Yoane 8 - Amashiwi Aba Lesa

¹ Sombi ŵaYesu ŵaliile kulupili lwaMaolife.

² Ŋgamailo ulucelocelo ŵaliisile liŵili kwitempuli, lomba aŵantu ŵonse ŵaliisile kuli ŵo; naŵo ŵaliikele pansi nekuŵasambisya.

³ Peŋka aŵalembesi neŵaFalisi ŵaliletele umwanakasi uwaikatilwe ili alukucito'wucende; peŋka pakumwikalika pakati keŵumba,

⁴ ŵalilaŵile kuli ŵaYesu ati: MweŵaSambisi, uyu-mwanakasi aikatilwa ili alukucito'ŵucende;

⁵ peŋka Mose alituŵulile mumafunde akwe ati, aŵakuŵe'fi muŵapamale amabwe: mbamweŵo mulukumulaŵilila syani?

⁶ Sombi ŵalilaŵile lukoso ifyo, pakuti pakuŵesya, ati ŵaŵone ifyakuŵasinina. Sombi ŵaYesu ŵaliineme lukoso ukulukulemba peloŵa kumunwe.

⁷ Sombi pakulukuŵepusisya liŵili liŵili ŵo ŵaliinucile, nekulaŵila kuli ŵo ati: Pali mweŵo uyo utaakwete-fyakuŵifya ataŋge-ko ukumupose'bwe!

⁸ Peŋka ŵaliineme liŵili ukulukulemba peloŵa kumunwe.

⁹ Naŵo, pakumfwe'fyo, nekupamwa muli ŵacimaŋga ŵaŵo, ŵalifumine umo umo, ukutatika kumukulu-ŵantu nekufika nakuŵakupela-ko; nekusyala ŵaYesu ŵeŋka nemwanakasi uyo uwaimakene pakati.

¹⁰ Eli ŵainucile ŵaYesu, nekulaŵila kuli ye ati: Wemwanakasi, mbaŵali kulipi? Tapali-po uwakukusinina?

¹¹ Naye ati: Papa neli umo, Sikulu. Lomba ŵaYesu ati: Naneŵo, tesi ŋkusinine-po; koya, tekubwesya-mo liŵili ukuŵifya.

¹² Nakaŵili ŵaYesu ŵalilaŵile kuŵantu ati: Neŵo enekutuŵa ukwamucalo capansi. Uyo uwakundonda neŵo taakenda mumfinsi, sombi akalukwikele nekutuŵa kwamweo.

¹³ Pakuti pali fyefyo aŵaFalisi ŵalilaŵile kuli ŵo ati: Mweŵo mulukulisimicila mweŵene; lomba ukusimika kwenu takuli kwacine.

¹⁴ Sombi ŵaYesu waliwaasucile ati: Naŋgaŵa ati ndukulisimicila nemwine, ukusimika kwanji kwacine: pakuti ndiisi-ko uku nafumine, nakoko uku ndukuya; sombi mweŵo tamwisi-ko uku mfumine, neli nikoko uku ndukuya.

¹⁵ Mweŵo mulesya ukwamunefu kweŋka: neŵo nsiesya-po aŵantu neli umo.

¹⁶ Cine naŋkesye, ukwesya kwanji kwacine; pakuti nsili neŋka, sombi ndi naŵo ŵaTata aŵantumine.

¹⁷ Icine, namumafunde mulilembelwe ati ukusimika kwamboni siŵili kulaŵa-po kwacine.

¹⁸ Neŵo enendukulisimicila; nakaŵili ŵaTata aŵantumine naŵo ŵalukusimika ifyakuli neŵo.

¹⁹ Pakuti pali fyefyo aŵo ŵaliŵepwisye ati: MbaŵaWiso ŵali kulipi? Kumfwa ŵaYesu ati: Tamunjisi neŵo, naŵaTata tamuŵesi: ŋga mulinjisi neŵo ŋga muliŵesi naŵaTata.

²⁰ Amasiwi ayo ŵalialaŵilile mucipinda icakuŵicilamo amaŵoni, pakusambisya mwitempuli; sombi tapali-po umuntu uwaŵekete-po, pakuti impindi yaŵo lomba taiŋgatika.

