Yoane 9 - Amashiwi Aba Lesa

¹ Lomba ili ŵalukupita, ŵalibwene umuntu uwafyelwe ŵumpofu.

² Peŋka aŵasambile ŵaŵo ŵaliŵepwisye ati: MweŵaLabi, mbaninani uwaŵifisye, pakuti uyu-muntu alifyelwe ŵumpofu? Kani niwuyu umwine kani ŵamufyele?

³ Naŵo ŵaYesu nekwasuka ati: Taali umwine uwaŵifisye, neli ŵamufyele taŵaŵifisye; sombi alifyalilwe'fyo ati imilimo yaŵaLesa ikabwenekesye muli ye.

⁴ Tucite imilimo yaŵaŵo aŵantumine ili paciswetele, pakuti uŵusiku ŵulukwila, apo tapali umuntu uwisi ukucita-po imilimo.

⁵ Ili nciikele mucalo capansi, nineKutuŵa ukwamucalo.

⁶ Pakweŵa ati ŵalaŵile'fyo ŵalisipile amate pansi peloŵa nekucita' matipa, amatipa ayo nekwisiŋga mumenso iyompofu,

⁷ nekulaŵila kuli yo ati: Koya, usambe pesiŵa lyaSiloami, (isiwi ilyo pakwaluka ati Lilituminwe). Lomba aliile, nekusamba, nekubwela ili alaŵa bwino.

⁸ Peŋka aŵenesi ŵakwe naŵaŵo aŵalukumuŵona akale ati alukulomba-lomba lukoso, ŵalilaŵile ati: Kansi uyu tewoyo uwalukwikala ukulukulomba-lomba lukoso?

⁹ Ŵambi ati: Ewopele. Ŵambi naŵo ati: Koku, sombi ŵalipalene lukoso. Sombi umwine ati: Eneŵo wopele,

¹⁰ Pakuti pali fyefyo aŵo ŵalilaŵile kuli ye ati: Nikundo lomba asiŵulwa amenso oŵe?

¹¹ Naye nekwasuka ati: Uyo-muntu uwilicilwe ati niYesu ewacita'matipa, nekunsiŋga kumenso, nekulaŵila kuli neŵo ati—Koya kuSiloami, usambe. Eli niŋgaya, niŋgasamba, niŋgalawa.

¹² Naŵo nekumwipusya ati: Mboyo ali kulipi? Naye ati: Nsiisi-po.

¹³ Lombo'yo uwali nimpofu akale ŵalimutwite kuŵaFalisi.

¹⁴ Ako-kasuŵa ŵacitile-po ŵaYesu amatipa ukumusiŵula amenso, kasuŵa kasabata.

¹⁵ Pakuti pali fyefyo aŵaFalisi ŵalimwipwisye liŵili ati: Mbaweŵo walaŵa syani? Naye nekuŵaŵula ati: Matipa ansinjile mumenso, eli niŋgasamba, niŋgalawa.

¹⁶ Lomba aŵo-ŵaFalisi ŵambi ŵalilaŵile ati: Uyu-muntu taatulile kuli ŵaLesa, pakuti taalukutonda sabata. Sombi ŵambi naŵo ati: Mbomuntu uwakuŵifya aliisi syani ukucito'twisiŵilo utwakuŵe'fi? Peŋka paliŵele nemupaka uwakupicisya pakati pali ŵo.

¹⁷ Lomba ŵalimwipwisye liŵili uyo uwali nimpofu ati: Mbaweŵo ulukumweŵa syani uyo, pakuti akusiŵula amenso oŵe? Naye ati: Wakusimika.

¹⁸ Sombi aŵaJuda taŵalukucetekele' fyakwe ati ali nimpofu, kaŵili alaŵa, ili tawaŋgaweta aŵamufyele uyo uwasibwilwe,

¹⁹ nekuŵepusya ati: Kani cine uyu mwana wenu, umulukweŵa ati alifyelwe nimpofu? Mbefyo alaŵa syani ŵukumo?

