Genesis 40 - Ang Biblia (1982)

Si Jose Nagapatpat sang mga Damgo sang mga Binilanggo

¹ Sa tapus sining butang, ang manugtagay sang hari sang Egipto kag ang iya manugtinapay nagpaakig sa ila ginoo nga hari sang Egipto.

² Kag nagsingkal si Faraon batok sa iya duha ka manugdumala, sa puno sang mga manugtagay kag sa puno sang mga manugtinapay,

³ kag ginsulud sila niya nga binilanggo sa balay sang pangolo sang bantay, sa bilanggoan diin si Jose nabilanggo.

⁴ Gintugyan sila sang pangolo sang bantay kay Jose, kag sia nag-alagad sa ila; kag nabilanggo sila sing pila ka adlaw.

⁵ Kag sila nga duha—ang manugtagay kag ang manugtinapay sang hari sang Egipto, nga nabilanggo sa bilanggoan—nagdamgo sa isa ka gab-i, ang tagsatagsa sa iya damgo, kag ang tagsa ka damgo sono sa iya kahologan.

⁶ Sang si Jose nagsulud sa ila sang pagkaaga kag nakita sila, natublag sila.

⁷ Gani nagpamangkot sia sa mga manugdumala ni Faraon nga upud sa iya sa bilanggoan sa balay sang iya agalon, “Ngaa bala masubu gid kamo karon nga adlaw?”

⁸ Nagsiling sila sa iya, “Nagdamgo kami, kag wala sing bisan sin-o nga makapatpat sini.” Kag si Jose nagsiling sa ila, “Indi bala iya sang Dios ang mga pagpatpat? Isugid sila sa akon, ginaampo ko sa inyo.”

⁹ Gani ang puno sang manugtagay nagsugid kay Jose sang iya damgo, kag nagsiling sa iya, “Sa akon damgo may isa ka balagon sa atubangan nakon,

¹⁰ kag sa balagon may tatlo ka sanga; sang pagpanalingsing niya, namulak sia, kag ang iya mga pinungpung nagdala sing mga uvas nga luto.

¹¹ Ang tagayan ni Faraon nakaptan ko; kag nagkuha ako sang mga uvas kag ginpuga sila sa tagayan ni Faraon, kag ginhatag ang tagayan sa kamut ni Faraon.”

¹² Niyan nagsiling sa iya si Jose, “Ini amo ang iya kahologan: ang tatlo ka sanga amo ang tatlo ka adlaw;

¹³ sa sulud sang tatlo pa ka adlaw bayawon ni Faraon ang imo olo kag iuli ikaw sa imo palangakuan; kag magahatag ka kay Faraon sang iya tagayan, sono sa unang bagay sang ikaw manugtagay niya.

¹⁴ Apang dumduma ako, kon sa kaayohan ka na, kag ginaampo ko sa imo, magkalooy ka sa pagmitlang sa akon kay Faraon, kag gani magpagowa sa akon gikan sining balay.

¹⁵ Kay sa pagkamatuud ginkawat ako gikan sa duta sang mga Hebreo; kag diri man wala ako sing ginhimo nga bisan ano nga ibutang nila ako sa bilanggoan nga madulum.”

¹⁶ Sang nakita sang puno sang mga manugtinapay nga ang kahologan maayo, nagsiling sia kay Jose, “Ako man may damgo: may tatlo ka alat nga sa kalan-onon sa ibabaw sang akon olo,

¹⁷ kag sa naibabaw gid nga alat may tanan nga bagay sang nabibingka nga kalan-on nga kay Faraon, apang ang kapispisan nagakaon sini gikan sa alat sa akon olo.”

¹⁸ Kag si Jose nagsabat, “Ini amo ang iya kahologan: ang tatlo ka alat amo ang tatlo ka adlaw;

¹⁹ sa sulud sang tatlo pa ka adlaw bayawon ni Faraon ang imo olo—gikan sa imo!—kag bitayon ka sa kahoy; kag ang kapispisan magakaon sang imo unud gikan sa imo.”

²⁰ Sa ikatlong adlaw, nga kaadlawan ni Faraon, naghiwat sia sing tabad sa tanan niyang alagad, kag ginbayaw niya ang olo sang puno nga manugtagay kag ang olo sang puno nga manugtinapay sa tunga sang iya mga alagad.

²¹ Gin-uli niya sa iya pagkamanugtagay ang puno nga manugtagay, kag naghatag sia sang tagayan sa kamut ni Faraon;

²² apang ginpabitay niya ang puno nga manugtinapay, sono sa napatpat ni Jose sa ila.

²³ Apang ang puno nga manugtagay wala makadumdum kay Jose, kondi nalipatan sia.