Hoseas 8 - Ang Biblia (1982)

Ang Pagsabdong sang Pagkadiwatahan sang Israel

¹ Ibutang sa imo baba ang budyong, subong sang aguila nagaabut sia batok sa panimalay sang Ginoo, bangud nga ginlalis nila ang akon katipan, kag nagbatok sa akon kasogoan.

² Magasinggit sila sa akon, Dios ko, kami nga Israel nakakilala sa imo.

³ Ang Israel nagpilak sang maayo; ang kaaway magalagas sa iya.

⁴ Nagpatindug sila sang mga hari, apang indi tungud sa akon. Naghimo sila sing mga principe, kag ako wala makahibalo sini. Sa ila pilak kag sa ila bulawan naghimo sila sing mga diosdios agud nga utdon sila.

⁵ Ginsikway niya ang imo tinday nga baka, O Samaria. Ang akon kaakig nagsingkal batok sa ila. Tubtub bala san-o nga makadangat sila sa pagkawala sing sala?

⁶ Kay ini gikan gid sa Israel; ang panday naghimo sini, kag indi ini Dios. Ang tinday nga baka sang Samaria dugmokon.

⁷ Kay nagasab-ug sila sang hangin, kag nagaani sila sang buhawi. Wala sia sing alanyon, ang sublak indi magpatubas sing harina; kon magpatubas ini, ang mga dumoloong magalamon sini.

⁸ Ang Israel ginlamon; karon yara sila sa tunga sang mga pungsud subong sang gamit nga wala gid sing naluyag.

⁹ Kay nagataklad sila sa Asiria, kaangay sang asno nga talonon nga isa lamang; ang Efraim may hinigugma nga nahinakayan.

¹⁰ Bisan nga nagapahinakay sila sa tunga sang mga pungsud, karon tiponon ko sila. Kag nagasugud sila sa pagbuhin bangud sang lulan sang hari sang mga principe.

¹¹ Bangud nga ang Efraim nagpadamu sing halaran sa pagpakasala, ang mga halaran nanginpagpakasala sa iya.

¹² Nagsulat ako tungud sa iya sing isa ka laksa nga mga butang sang akon kasogoan, apang ginakabig sila nga butang nga dumuloong.

¹³ Nahanungud sang mga halad sang akon mga dolot, nagahalad sila sing unud kag nagakaon sini; apang ang Ginoo wala magbaton sa ila. Karon dumdumon niya ang ila kalautan, kag silotan ang ila mga sala; magabalik sila sa Egipto.

¹⁴ Kay ang Israel nalimut sa iya Magbubuhat, kag nagpatindug sing mga palacio; kag ang Juda nagpadamu sing mga banwa nga pinabakud; apang magapadala ako sing kalayo sa iya mga banwa, kag magahalunhon ini sang ila mga castilyo.