Yoane 7 - Amashiwi Aba Lesa

¹ Panuma pali fyefyo-fintu, ŵa Yesu ŵalukupitana mucalo caGalili, pakuti taŵafwaile-po ukulukwenda mucalo caludiya, pakuti aŵaJuda ŵalukufwayo' kuŵepaya.

² Lomba yalipalamine impindi yacitenje caŵaJuda icamitanda.

³ Pakuti pali fyefyo aŵakwaŵo ŵalilaŵile kuli ŵo ati: Fumeni-ko kuno, muye kucalo ca ludiya, ati neŵasambile ŵenu naŵo ŵakaŵone imilimo yenu iyi mulukucita;

⁴ pakuti papo'muntu ulukucite' fintu kumfiso, kani alukufwaya ukumfwaniko'mwine; kani mulukucite'fyofintu ŋgamulilanjisye kuŵantu ŵonse.

⁵ Pakuti neŵakwaŵo ŵonse taŵalukuŵacetekela-po.

⁶ Peŋka ŵa Yesu nekuŵaŵula ati: Impindi yanji taiŋgafika; sombi impindi yonse yelelwe mweŵo.

⁷ Icalo taciisi ukumufitilweni; sombi neŵo cilukumfitilwa, pakuti ndukucisinina ati ifi cilukucita fiŵipile.

⁸ Mweŵo kamuyeni kucitenje: neŵo teti nje-po ŵukumo kucitenje'ci, pakuti impindi yanji taiŋgakumana,

⁹ Peŋka pakulaŵila amasiwi ayo kuli ŵo, lomba aciikele kucalo caGalili.

¹⁰ Sombi ili ŵaile aŵakwaŵo kucitenje, lomba pantanjile naŵo aŵene ŵaliileko; apakuŵulo'kuŵoneka, sombi koti nikumfiso.

¹¹ Pakuti pali fyefyo aŵaJuda ŵalukuŵafwaya-fwaya kucitenje, ukwipusyansyanya ati, Ali kulipi?

¹² Kaŵili ekwali ukupicisya ukwakuti pamaŵumba aŵantu ukwakuli ŵo: ŵambi ŵalukuŵeŵa ati, Muntu uweme; sombi ŵambi nawo ati: Koku, pakuti alukupasusya amaŵumba aŵantu.

¹³ Sombi tapali-po muntu uwakuŵalaŵilila apaswetele, pakuti ŵalukutina aŵaJuda.

¹⁴ Sombi pakasuŵa akapakati kansiku syacitenje, ŵa Yesu ŵaliile kwitempuli nekulukusambisya.

¹⁵ Pakuti pali fyefyo aŵaJuda ŵalikaŋkamene nekulaŵila ati: Mboyu-muntu aliisi syani amano amumabuku, utaasambile-po?

¹⁶ Lomba ŵaYesu ŵaliŵaasucile ati: Ukusambisya kwanji takuli kwanji neŵo, sombi kwaŵaŵo aŵantumine.

¹⁷ Aŵantu ŵonse, ulukufwayo'kucito'kufwaya kwaŵo, akwisiŵa ifyakusambisya uku, ati kani kwaŵaLesa, kani nineŵo nemwine ndukulaŵila lukoso neŋka,

¹⁸ Uyo ulukulaŵila lukoso eŋka, eulukufwayo'mwine uŵuleme; sombi uyo ulukufwayo'kupela uŵuleme aŵo aŵamutumine, uyo wacine; kaŵili muli ye tamuli-po ifisendeme.

¹⁹ Kansi teMose uwamupeleni amafunde? Sombi pali mweŵo tapali-po neli umo ucita koti mafunde. Peŋka mbanindo mulukufwailo'kunjipaya?

²⁰ Amaŵumba aŵantu aliasucile ati: Uli neciŵanda! Mbaaŵo niŵani aŵalukufwayo'kukwipaya?

²¹ ŴaYesu ŵaliŵaasucile ati: Umulimo umo nacitile, lomba mwense mulukukaŋkamana!

²² Pakuti pali fyefyo Mose ewamupeleni ukukopolwa; (nsilukweŵa ati kwakuli Mose, sombi kwakuli ŵawisinwe aŵakale); lomba mweŵo mulakopolo'muntu pakasuŵa kasabata.

²³ Kani umuntu akopolwa pakasuŵa kasabata ati ifunde lyakwe Mose tekusiluluka, mulukuŋkalipila, pakuti nalipupulwile umuntu umuŵili wonse pakasuŵa kasabata?

²⁴ Tekulukwesya lukoso koti nifyefyo ifiŵoneka kweŋka kumenso; sombi mulukwesya ukwesya ukuluŋgeme.

²⁵ Peŋka'po ŵambi aŵakuJelusalemi ŵalilaŵile ati: Uyu tewoyo uŵalukufwayo'kwipaya?

²⁶ Lomba ŵoneni-ko, alukulaŵilila apaswetele; sombi taŵalukulaŵila neli kantu kuli ye. Kani impemba silukwisiŵa icine ati uyu niKlistu?

