Genesis 50 - Ang Biblia (1982)

¹ Niyan naghapa si Jose sa nawung sang iya amay, kag naghibi sa iya, kag ginhalukan sia.

² Kag nagsogo si Jose sa mga manugbolong nga iya mga alagad nga embalsamahon ang iya amay. Gani gin-embalsamar si Israel sang mga manugbolong;

³ natuman sa iya ang kap-atan ka adlaw, kay sa sini natuman ang mga adlaw sang pag-embalsamar. Kag naghibi sa iya ang mga Egiptohanon sing kapitoan ka adlaw.

⁴ Kag sang nagligad ang mga adlaw sang paghaya sa iya, nagpamolong si Jose sa panimalay ni Faraon, nga nagasiling, “Kon karon nakapahamuut ako sa inyo sa inyo mga mata, ginaampo ko sa inyo, ipamolong sa mga idulungug ni Faraon, nga nagasiling,

⁵ Ang akon amay nagpasumpa sa akon, nga nagasiling, ‘Malapit na ako mapatay: sa akon lulubngan nga ginkutkut ko nga sa akon sa duta sang Canaan, didto ilubung mo ako.’ Busa karon, ginaampo ko sa imo, pataklara ako kag palubnga sang akon amay; niyan magabalik ako.”

⁶ Kag si Faraon nagsabat, “Taklad ka, kag ilubung ang imo amay, sono sa ginpasumpa niya sa imo.”

⁷ Gani si Jose nagtaklad sa paglubung sang iya amay; kag nagtaklad upud sa iya ang tanan nga alagad ni Faraon, ang mga tigulang sang iya panimalay, kag ang tanan nga tigulang sang duta sang Egipto,

⁸ subong man ang bug-os nga panimalay ni Jose, ang iya mga lalaking utud, kag ang panimalay sang iya amay; lamang ginbilin nila sa duta sang Gosen ang ila mga magamay, ang ila mga panong, kag ang ila kabakahan.

⁹ Kag nagtaklad upud sa iya ang mga kangga kag ang mga manugkabayo; tama kadaku yadtong kadam-an.

¹⁰ Sang nag-abut sila sa linasan ni Atad, nga yara sa unhan sang Jordan, nagpanalabiton sila didto sing tama gid kag mapait nga panalabiton; kag si Jose nagtangis sa iya amay sing pito ka adlaw.

¹¹ Sang nakita sang mga pumuluyo sang duta, ang mga Canaanhon, ang pagtangis sa linasan ni Atad, nagsiling sila, “Ini mapait nga pagtangis sa mga Egiptohanon.” Busa ginhingalanan ini Abel-misraim, ini sa tabok sang Jordan.

¹² Sa amo ginhimo sang iya mga anak sa iya sono sa ginsogo niya sa ila;

¹³ kay gindala sia sang iya mga anak sa duta sang Canaan, kag ginlubung sia sa lungib sa latagon sang Macpela, sa nasidlangan sang Mamre, nga ginbakal ni Abraham upud sang latagon, nga kaugalingon nga lulubngan, gikan kay Efron nga Hethanon.

¹⁴ Nagbalik si Jose sa Egipto upud ang iya mga utud kag ang tanan nga nagtaklad upud sa iya sa paglubung sang iya amay, sa tapus nga nalubung niya ang iya amay.

Ang Pagkapatay ni Jose

¹⁵ Sang nakita sang mga utud ni Jose nga ang ila amay patay na, nagsiling sila, “Ayhan dumtan kita ni Jose kag balusan kita sing bug-os sang tanan nga malaut nga ginhimo naton sa iya.”

¹⁶ Gani nagpadala sila sing balita kay Jose, nga nagasiling, “Ang imo amay nagsogo sa wala pa sia mapatay,

¹⁷ ‘Isiling kay Jose, Ginaampo ko sa imo, patawara ang paglapas sang imo mga utud kag ang ila sala, bangud nga naghimo sila sing malaut sa imo.’ Kag karon, ginaampo namon sa imo, patawara ang paglapas sang mga alagad sang Dios sang imo amay.” Si Jose naghibi sang nagpamolong sila sa iya.

¹⁸ Nagkadto man ang iya mga utud kag naghapa sa atubangan niya, kag nagsiling, “Yari karon, kami imo mga alagad.”

¹⁹ Apang si Jose nagsiling sa ila, “Dili kamo mahadluk, kay yari bala ako sa duug sang Dios?

²⁰ Nahanungud sa inyo, naghunahuna kamo sing malaut batok sa akon; apang gintuyo ini sang Dios sa kaayohan, sa pagpahanabu, subong sang sa sining adlaw, sa pagbuhi sing madamu nga katawohan.

²¹ Gani dili kamo mahadluk; ako magasagud sa inyo, kag sa inyo mga magamay.” Sa amo ginpasalig sila niya kag ginlipay sila.

²² Gani nagpuyo si Jose sa Egipto, sia kag ang panimalay sang iya amay; kag si Jose nagkabuhi sing isa ka gatus kag napulo ka tuig.

²³ Kag nakita ni Jose ang mga anak ni Efraim sa ikatlo nga kaliwatan; ang kabataan man ni Maquir nga anak nga lalaki ni Manases natawo sa mga tuhud ni Jose.

²⁴ Kag si Jose nagsiling sa iya mga utud, “Malapit na ako mapatay; apang ang Dios magaduaw sa inyo, kag magapataklad sa inyo gikan sining duta pakadto sa duta nga ginsumpa niya kay Abraham, kay Isaac, kag kay Jacob.”

²⁵ Niyan si Jose nagpasumpa sa mga anak ni Israel, nga nagasiling, “Ang Dios magaduaw sa inyo, kag dalha ninyo gikan diri ang akon mga tul-an.”

²⁶ Gani napatay si Jose, nga isa ka gatus kag napulo ka tuig; kag gin-embalsamar sia nila, kag ginsulud sia sa lungon sa Egipto.