Hoseas 12 - Ang Biblia (1982)

Ang Efraim Ginsabdong bangud sang Kabutigan kag Pagpigus

¹ Si Efraim nagakaon sang hangin, kag nagasonod sa salatan; nagapabuad sia sing dalayon sing kabutigan kag kamingaw; nagapakigkatipan sila sa Asiria, kag ginadala ang lana sa Egipto.

² Ang Ginoo may kasaba man kay Juda, kag magasilot kay Jacob sono sa iya mga dalanon, sono sa iya mga hinimoan balusan niya sia.

³ Sa tiyan ginkaptan niya sa tikod ang iya utud, kag sa iya pagkahamtong may gahum sia upud sa Dios.

⁴ May gahum sia sa manugtunda kag naglandas, naghibi sia kag nagpakilooy sa iya. Sa Bet-el nasapwan niya sia, kag didto nagpakighambal sia sa aton—

⁵ ang Ginoo nga Dios sang mga kasoldadosan, ang Ginoo amo ang iya handumanan nga ngalan:

⁶ “Busa balik ka sa imo Dios, hupti ang kalolo kag ang katarungan, kag hulat sa imo Dios sing dalayon.”

⁷ Manugpalitog sia, yara sa iya kamut ang timbangan sang paglimbong, nagahigugma sia sa pagpigus.

⁸ Si Efraim nagsiling, “Sa pagkamatuud nagmanggaran ako, nakakita ako sing manggad nga sa akon”; sa tanan ko nga pagpangabudlay wala sila sing makita sa akon nga kalautan nga sala.

⁹ Apang ako ang Ginoo nga imo Dios kutub sa duta sang Egipto; papuy-on ko pa ikaw liwat sa mga layanglayang, subong sang sa mga adlaw sang piesta nga maligdong.

¹⁰ Nagpamolong man ako sa mga manalagna; ginpabuad ko ang mga palanan-awon, kag tungud sa pagpanghikut sang mga manalagna naggamit ako sing mga paanggid.

¹¹ Kon may kalautan ang Galaad sila tanan lunsay dimatuud; kon sa Gilgal nagahalad sila sing mga tinday nga baka nga lalaki, ang mga halaran man nila subong sang mga tinumpok sa mga idas sang latagon.

¹² (Si Jacob nagpalagyo sa latagon sang Aram, didto si Israel nagpangagad tungud sa asawa, kag tungud sa asawa nagbantay sia sing mga carnero.)

¹³ Paagi sa manalagna ginpagowa sang Ginoo sa Egipto ang Israel, kag paagi sa manalagna gintipigan sia.

¹⁴ Si Efraim nagpaakig sing mapait gid; busa ang iya dugo mabilin sa iya, kag ang iya Ginoo magapabalik sa iya sang iya kahuluy-an.