Hoseas 5 - Ang Biblia (1982)

Ang Israel Ginsilotan bangud sang Iya Pagtalikod

¹ Pamati sini, O kamo nga mga sacerdote! Magtalupangud, O panimalay sang Israel! Magdungug, O panimalay sang hari! Kay sa inyo natungud ang paghukom; kay nanginsiod kamo sa Mispa, kag batong nga nahumlad sa Tabor.

² Kag ang mga manriribuk nagdalum sa ila pagpamatay; apang ako manugsabdong sa ila tanan.

³ Ako nakakilala kay Efraim, kag si Israel wala malipdi sa akon; kay karon, O Efraim, nagmakihilawason ka, nadagtaan si Israel.

⁴ Ang ila mga hinimoan indi magtugut sa ila sa pagbalik sa ila Dios. Kay ang espiritu sang pagkamakihilawason yara sa tunga nila, kag wala sila makakilala sa Ginoo.

⁵ Ang bugal ni Israel nagapamatuud sa iya nawung, busa si Israel kag si Efraim magakasandad sa ila kalautan; si Juda man magakasandad upud sa ila.

⁶ Magalakat sila upud sa ila mga panong kag upud sa ila kahayupan sa pagpangita sa Ginoo, apang indi nila sia makita; sia nagpalayo sa ila.

⁷ Nagbudhi sila batok sa Ginoo; kay nag-anak sila sing iban nga kabataan. Karon ang lati magahalunhon sa ila upud sang ila mga latagon.

⁸ Patonog kamo sing corneta sa Gabaa, sang budyong sa Rama. Patonog kamo sing paandam sa Bet-aven; sa olihi nimo, O Benjamin!

⁹ Si Efraim manginmamingaw sa adlaw sang pagsabdong; sa tunga sang mga kabikahan sang Israel ginpakilala ko ang totoo nga mahanabu.

¹⁰ Ang mga principe sang Juda kaangay sang mga nagahalin sang dulunan; iula ko subong sang tubig sa ila ang akon kasingkal.

¹¹ Si Efraim ginapigos, ginaligis sia sa paghukom, bangud nga tuman na sa iya ang pagsonod sa sogo sang tawo.

¹² Busa ako subong sang sipit kay Efraim, kag subong sang kaduluntan sa panimalay ni Juda.

¹³ Sang nakita ni Efraim ang iya balatian, kag ni Juda ang iya pilas, niyan nagkadto si Efraim sa Asiria, kag nagpadala kay Hari Jareb. Apang indi sia makaayo sa inyo ukon makabolong sang inyo pilas.

¹⁴ Kay manginsubong ako sang leon kay Efraim, kag subong sang totoy nga leon sa panimalay ni Juda. Ako, ako gid, magakusnit kag magapalayo, magapanaban ako, kag walay magaluwas.

Ang Pagkadihanuut sang Paghinulsul sang Israel

¹⁵ Magalakat ako kag magabalik sa akon duug, tubtub nga kilalahon nila ang ila pagpakasala kag pangitaon ang akon nawung, sa ila kapipit-an magapangita sila sa akon sing hanuut, nga nagasiling,