²¹ Peŋka ŵalilaŵile liŵili kuli ŵo ati: Ŋkakumbuluka; lomba mweŵo mukalukumfwaya-fwaya; sombi mukafwilamo mukuŵifya kwenu: uko uku ŋkaya neŵo, tamukesiŵa' mweŵo ukwisa-ko.

²² Pakuti pali fyefyo aŵaJuda ŵalilaŵile ati: Kani akaJiipaya? pakuti alukulaŵila ati—Uko uku ŋkaya neŵo, tamukesiŵa mweŵo ukwisa-ko.

²³ Naŵo ŵalilaŵile kuli ŵo ati: Mweŵo mulitulile pansi; neŵo nditulile kwiulu; mweŵo muli ŵamucalo cino; neŵo nsili wamucalo cino.

²⁴ Pakuti pali fyefyo epo nalaŵilila kuli mweŵo ati—Mukafwila-mo mukuŵifya kwenu; pakuti kani tamulukucetekela ati NDI, icine mukafwila-mo mukuŵifya kwenu.

²⁵ Peŋka kaŵalaŵila kuli ŵo ati: Mbamwe nimweŵanani? Kumfwa ŵaYesu kaŵaŵeŵa ati: Ndi wopele uyo unalukumuŵuleni napakutaŋga.

²⁶ Ifyeŵo ifinji ifyakuli mweŵo ndi nafyo ifyakulaŵila nekusololola; sombi aŵo aŵantumine eŵacine; kaŵili ndukulaŵila kuŵantunsi ifyeŵo ifyo ifi naumfwile kuli ŵo.

²⁷ Sombi aŵantu aŵo taŵaisiŵile-po ati ŵalukweŵa ifyaŵaWisi.

²⁸ Pakuti pali fyefyo ŵaYesu ati: Ili mukamusuntula Umwana waMuntunsi, elyo mukesiŵa ati neŵo NDI; kaŵili ati nsilukucita-kantu neŋka: sombi koti nifyopele'fyo ifi ŵansambisye ŵaTata, efi ndaŵila.

²⁹ Kaŵili aŵo aŵantumine ŵali naneŵo; taŵandekele neŋka lukoso; pakuti ndacita impindi yonse ifyakuŵatemwesya.

³⁰ Lomba pakulaŵile'fyo aŵantu aŵenji ŵaliŵacetekele.

³¹ Pakuti pali fyefyo ŵaYesu ŵalilaŵile kuli ŵaŵo-ŵaJuda aŵacetekele kuli ŵo ati: Kani mulukwikala mumasiwi anji, muli ŵasambile ŵanji icine;

³² kaŵili mukalukwisiwa ŵucine, naŵo ŵucine ŵukamukakululeni.

³³ Naŵo ŵaliŵaasucile ati: Sombi fweŵo tuli ŵana ŵakwe Ablaamu, tatuŋgatekwa-po insiku syonse kuŵantu ŵonse neli umo; mbanindo mweŵo mulukulaŵilila ati—Mukakakululwa?

³⁴ ŴaYesu naŵo nekuwaasuka ati: Cine cine, ndukumuŵuleni ati: A ŵantu ŵonse ulukucita ŵumbifi, uyo musya waŵumbifi.

³⁵ Sombi umusya taekalilila muŋanda, koku; umwana ewikalilila.

³⁶ Peŋka kani Umwana akamukakululeni, mukalukukakulucile icine.

³⁷ Ndiisi ati muli ŵana ŵakwe Ablaamu; sombi mulukufwayo'kunjipaya; pakuti amasiwi anji taabwene injikalilo mumitima yenu.

³⁸ Ifyo ifi nalukuŵona kuli wa'Tata, efi ndaŵila; fyopele'fyo namweŵo ifyo ifi mwalukumfwa kuli ŵawisinwe, efi mucita.

³⁹ Naŵo ŵaliŵaasucile nekulaŵila ati: Wisifwe niAblaamu. ŴaYesu nekulaŵila kuli ŵo ati: Ŋga muli ŵana ŵakwe Ablaamu, ŋga mulukucita ifyakucita fyakwe Ablaamu:

⁴⁰ sombi ŵukumo mulukufwayo'kunjipaya, nemuntu uwakulaŵila kuli mweŵo ŵucine, uŵo naumfwile kuli ŵaLesa. Ablaamu taacitile-po ifyo, tau.

