Hoseas 14 - Ang Biblia (1982)

Ang Israel Ginpakilooyan nga Magbalik sa Ginoo

¹ O Israel, balik ka sa Ginoo nga imo Dios, kay tungud sa imo kalautan napukan ka.

² Dala kamo sing mga polong kag magbalik sa Ginoo; isiling sa iya, “Kuhaa ang bug-os nga kalautan; batona ang maayo kag ihatag namon subong sang mga tinday nga baka nga lalaki ang dolot sang amon mga bibig.

³ Ang Asiria indi magluwas sa amon, indi kami magsakay sa mga kabayo; kag indi na kami magsiling, ‘Dios namon,’ sa binuhatan sang amon mga kamut. Sa imo ang mga ilo makakita sing kalooy.”

⁴ Ayohon ko ang ila pagtalikod; higugmaon ko sila sing bugana, kay ang akon kaakig nagapalayo sa iya.

⁵ Ako manginsubong sang ton-og sa Israel; sia magapamulak subong sang lirio, magapanggamut subong sang Libano;

⁶ magagapa ang iya mga sanga; ang iya katahum manginsubong sang olivo, kag ang iya kahumut subong sang Libano.

⁷ Ang mga nagapuyo sa idalum sang iya landong magabalik, maumpawan sila subong sang uyas; magapamulak subong sang uvas, ang iya baho manginsubong sang alak sang Libano.

⁸ O Efraim, ano pa bala ang labut ko sa mga diosdios? Ako nakasabat kag magasapak sa iya. Kaangay ako sang abeto nga lab-as, gikan sa akon nakita ang imo bunga.

⁹ Sin-o bala ang maalam, agud nga mahangup niya ining mga butang; ang mahinalongon, agud nga mahangup niya sila; kay ang mga dalanon sang Ginoo matarung, kag ang mga matadlong magalakat sa ila, apang ang mga malalison mapukan sa ila.