Genesis 15 - Ang Biblia (1982)

Isa ka Anak nga Lalaki Ginsaad kay Abram

¹ Sa tapus sining mga butang nag-abut ang polong sang Ginoo kay Abram sa palanan-awon, “Dili ka mahadluk, Abram, Ako ang imo taming; ang balus sa imo mangin tama kadaku.”

² Apang si Abram nagsiling, “O Ginoong Dios, ano bala ang ihatag mo sa akon, kay nagapadayon nga wala ako sing anak, kag ang manunubli sang akon balay amo si Eliezer nga taga-Damasco?”

³ Kag si Abram nagsiling, “Yari karon, wala mo ako paghatagi sing kaliwat; kag ang ulipon nga natawo sa akon balay mangin-akon manunubli.”

⁴ Kag yari karon, ang polong sang Ginoo nag-abut sa iya, “Ini nga tawo indi mangin-imo manunubli; ang imo kaugalingon nga anak nga lalaki mangin-imo manunubli.”

⁵ Kag gindala niya sia sa gowa kag nagsiling, “Tanglaa ang langit, kag isipa ang kabitoonan, kon sarang mo sila maisip.” Niyan nagsiling sia sa iya, “Mangin-subong sini ang imo mga kaliwatan.”

⁶ Kag nagtoo sia sa Ginoo; kag gin-isip ini sa iya nga sa pagkamatarung.

⁷ Kag nagsiling sia sa iya, “Ako ang Ginoo nga nagpagowa sa imo sa Ur sang mga Caldeanhon, sa paghatag sa imo sining duta nga panublion.”

⁸ Apang nagsiling sia, “O Ginoong Dios, sa ano ko bala makilala nga panublion ko ini?”

⁹ Nagsiling sia sa iya, “Kuhai ako sing isa ka bakiya nga baka nga tatlo ka tuig, isa ka kanding nga babayi nga tatlo ka tuig, isa ka carnero nga tatlo ka tuig, isa ka tukmo, kag isa ka kuyabog nga salampati.”

¹⁰ Kag nagkuha sia sini tanan nga mga butang nga sa iya, ginpihak sila, kag ginbutang ang tagsa ka pihak sa tampad sang pihak; apang wala niya pagpihaka ang mga pispis.

¹¹ Kag sang ang mga pispis nga mananagit nagsanggit sang inihaw nga mga lawas, gintabog sila ni Abram.

¹² Sang nagahinunud ang adlaw, nag-abut kay Abram ang hamook nga katologon; kag yari karon, isa ka kakugmat kag dakung kadudulman nag-abut sa iya.

¹³ Niyan nagsiling ang Ginoo kay Abram, “Kilalaha sing matuud nga ang imo mga kaliwatan magamanlulugayaw sa duta nga indi ila, kag magaalagad didto, kag sila sakiton sing apat ka gatus ka tuig;

¹⁴ apang yadtong pungsud nga alagdon nila, hukman ko, kag sa olihi magagowa sila nga may dakung pagkabutang.

¹⁵ Apang magasimpon ka sa imo mga ginikanan sa paghidait; ilubung ka sa maayo nga katigulangon.

¹⁶ Kag sa ikap-at nga kaliwatan magabalik sila diri; kay wala pa mapuno ang kalautan sang mga Amornon.”

¹⁷ Sang natunud ang adlaw kag madulum na, yari karon, isa ka horno nga nagaaso kag isa ka sulo nga nagadabdab nag-agi sa tunga sining mga pinihak.

¹⁸ Sa sadtong adlaw ang Ginoo nagpakigkatipan kay Abram, nga nagasiling, “Sa imo mga kaliwatan ginahatag ko ining duta, kutub sa suba sang Egipto tubtub sa suba nga daku, ang suba nga Eufrates,

¹⁹ ang duta sang mga Cenhanon, mga Cenisnon, mga Kadmonhon,

²⁰ mga Hethanon, mga Pereznon, mga Refaimnon,

²¹ mga Amornon, mga Canaanhon, mga Gergesnon kag mga Jebusnon.”