Exodus 31 - Ang Biblia (1982)

Ang Pagtawag kay Bezalel kag kay Oholiab

¹ Ang Ginoo nagsiling kay Moises,

² “Tan-awa, gintawag ko sa ngalan si Bezalel nga anak ni Uri, ang anak ni Hur, sang kabikahan ni Juda:

³ kag ginpuno ko sia sang Espiritu sang Dios, sa kaalam kag sa paghangup, sa ihibalo kag sa tanan nga bagay sang buluhaton,

⁴ sa pagpadugi sing sinampaton nga mga buluhaton, sa pagsalsal sa bulawan, sa pilak, kag sa saway,

⁵ sa paglagari sang mga bato nga inugtampok, kag sa paggutib sang kahoy, sa pagpangabudlay sa tanan nga bagay sang buluhaton.

⁶ Kag yari karon, gintangdo ko upud sa iya si Oholiab, ang anak ni Ahisamac, sang kabikahan ni Dan; kag ginbutangan ko sing kaalam ang mga tagiposoon sang tanan nga sampaton, agud nga maghimo sila sang tanan nga ginsogo ko sa imo:

⁷ ang layanglayang nga tiliponan, kag ang kaban sang pagpamatuud, kag ang pakilooyan nga yara sa ibabaw sini, kag ang tanan nga gamit sang Layanglayang,

⁸ ang latok kag ang iya mga gamit, kag ang candelero nga bug-os pati ang tanan niyang gamit, kag ang halaran sang incienso,

⁹ kag ang halaran sang halad-nga-sinonog pati ang tanan niyang gamit, kag ang batiya kag ang iya tulungtungan,

¹⁰ kag ang mga panapton nga nahimo sing matahum, ang balaan nga mga panapton nga kay Aaron nga sacerdote kag ang mga panapton sang iya mga anak, sa pag-alagad sa pagkasacerdote,

¹¹ kag ang lana nga ihalaplas kag ang incienso nga mahamut nga sa balaan nga duug. Himoon nila sono sa ginsogo ko sa imo.”

Ang Inugpahuway subong nga Tanda

¹² Kag ang Ginoo nagsiling kay Moises,

¹³ “Isiling sa katawohan sang Israel, ‘Bantayan ninyo ang akon mga inugpahuway, kay tanda ini sa tunga nakon kag ninyo sa bug-os ninyong mga kaliwatan, agud nga mahibaloan ninyo nga Ako, nga Ginoo, nagapakabalaan sa inyo.

¹⁴ Bantayan ninyo ang inugpahuway, bangud nga balaan ini sa inyo; ang tagsatagsa nga nagapasipala sini patyon; ang bisan sin-o nga nagahimo sing bisan anong buluhaton sa iya, inang kalag utdon gikan sa tunga sang iya katawohan.

¹⁵ Sa anum ka adlaw himoon ang buluhaton; apang sa adlaw nga ikapito amo ang inugpahuway sang maligdong nga pahuway, balaan sa Ginoo; ang bisan sin-o nga nagahimo sing bisan anong buluhaton sa adlaw nga inugpahuway patyon.

¹⁶ Busa bantayan sang katawohan sang Israel ang inugpahuway, sa pagtuman sang inugpahuway sa bug-os nilang mga kaliwatan, subong nga katipan nga dayon.

¹⁷ Tanda ini sa gihapon sa tunga nakon kag sang katawohan sang Israel nga sa anum ka adlaw ginhimo sang Ginoo ang langit kag ang duta, kag sa ikapitong adlaw nagpahuway sia, kag nahaulian.’”

Ang Tinday nga Bulawan

¹⁸ Kag sang nakatapus sia sa pagpakighambal sa iya sa Bukid nga Sinai, ginhatag niya kay Moises ang duha ka tapitapi sang pagpamatuud, mga tapitapi nga bato, nga nasulatan sang tudlo sang Dios.