Hoseas 6 - Ang Biblia (1982)

¹ “Kari, kag magbalik kita sa Ginoo; kay sia nagkusnit, kag sia magaayo sa aton; sia nagpilas, kag bugkosan niya kita.

² Sa tapus ang duha ka adlaw buhion niya kita; sa ikatlong adlaw banhawon niya kita, kag magakabuhi kita sa atubangan niya.

³ Magkilala kita, magsonod kita sa pagkilala sa Ginoo; ang iya paggowa masaligan subong sang kaagahon; magaabut sia sa aton subong sang ulan, subong sang ulan nga olihi nga nagabunyag sang duta.”

⁴ O Efraim, ano bala ang himoon ko sa imo? O Juda, ano ang himoon ko sa imo? Kay ang imo pagkaayo subong sang panganud sang kaagahon, subong sang ton-og nga nagakapanas sing aga pa.

⁵ Busa ginpulud ko sila paagi sa mga manalagna, ginpatay ko sila paagi sa mga polong sang akon baba, kag ang imo mga paghukom subong sang kapawa nga nagabanaag.

⁶ Kay ginahandum ko ang malig-on nga paghigugma kag indi ang halad, ang pagkilala sang Dios, labi pa sa mga halad-nga-sinonog.

⁷ Apang sila kaangay kay Adam naglalis sang katipan; didto nagluib sila batok sa akon.

⁸ Ang Galaad banwa sang mga nagabuhat sing kalautan, nadagtaan ini sang dugo.

⁹ Subong sang mga kabon sang mga buyong nga nagapuut sa tawo, sa amo ang hut-ong sang mga sacerdote; nagapamatay sa dalanon pa Siquem, hoo, nakahimo sila sing kahigal.

¹⁰ Sa panimalay sang Israel nakakita ako sing butang nga makahalanguyus; didto makita ang pagkamakihilawason sa Efraim, ang Israel nadagtaan.

¹¹ Amo man, O Juda, may tig-alani nga natangdo sa imo.