Exodus 38 - Ang Biblia (1982)

Ang Halaran sang Halad-nga-Sinonog

¹ Ginhimo niya gikan sa kahoy nga acasia ang halaran sang halad-nga-sinonog; lima ka maniko ang iya kalabaon, kag lima ka maniko ang iya kasangkaron; kasilo, kag tatlo ka maniko ang iya kataason.

² Ginhimo niya ang mga sungay sini sa iya apat ka pamusud; ang iya mga sungay unay sa iya, kag gintaklapan niya ini sing saway.

³ Kag ginhimo niya ang tanan nga gamit sang halaran, ang mga alabohan, ang mga pala, ang mga batiya, ang mga kaw-it sa unud, kag ang mga bagahan: ang tanan niya nga gamit ginhimo niya sila gikan sa saway.

⁴ Kag naghimo sia nga sa halaran sing isa ka saladang nga saway sa buhat nga pinuna, sa idalum sang pamibig palibut sa sulud, nga nagalambut tubtub sa katunga paibabaw.

⁵ Nagbasia sia sing apat ka argolya nga sa apat ka pamusud sang saladang nga saway nga goloan sang mga yayongan;

⁶ naghimo sia sang mga yayongan gikan sa kahoy nga acasia, kag gintaklapan sila sing saway.

⁷ Kag gingolo niya ang mga yayongan sa mga argolya sa mga kilid sang halaran, sa pagdala sini; ginhimo niya ini nga guyko, nga may dagpak nga mga tapi.

Ang Batiya

⁸ Kag ginhimo niya ang batiya gikan sa saway, kag ang iya tulungtungan gikan sa saway, gikan sa mga salaming sang alagad nga mga babayi nga nag-alagad sa ganhaan sang layanglayang nga tiliponan.

Ang Luwang sang Kayangkayang

⁹ Kag ginhimo niya ang luwang; sa kilid nga nabagatnan nayon sa bagatnan ang mga bungbung lino nga manipis nga binolong, isa ka gatus ka maniko;

¹⁰ ang ila mga haligi duha ka pulo kag ang ila mga boho nga palatindugan duha ka pulo nga naaporohan sing saway, apang ang mga panga sang haligi kag ang ila mga pikit sa liogliog pilak.

¹¹ Kag sa kilid nga naaminhan, isa ka gatus ka maniko, ang ila mga haligi duha ka pulo, kag ang ila mga boho nga palatindugan duha ka pulo nga naaporohan sing saway, apang ang mga panga sang mga haligi kag ang ila mga pikit sa liogliog pilak.

¹² Kag sa kilid nga nakatundan ang mga bungbung kalim-an ka maniko, ang ila haligi napulo, kag ang ila mga boho nga palatindugan napulo; ang mga panga sang mga haligi kag ang ila mga pikit sa liogliog pilak.

¹³ Kag sa kilid nga nasidlangan nayon sa sidlangan, kalim-an ka maniko.

¹⁴ Ang mga bungbung sa isa ka kilid sang gawang napulo kag lima ka maniko, ang ila mga haligi tatlo kag ang ila mga boho nga palatindugan tatlo.

¹⁵ Kag amo ini sa pihak nga kilid; sa sining bahin kag sa sinang bahin sang gawang sang luwang ang mga bungbung napulog lima ka maniko, ang ila mga haligi tatlo kag ang ila mga boho nga palatindugan tatlo.

¹⁶ Ang tanan nga bungbung sang luwang palibut lino nga manipis nga binolong.

¹⁷ Kag ang mga boho nga palatindugan sang mga haligi naaporohan sing saway, ang mga panga sang mga haligi kag ang ila mga pikit sa liogliog pilak; ang mga taklap sang ila mga oloolo pilak, kag ang tanan nga haligi sang luwang napikitan sa liogliog sing pilak.

¹⁸ Kag ang lipon sa gawang sang luwang buhat sang manugborda sa asul kag sa purpura kag sa escarlata kag sa lino nga manipis nga binolong; ang kalabaon duha ka pulo ka maniko kag ang kataason sa kasangkaran lima ka maniko, sono sa mga bungbung sang luwang.

¹⁹ Kag ang ila haligi apat; ang ila apat ka boho nga palatindugan naaporohan sing saway, ang ila mga panga pilak, kag ang taklap sang ila mga oloolo kag ang ila mga pikit sa liogliog pilak.

²⁰ Kag ang tanan nga palpal sang kayangkayang kag sang luwang sa palibut saway.

Ang Pagtatap sang Buluhaton

²¹ Amo ini ang kadamuon sang mga butang nga sa kayangkayang, ang kayangkayang sang pagpamatuud, sang gin-isip sila sono sa sogo ni Moises, nga sa pag-alagdan sang mga Levinhon sa kamut ni Itamar nga anak ni Aaron nga sacerdote.

²² Ginhimo ni Bezalel nga anak ni Uri, ang anak ni Hur, sang kabikahan ni Juda, ang tanan nga ginsogo sang Ginoo kay Moises;

²³ kag upud sa iya si Oholiab nga anak ni Ahisamac, sang kabikahan ni Dan, isa ka manuggutib kag sampaton nga manugbuhat kag manugborda sa asul kag sa purpura kag sa escarlata kag sa lino nga manipis.

Ang Metal sang Santuario

²⁴ Ang bug-os nga bulawan nga gingamit nga sa buluhaton, sa tanan nga paghimo sang santuario, ang bulawan sang dolot, duha ka pulo kag siam ka talanton kag pito ka gatus kag katloan ka siclo, sono sa siclo sang santuario.

²⁵ Kag ang pilak nga ila sang katilingban nga naisipan isa ka gatus ka talanton kag isa ka libo kag pito ka gatus kag kapitoan kag lima ka siclo, sono sa siclo sang santuario:

²⁶ isa ka beka sa tagsa ka tawo (nga amo, ang katunga sang isa ka siclo, sono sa siclo sang santuario), sa tagsatagsa nga naisipan, kutub sa duha ka pulo ka tuig kag paibabaw, nga sa anum ka gatus kag tatlo ka libo, lima ka gatus kag kalim-an ka lalaki.

²⁷ Ang isa ka gatus ka talanton nga pilak gingamit nga sa pagbasia sang mga boho nga palatindugan sa santuario, kag sa mga boho nga palatindugan sang kumbung; isa ka gatus ka boho sa isa ka gatus ka talanton, isa ka talanton nga sa tagsa ka boho.

²⁸ Kag sa isa ka libo kag pito ka gatus kag kapitoan kag lima ka siclo naghimo sia sing mga panga nga sa mga haligi, kag gintaklapan niya ang ila mga oloolo kag naghimo sing mga pikit sa liogliog sa ila.

²⁹ Kag ang dolot nga saway kapitoan ka talanton, kag duha ka libo kag apat ka gatus ka siclo;

³⁰ sa ila ginhimo niya ang mga boho nga palatindugan sa ganhaan sang layanglayang nga tiliponan, kag ang halaran nga saway kag ang iya saladang nga saway kag ang tanan nga gamit sang halaran,

³¹ ang mga boho nga palatindugan sang luwang palibut, kag ang mga boho nga palatindugan sang gawang sang luwang, ang tanan nga palpal sang kayangkayang, kag ang tanan nga palpal sang luwang palibut.