⁴¹ Mulukucite'fyakucita fyakwe wisinwe. Naŵo ŵaliŵaasucile ati: Tatwafyelwe kuŵucende; ŵawisifwe ŵamo tuli naŵo, niŵaLesa.

⁴² ŴaYesu ŵalilaŵile kuli ŵo ati: ŴaLesa ŋga ŵo niwawisinwe, ŋga mulintemenwe naneŵo; pakuti kuli ŵaLesa eko mfumine ukwisa kuno; pakuti nsiisile lukoso nemwine, sombi niŵo aŵantumine.

⁴³ Mbanindo tamulukwisiwa ifi ndaŵila? Nipakuti mwafilwa ukumfwa amasiwi anji.

⁴⁴ Muli ŵana ŵakwe wisinwe umusensesi; kaŵili ukukumbwa kwakwe wisinwe eko mulukufwayo'kucita. Uyo ali mwipaisi napakutaŋga; kaŵili taemakanine muli ŵucine, pakuti muli ye tamuli ŵucine neli ŵunini. Pakulaŵila ye uŵufi, alukulaŵile'fyakwe umwine eŋka: pakuti ye waŵufi, euŵufyala.

⁴⁵ Sombi neŵo, pakuti ndalaŵila ŵucine, tamulukuncetekela.

⁴⁶ Mbaninani pali mweŵo uŋgansinina ukuŵifya? Kani ndalaŵila ŵucine, mbanindo tamulukuncetekela?

⁴⁷ Umuntu waŵaLesa alomfwisya amasiwi aŵaLesa; pakuti pali fifi mweŵo tamulukuomfwisya, pakuti tamuli ŵaŵaLesa.

⁴⁸ Lomba aŵaJuda ŵaliŵaasucile ati: Kansi tatulilaŵile bwino pakweŵa ati: NiwemuSamalya, uli neciŵanda?

⁴⁹ ŴaYesu nekwasuka ati: Nsikwete-ciŵanda; sombi ndalemya ŵaTata; peŋka mweŵo mulukumpufya.

⁵⁰ Sombi nsilukufwayo'ŵuleme bwanji nemwine; epo ŵali Aŵafwaya nekusololola.

⁵¹ Cine cine, ndukumuŵuleni ati, aŵantu ŵonse uyo ulukulama amasiwi anji, taakaŵona-po imfwa insiku syonse lukoso.

⁵² Naŵo aŵaJuda kaŵaŵeŵa ati: Cine pano tuliisi ati uli neciŵanda. Ablaamu alifwile, neŵakusimika naŵo ŵalifwile; lomba weŵo ulukulaŵila ati: Uyo ulukulama amasiwi anji, taakomfwa-po imfwa insiku syonse lukoso.

⁵³ Kani weŵo ulicilile uŵukulu napali wisifwe Ablaamu, uyo uwafwile? Kaŵili neŵakusimika ŵalifwile. Mbaweŵo ulukuliesya ati niwenani?

⁵⁴ ŴaYesu nekwasuka ati: Kani ndukulilemya nemwine, uŵuleme bwanji bwalukoso; niŵaTata aŵalukundemya, ŵopele aŵo mulukweŵa ati, niŵaLesa ŵesu;

⁵⁵ kaŵili tamwaŵesiŵile-po, sombi neŵo ndiŵesi. Kani neŵo niŋgakana ati nsiŵesi, lomba niŋgapalana nenu, waŵufi; sombi ndiŵesi, nemasiwi aŵo ndalama.

⁵⁶ Ablaamu wisinwe walukusaŋgalalo'kuwona akasuŵa kanji; naye alikabwene, nekutemwa.

⁵⁷ Pakuti pali fyefyo aŵaJuda ŵalilaŵile kuli ŵo ati: Nemyaka yoŵe taiŋgakumana neli makumi asanu, weŵo lomba walimubwene Ablaamu?

⁵⁸ ŴaYesu nekulaŵila kuli ŵo ati: Cine cine, ndukumuŵuleni ati, ili taaŋgawa-po Ablaamu, lomba neŵo epo NDI.

⁵⁹ Pakuti pali fyefyo ŵalitolawile amabwe ati tuŵapame, sombi ŵaYesu ŵalifiseme nekufuma-mo mwitempuli.