Hoseas 9 - Ang Biblia (1982)

Ang Pagsilot bangud sang Nagapadayon nga Pagkadimatutum sang Israel

¹ Dili magkasadya, O Israel! Dili magkalipay kaangay sang mga katawohan; kay nagmakihilawason ka, nga nagabiya sa imo Dios. Naghigugma ka sang hinakay sa tagsa ka salog nga linasan sang uyas.

² Ang linasan kag ang ipitan sa alak indi magpakaon sa ila, kag ang bag-o nga alak makulang sa iya.

³ Indi sila magpuyo sa duta sang Ginoo; kondi magabalik ang Efraim sa Egipto, kag magakaon sila sing dimatinlo nga kalan-on sa Asiria.

⁴ Indi sila mag-ula sing mga halad nga alak sa Ginoo; ukon kalahamut-an sila sa iya. Ang ila mga halad magamanginsubong sa ila sang kalan-on sang mga manuglalaw; ang tanan nga nagakaon sini madagtaan; kay ang kalan-on nila manginsa ila luyag; indi magsulud ini sa balay sang Ginoo.

⁵ Ano bala ang inyo himoon sa adlaw sang pagtilipon nga maligdong, kag sa adlaw sang piesta sang Ginoo?

⁶ Kay yari karon, nagpalayo sila sa kalaglagan; apang ang Egipto magatipon sa ila, ang Memfis magalubung sa ila. Ang ila matahum nga mga butang nga pilak angkonon sila sang katunukan; ang talongon manginsa ila mga layanglayang.

⁷ Nagaabut ang mga adlaw sang pagsilot, nagaabut ang mga adlaw sang pagbalus; ang Israel makahibalo sini. Ang manalagna buangbuang, ang tawo nga yara sa iya ang espiritu buang, tungud sang kabugana sang imo kalautan kag bangud nga daku ang kaawayon.

⁸ Ang Efraim manugbantay upud sa akon Dios, nahanungud sa manalagna, ang siod sang mangangayam yara sa tanan niya nga mga dalanon, kag kaawayon sa balay sang iya Dios.

⁹ Ginpalatum nila ang ila kaduluntan subong sang sa mga adlaw sang Gabaa: dumdumon niya ang ila kalautan, silotan niya ang ila mga sala.

¹⁰ Nasapwan ko ang Israel, subong sang uvas sa kamingawan. Nakita ko ang inyo mga ginikanan, subong nga nahauna nga loto sa higuera sa iya nahauna nga panag-on. Apang nagkadto sila sa Baal-peor, kag nagtugyan sang ila kaugalingon sa butang nga makahuluya, kag nanginkalangil-aran kaangay sang ila ginhigugma.

¹¹ Nahanungud sa Efraim ang ila himaya magalupad subong sang pispis— wala na sing pag-anak, wala na sing pagbusung, wala sing pagpanamkon!

¹² Bisan magsagud sila sang ila mga anak, apang kuhaan ko sila agud nga wala sing tawo nga mabilin. Kailo man sila kon ako magtaliwan sa ila!

¹³ Ang Efraim, kaangay sang nakita ko ang Tiro, natanum sa matahum nga duug; apang ang Efraim magadala sang iya mga anak sa manugpatay.

¹⁴ Hatagi sila, O Ginoo— ano bala ang imo ihatag? Hatagi sila sing tiyan nga mahar-ason kag mga soso nga kupus.

¹⁵ Ang tanan nila nga pagkamalaut yara sa Gilgal; kay didto gindumtan ko sila. Bangud sang pagkamalaut sang ila mga hinimoan sobolon ko sila sa akon balay. Indi ko na gid sila paghigugmaon; ang tanan nila nga mga principe mabinatoon.

¹⁶ Ang Efraim ginsamad, nagmala ang ila gamut, indi na sila magbunga. Bisan magpanganak sila, apang patyon ko ang hinigugma nga bunga sang ila tiyan.

¹⁷ Ang akon Dios magasikway sa ila, bangud nga sila wala magpamati sa iya; manginlaaslaas sila sa tunga sang mga pungsud.