Hoseas 13 - Ang Biblia (1982)

Ang Bug-os nga Kalaglagan sang Efraim Gintagna

¹ Sang si Efraim nagpamolong, may pagkurug; nagpakataas sia sa Israel; apang sang nagpakasala sia sa Baal napatay sia.

² Kag karon nagpakasala sila sing labi kag labi pa, kag sa ila pilak naghimo sila nga sa ila sing mga larawan nga tinunaw, mag diosdios sono sa ila paghangup, tanan sila binuhatan sang mga panday. Maghalad sa ila, nagasiling sila. Ang mga tawo nagahaluk sa mga tinday!

³ Busa manginsubong sila sang panganud sang kaagahon kag sang ton-og nga nagapuas sing aga pa, subong sang labhang nga ginapalid sang buhawi gikan sa salog nga linasan kag subong sang aso nga nagagowa sa simboryo.

⁴ Apang ako amo ang Ginoo nga imo Dios kutub sa duta sang Egipto; wala ka sing kilalahon nga dios kondi ako, kag luwas sa akon walay manluluwas.

⁵ Ginkilala ko ikaw sa kamingawan, sa duta sang dakung tingadlaw;

⁶ sono sa ila halalban sa amo ginbusug sila, nabusug sila, kag nagpakataas ang ila tagiposoon; busa nalipat sila sa akon.

⁷ Busa ako subong sang leon sa ila, subong sang leopardo magapuut ako sa dalanon.

⁸ Sugataon ko sila subong sang oso nga nawad-an sang iya mga totoy, kusniton ko ang putus sang ila tagiposoon, kag didto halunhonon ko sila kaangay sang leon nga babayi, subong sang pagpang-it sang sapat nga talonon sa ila.

⁹ Laglagon ko ikaw, O Israel; sin-o ang makabulig sa imo?

¹⁰ Diin na bala karon ang imo hari, agud nga maluwas ka niya; sa tanan mong kabanwaanan, ang imo mga hukom— nga nahanungud sa ila nagsiling ka, “Hatagi ako sing hari kag mga principe”?

¹¹ Ginhatagan ko ikaw sing hari sa akon kaakig, kag ginkuha sia sa akon kasingkal.

¹² Ang kalautan ni Efraim ginputus, ang iya sala ginsuput.

¹³ Ang mga kalisud sang babayi nga ginasakitan magaabut sa iya, sia dimaalam nga anak nga lalaki; kay tion na nga indi sia magpalantang sa duug nga balataan.

¹⁴ Gawaron ko bala sila sa gahum sang Sheol? Tubson ko bala sila sa kamatayon? O Kamatayon, diin bala ang imo mga kalalat-an? O Sheol, diin bala ang imo kalaglagan? Ang paghinulsul lipdan sa akon mga mata.

¹⁵ Bisan pa mabungahon sia sa tunga sang iya mga utud, ang salatan magaabut, ang ginhawa sang Ginoo, nga nagasaka gikan sa kamingawan; kag magamala ang iya tuburan, mahubsan ang iya tulubdan; atihon niya ang bahandi sang tanan nga malahalon nga gamit.

¹⁶ Ang Samaria magaantus sang iya sala, kay nagbato sia sa iya Dios; mapukan sila sa espada, ang ila mga lapsag ilampus, kag ang ila mga babayi nga nagabusung gayhabon.