Esdras 5 - Ang Biblia (1982)

Ang Templo Natukud Liwat

¹ Karon ang mga manalagna, si Hageo nga manalagna kag si Zacarias nga lalaking anak ni Iddo, nagtagna sa mga Judio nga didto sa Juda kag sa Jerusalem, sa ngalan sang Dios sang Israel nga yara sa ibabaw nila.

² Niyan nagtindug si Zorobabel nga lalaking anak ni Sealtiel kag si Jesua nga lalaking anak ni Josadac kag nagsugud sa pagpatindug sang balay sang Dios nga yara sa Jerusalem; kag upud sa ila ang mga manalagna sang Dios, nga nagabulig sa ila.

³ Sa among tion nag-abut sa ila si Tatnai nga pangolo-puud sa Tabok sang Suba kag si Setar-boznai kag ang ila mga kaupdanan kag nagsiling sa ila sing subong sini, “Sin-o bala ang naghatag sa inyo sing mando sa pagpatindug sining balay kag sa pagtapus sining kuta?”

⁴ Nagpamangkut man sila sa ila sini, “Sin-o ang mga ngalan sang mga tawo nga nagabuhat sining balay?”

⁵ Apang ang mata sang ila Dios yara sa mga tigulang sang mga Judio, kag wala nila pagpauntata sila tubtub nga ang butang mag-abut kay Dario kag niyan ang sabat magbalik paagi sa sulat nahanungud sini.

⁶ Ang huwad sang sulat nga ginpadala ni Tatnai nga pangolo-puud sa Tabok sang Suba kag ni Setar-boznai kag sang iya mga kaupdanan nga mga Afarsacnon, nga didto sa Tabok sang Suba kay Dario nga hari;

⁷ nagpadala sila sing sulat sa iya, diin nasulat sing subong sini: “Kay Dario nga hari, ang bug-os nga paghidait.

⁸ Mahibaloan ini sang hari nga nagkadto kami sa puud sang Juda, sa balay sang dakung Dios. Ginpatindug ini nga may dalagkung mga bato, kag mga tablon nga napahamtang sa mga kuta; ining buluhaton nagapadayon sing makugihon kag nagauswag sa ila mga kamut.

⁹ Niyan nagpamangkot kami sa sadtong mga tigulang kag nagsiling sa ila sing subong sini, ‘Sin-o bala ang naghatag sa inyo sing mando sa pagpatindug sining balay kag sa pagtapus sining kuta?’

¹⁰ Ginpamangkot man namon ang ila mga ngalan, sa pagpamatuud sa imo, agud nga masulat namon ang mga ngalan sang mga tawong nagpangolo sa ila.

¹¹ Kag amo ini ang balus nila nga sabat sa amon: ‘Mga alagad kami sang Dios sang langit kag duta, kag nagapatindug sang balay nga ginpatindug sining madamu na nga tuig, nga ginpatindug kag gintapus sang dakung hari sang Israel.

¹² Apang sa tapus nga napasingkal sang amon nga ginikanan ang Dios sang langit, gintugyan niya sila sa kamut ni Nabucodonosor nga hari sang Babilonia, ang Caldeanhon, nga naglaglag sining balay kag nagdala sang katawohan sa Babilonia.

¹³ Apang sa nahaunang tuig ni Ciro nga hari sang Babilonia, si Ciro nga hari naghimo sing mando sa pagpatindug sining balay sang Dios.

¹⁴ Kag ang mga gamit man nga bulawan kag pilak sang balay sang Dios, nga ginkuha ni Nabucodonosor gikan sa templo nga yara sa Jerusalem kag ginpadala sa templo sang Babilonia, yadto sila ginkuha ni Ciro nga hari gikan sa templo sang Babilonia, kag gintugyan sila sa isa nga ang iya ngalan si Sesbasar, nga ginhimo niya nga pangolo-puud;

¹⁵ kag nagsiling sia sa iya, “Dalha ining mga gamit, lakat kag ibutang sila sa templo nga yara sa Jerusalem, kag ipatindug ang balay sang Dios sa iya duug.”

¹⁶ Niyan nag-abut ang among Sesbasar kag nagpasad sang mga sadsaran sang balay sang Dios nga yara sa Jerusalem; kag kutub sadtong tion tubtub karon ginapatindug ini, kag wala pa gihapon mahuman.’

¹⁷ Busa karon, kon maayo ini sa hari, ipausisa sa bahandian nga balay sang hari nga yara sa Babilonia, kon bala matuud ini nga si Ciro naghimo sing mando sa pagpatindug sining balay sang Dios sa Jerusalem. Kag ang hari magpadala sa amon sang iya nahamut-an nahanungud sining butang.”