Genesis 12 - Ang Biblia (1982)

Ang Pagtawag sang Dios kay Abram

¹ Karon ang Ginoo nagsiling kay Abram, “Halin ka sa imo duta kag sa imo kahimataan kag sa balay sang imo amay pakadto sa duta nga akon igapakita sa imo.

² Kag himoon ko gikan sa imo ang isa ka pungsud nga daku, kag pakamaayohon ko ikaw, kag padakuon ang imo ngalan, kag manginpagpakamaayo ikaw.

³ Pakamaayohon ko ang mga nagapakamaayo sa imo, kag ang nagapakamalaut sa imo pakamalauton ko; kag sa imo pakamaayohon ang tanan nga mga panimalay sang duta.

⁴ Gani naglakat si Abram, sono sa napamolong sa iya sang Ginoo; kag nag-upud sa iya si Lot. Si Abram kapitoan kag lima ka tuig sang pagtaliwan niya sa Haran.

⁵ Kag gindala ni Abram si Sarai nga iya asawa, kag si Lot nga anak sang iya utud, kag ang tanan nga pagkabutang nila nga ila natipon, kag ang mga kalag nga ila naangkon sa Haran; kag naglakat sila sa pagkadto sa duta sang Canaan. Sang nag-abut sila sa duta sang Canaan,

⁶ si Abram naglatas sa duta pakadto sa duug sang Siquem, sa terebinto sang More. Sa sadtong tion ang mga Canaanhon yara pa sa duta.

⁷ Niyan ang Ginoo nagpahayag kay Abram, kag nagsiling, “Sa imo kaliwat ihatag ko ining duta.” Gani nagpatindug sia didto sing halaran sa Ginoo, nga nagpahayag sa iya.

⁸ Nagliton sia gikan didto pakadto sa bukid sa sidlangan sang Bet-el, kag nagpatindug sang iya layanglayang, nga ang Bet-el sa katundan kag ang Ai sa sidlangan; kag nagtukud sia didto sing halaran sa Ginoo kag nagpanawag sa ngalan sang Ginoo.

⁹ Kag si Abram nagpanlakatan, nga nagapakadto pa nayon sa Bagatnan.

Si Abram sa Egipto

¹⁰ Karon may tiggulutum sa duta. Gani nagdulhog si Abram sa Egipto sa pagpabilin didto, kay matama ang tiggulutum sa duta.

¹¹ Sang naghinamput sia sa Egipto, nagsiling sia kay Sarai nga iya asawa, “Ginakilala ko nga ikaw babayi nga maanyag tolokon;

¹² kag kon makita ka sang mga Egiptohanon, magasiling sila, ‘Ini asawa niya’; niyan patyon nila ako, apang ikaw hilwayon nila nga buhi.

¹³ Isiling ikaw akon utud nga babayi, agud nga magmaayo sa akon tungud sa imo, kag nga magkabuhi ang akon kalag bangud sa imo.”

¹⁴ Sang nakasulud si Abram sa Egipto nakita sang mga Egiptohanon nga ang babayi tama kaanyag.

¹⁵ Kag sang nakita sia sang mga principe ni Faraon, gindayaw sia kay Faraon. Kag gindala ang babayi sa balay ni Faraon.

¹⁶ Kag tungud sa iya si Faraon naghimo sing maayo kay Abram; kag may mga carnero sia, mga baka, mga asno nga lalaki, mga ulipon nga lalaki, mga ulipon nga babayi, mga bakiya nga asno, kag mga camelyo.

¹⁷ Apang gindautan sang Ginoo si Faraon kag ang iya panimalay sang dalagku nga mga kalalat-an bangud kay Sarai, asawa ni Abram.

¹⁸ Gani gintawag ni Faraon si Abram, kag nagsiling, “Ano bala ining ginhimo mo sa akon? Ngaa bala nga wala mo ako sugiri nga sia imo asawa?

¹⁹ Ngaa bala nga nagsiling ka, ‘Utud ko sia,’ sa bagay nga ginkuha ko sia nga mangin-akon asawa? Busa karon, yara ang imo asawa, kuhaa sia, kag lakat ka.”

²⁰ Kag si Faraon nagtulin sa mga tawo nahanungud kay Abram; kag gindulong nila sia, upud ang iya asawa kag ang tanan nga iya.