matarung.

²¹ Kay ang matadlong magapuyo sa duta, kag ang himpit magapabilin sa sini;

²² apang ang malauton utdon gikan sa duta, kag ang maluib gabuton sa sini.