Hebreo 13 - Ang Biblia (1982)

Mga Katungdanan nga Cristohanon

¹ Padayona ninyo ang gugma sa paghiliutud.

² Dili kamo malimot sa pagsapopo sa mga dumoloong, kay sa sini ang iban nakaamoma sing mga manugtunda sa wala nila mahibaloi.

³ Dumduma ninyo ang mga yara sa bilanggoan, subong nga daw yara sa bilanggoan upud sa ila; kag sila nga ginapintasan, sanglit nga yara man kamo sa lawas.

⁴ Paghuptan sing dungganon sang tanan ang pag-asawahay, kag ang higdaan sang pagkasal dipagdagtaan; kay hukman sang Dios ang mga makihilawason kag mga makilahion.

⁵ Panginluwas kamo sa gugma sa cuarta, kag magcontento sang yara sa inyo; kay sia nagsiling, “Indi ko ikaw nga mas-a pagpalugaw-an ukon pagpatumbayaan ko ikaw.”

⁶ Gani sa may pagsalig makasiling kita, “Ang Ginoo amo ang akon manugtabang, indi ako mahadluk; ano bala ang himoon sang tawo sa akon?”

⁷ Dumduma ang inyo mga pangolo, mga tawo nga naghambal sa inyo sang polong sang Dios; talupangda ang kaolihian sang ila kabuhi, kag iloga ang ila pagtoo.

⁸ Si Jesu-Cristo amo man kahapon kag karon kag sa gihapon.

⁹ Dili kamo magpadaladala sa sarisari kag tuhay nga mga pagtolon-an; kay maayo nga ang tagiposoon palig-onon sa bugay, indi sa mga kalan-on, nga ang mga nagagawi sa ila wala makapulus.

¹⁰ May aton kita nga halaran nga sa sini walay kinamatarung sa pagkaon ang mga nagaalagad sa kayangkayang.

¹¹ Kay ang mga lawas sadtong mga sapat nga ang ila dugo ginadala sang pinakamataas nga sacerdote sa santuario subong nga halad tungud sa sala ginasonog sa gowa sang dologan.

¹² Gani si Jesus man nag-antus sa luwas sang gawang agud nga mapakabalaan niya ang katawohan paagi sa iya kaugalingon nga dugo.

¹³ Busa magkadto kita sa iya sa luwas sang dologan, nga nagadala sang kahuluy-an tungud sa iya.

¹⁴ Kay diri wala kita sing banwa nga nagapadayon, kondi nagapangita kita sang banwa nga palaabuton.

¹⁵ Niyan paagi sa iya maghalad kita sing dalayon sa Dios sing halad sang pagdayaw, nga amo, ang bunga sang mga bibig nga nagatu-ad sang iya ngalan.

¹⁶ Dili malimot sa paghimo sing maayo kag sa pagpanagtag sang yara sa imo, kay sa amo nga mga halad nahamuut ang Dios.

¹⁷ Tumana ang mga nagapangolo sa inyo kag magpasakup sa ila; kay nagapulaw sila tungud sa inyo mga kalag, subong nga sila ang magahatag sing husay. Maghimo sila sini nga may kalipay, kag indi nga may pagbakho, kay ina walay kapuslanan sa inyo.

¹⁸ Pangamuyo kamo tungud sa amon, kay ginasaligan namon nga may matin-aw kami nga kaisipan, nga nagahandum sa pagpangabuhi sing dungganon sa tanan nga butang.

¹⁹ Nagalaygay ako sa inyo sing labi pa gid sa paghimo sini agud nga mapabalik ako sa inyo sa labing madali.

Pagpakamaayo kag Katapusan nga mga Pag-abiabi

²⁰ Karon ang Dios sang paghidait, nga nagbanhaw sang aton Ginoong Jesus, ang daku nga manugpahalab sang mga carnero, bangud sa dugo sang dayon nga katipan,

²¹ maghimpit sa inyo sa tagsa ka maayong buhat sa paghimo sang iya kabubut-on, nga nagahikot sa aton sang nahamut-an sa iya itololok, paagi kay Jesu-Cristo; nga sa iya ang himaya sa katuigan kag katuigan. Kabay pa.

²² Nagapakilooy ako sa inyo, mga kauturan, batasa ninyo ang akon polong sang laygay, kay nakasulat ako sa inyo sing malip-ot.

²³ Hangpon ninyo nga si Timoteo nga aton utud nabuhian na, nga upud sa iya magapakigkita ako sa inyo kon mag-abut sia sing madali.

²⁴ Abiabiha tanan sila nga nagapangolo sa inyo kag ang tanan nga balaan. Ang mga taga-Italia nagaabiabi sa inyo.

²⁵ Ang bugay manginkaupud ninyo tanan. Kabay pa.