²⁰ Peŋka aŵamufyele nekwasuka ati: Tuliisi ati uyu mwana wesu, kaŵili ati alifyelwe niŵumpofu:

²¹ sombi tatwisi ifi alaŵa ŵukumo, neli muntu uwamusibwile tatumwisi: ŋgamumwipusye, umwine mukulu, ŋgaalilawilile.

²² Aŵamufyele ŵalilaŵilile'fyo pakuti pakutina' ŵaJuda, pakuti lomba aŵaJuda kale ŵasuminansyenye ati: Kani umbi akasuminisye ati uyo niKlistu, akaposiwa mwisunagoge.

²³ Pakuti pali fyefyo efi ŵalaŵilile aŵamufyele ati—Mwipusyeni umwine, naye mukulu.

²⁴ Peŋka ŵalimwitile liŵili uyo uwali nimpofu, nekumuŵula ati: Koŵapela ŵaLesa uŵuleme; pakuti tuliisi ati uyomuntu nimbifi.

²⁵ Naye lomba nekwasuka ati: Kani nimbifi nsiisi-po; icintu cimo eco njisi, ati nali nimpofu, ŵukumo ndukulaŵa.

²⁶ Naŵo peŋka ŵalimwipwisye ati: Alikucitile syani lomba? Mbaalikusibwile syani amenso oŵe?

²⁷ Naye nekuŵaasuka ati: Namuŵuleni ŵukumo, tamumfwile! Mbanindo mulukufwailo'kufyumfwa liŵili? Kani namweŵo mulukufwayo'kuŵa ŵasambile ŵakwe?

²⁸ Peŋka walimutoŋgawile nekulaŵila ati: Weŵo ewemusambile wakwe, sombi fweŵo tuli ŵasambile ŵakwe Mose.

²⁹ Tuliisi ati ŵaLesa ŵalukulaŵila kuli Mose; sombi uyo-muntu tatumwisi ukwafumine.

³⁰ Naye umuntu uyo nekuŵaasuka ati: Ala! lei cakukaŋkamana ati mweŵo tamwisi ukwafumine uyo; kaŵili alinsibwile neŵo amenso!

³¹ Tuliisi ati ŵaLesa taŵomfwa aŵakuŵifya; sombi aŵantu ŵonse, ulukuŵacindika ŵaLesa, nekulukulondo'kufwaya kwaŵo, uyo ŵaLesa ŵalamumfwa.

³² Ukufuma kukuleŋgwa kwacalo takwaumfwanicile ati pali uwasibwile uwafyelwe nimpofu!

³³ Uyo-muntu, ŋga taatulile kuli ŵaLesa, ŋga taalukucita-po neli kantu.

³⁴ Naŵo nekumwasuka ati: Weŵo walifyalilwe lukoso mufyakuŵifya; lomba ulukutusambisya fweŵo? Peŋka'po ŵalimuposesye.

³⁵ ŴaYesu ŵaliumfwile ati ŵamuposya, lomba ŵo nekumusaŋgana, nekumwipusya ati: Kani weŵo ulukucetekela muMwana waMuntunsi?

³⁶ Naye nekwasuka ati: Mboyo ninani Sikulu, ati njisiŵe ukucetekela muli ye?

³⁷ ŴaYesu nekumwasuka ati: Ulimubwene, kaŵili eye ulukwambala nakwe.

³⁸ Naye ati: MweŵaSikulu, ndukucetekela. Lomba ye nekuŵalambila.

³⁹ Naŵo ŵaYesu ŵalilaŵile ati: Ndiisile muno mucalo capansi mukusololola, ati aŵo aŵataŵalukulaŵa, ŵakalaŵe; naŵaŵo aŵalukulaŵa, ati ŵakaŵe nimpofu.

⁴⁰ Peŋka aŵaFalisi aŵo ali naŵo ŵaliumfwile' fyo, nekulawila kuli ŵo ati: Kani nafweŵo tuli nimpofu?

⁴¹ ŴaYesu ŵaliŵaasucile ati: Ŋga muli nimpofu, ŋga tamukwete ukuŵifya; sombi mulukulieŵa ati tulukulawa, peŋka ukuŵifya kwenu lomba kuciikele.