Hoseas 11 - Ang Biblia (1982)

Ang Dios Nagahandum sang Iya Balingag nga Katawohan

¹ Sang bata pa si Israel, niyan ginhigugma ko sia, kag gintawag ang akon anak nga lalaki gikan sa Egipto.

² Sa labi pa nga pagtawag sang mga manalagna sa ila, labi pa nga nagpalayo sila sa ila; nagahalad sila sa mga Baal, kag nagsonog sing incienso sa mga larawan nga tinigban.

³ Apang gintudloan ko sa paglakat ang Efraim, ginkungkung ko sila; apang wala sila makakilala nga ako nag-ayo sa ila.

⁴ Ginbutong ko sila sa mga lubid sang tawo, sa mga gapus sang gugma, kag naginsubong ako sa ila sang nagahukas sang gota sa ila mga sulang, kag ginbutangan ko sing pagkaon sa atubangan nila.

⁵ Indi sila magbalik sa duta sang Egipto, kondi ang mga Asiriahanon amo ang ila hari, bangud nga nagdumili sila sa pagbalik sa akon.

⁶ Ang espada magatupa sa ila kabanwaanan, magaupus sang ila mga pintal, kag magahalunhon sa ila bangud sang ila kaugalingon nga mga laygay.

⁷ Ang akon katawohan nabuyuk sa pagtalikod sa akon; gani ginatangdo sila sa gota, kag wala gid sing magahukas sini.

⁸ Paano bala ang pagbiya ko sa imo, Efraim! Paano bala ang pagsikway ko sa imo, Israel! Paano bala ang paghimo ko sa imo subong sang Adma! Paano bala ang paghimo ko sa imo subong sang Zeboim! Ang akon tagiposoon nagliso sa sulud nakon, nagadabdab sing tingub ang akon mga kaawa.

⁹ Indi ko paghikuton ang kapintas sang akon kaakig, indi ako magbalik sa paglaglag sang Efraim; kay Dios ako kag indi tawo, ang Balaan sa tunga nimo, kag indi ako mag-abut sa kasingkal.

¹⁰ Magasonod sila sa Ginoo, nga magangurub kaangay sang leon; kay magangurub sia, kag ang mga anak magaabut nga nagakurug gikan sa katundan;

¹¹ magaabut sila nga nagakurug subong sang pispis gikan sa Egipto, kag subong sang alimokon gikan sa duta sang Asiria; kag papuy-on ko sila sa ila mga balay, nagasiling ang Ginoo.

¹² Ginalibutan ako sang Efraim sing pagkadimatuud, kag ang panimalay sang Israel sing paglimbong; apang ang Juda nagadumala pa upud sa Dios, kag matutum upud sa Balaan.