²⁷ Sombi uyu tulimwisi ukwafumine; sombi pakwisa Klistu tapakaŵa-po neukesiŵa ukwafumine.

²⁸ Pakuti pali fyefyo ŵa Yesu ŵalilaŵilisye mwitempuli, ili ŵasambisya, nekulaŵila ati: Mulinjisi, neko mfumine mulikwisi; kaŵili nsiisile lukoso nemwine; sombi aŵo aŵantumine ŵacine, aŵa tamwisi mweŵo.

²⁹ Sombi neŵo ndiŵesi, pakuti ndifumine kuli ŵo, naŵo eŵantumine.

³⁰ Pakuti pali fyefyo aŵo ŵalukufwayo'kuŵekata; sombi tapali-po neli umo uwaŵakanticile-po neli minwe, pakuti impindi yaŵo lomba taiŋgafika.

³¹ Sombi aŵenji peŵumba lyaŵantu ŵaliŵacetekele, nekulaŵila ati: Pakwisa ŵaKlistu, kani ŵo ŵakalukucito'twisiŵilo utwakucilo'bwinji napali tutu utwalukucita'ŵa?

³² Lomba aŵaFalisi ŵaliumfwile iŵumba lyaŵantu lilukulinwinwisisye'fyofintu ifyakuli ŵo; naŵo aŵapapatilisi aŵakulu neŵaFalisi ŵalitumine ifilolo ati fiŵekate.

³³ Pakuti pali fyefyo ŵaYesu ŵalilaŵile ati: Yasyala-ko impindi ice inakulukwikala nenu; peŋka ŋkabwelela kuli ŵawo aŵantumine.

³⁴ Mukalukumfwaya-fwaya, sombi tamukambona-po; kaŵili mweŵo tamukesiŵa ukwisa uko uku ŋkekala.

³⁵ Pakuti pali fyefyo aŵaJuda nekuŵulansyanya ati: Mbaakaya-pi uyu-muntu, ati tesi tukamuŵone? Kani akaya kuli ŵaŵo awapalaŋganine pakati paŵaEla, nekuŵasambisya naŵo aŵaEla?

³⁶ Mbefyo ifi alaŵile findo, ati—Mukalukumfwaya-fwaya, sombi tamukambona-po; kaŵili mweŵo tamukesiŵa ukwiso'ko uku ŋkekala?

³⁷ Lomba pakasuŵa akakupela-ko, akasuŵa akakulu akacitenje, ŵaYesu ŵaliimakene, nekuŵilicisya ati: Kani pali umuntu uli necilaka, ŋgaese kuli neŵo, anwe!

³⁸ Uyo ulukupema-mo muli neŵo, munda yakwe mukalukukuŋka imiloŋga yamenda amweo, koti nifyopele'fyo ifyalaŵilwe mumalembo.

³⁹ Sombi ifyo ŵalilaŵilile Umupasi, uyo uyu ŵaŋgapoka aŵo aŵakupema-mo muli ŵo; pakuti ilyo tauŋgesa Umupasi; pakuti lomba ŵaYesu tawaŋgawa neŵuleme.

⁴⁰ Peŋka ŵambi aŵeŵumbe'lyo, pakumfwa amasiwi ayo, ŵalukweŵa ati: Cine uyu ewakusimika uyo!

⁴¹ Ŵambi ati: Uyu niKlistu! Sombi ŵambi naŵo nekweŵa ati: Ala! kani Klistu akafume kucalo caGalili?

⁴² Kansi amalembo taalilaŵile ati Klistu akafuma kuŵana ŵakwe Dafidi; kaŵili ati akafuma kuBetelemi, kumusi ukwali Dafidi?

⁴³ Peŋka paliŵele umupaka uwakupicisya peŵumba pakuti pali ye.

⁴⁴ A ŵo ŵambi ŵalukufwayo'kumwikata, sombi tapali-po neli umo uwamukanticile-po iminwe.

⁴⁵ Peŋka'po ifilolo fyalibwelele kuŵapapatilisi aŵakulu neŵaFalisi; naŵo nekufiipusya ati: Mbanindo tamumuletele?

⁴⁶ Ifilolo nafyo fyaliŵaasucile ati: Nekale konse tapali-po umuntu uwakulaŵila koti niwuyu.

⁴⁷ Lomba aŵaFalisi ŵalifyasucile ati: Kansi namweŵo mwatumpaikwa?

⁴⁸ Mbempemba neŵaFalisi ŵonse, kani aŵo ŵambi ŵalukumucetekela ye?

⁴⁹ Sombi aŵo-ŵantu iŵumbe'lyo, aŵataŵesi amafunde, ŵalifinjilwe.

⁵⁰ Lomba Nikodemo, umbi uwapeŵumba lyaŵaFalisi, wopele uyo uwaisile akale kuli ŵaYesu, alilaŵile kuli ŵo ati:

⁵¹ Kani amafunde esu alasinina umuntu ili taaŋgamumfwa umwine nekwisiŵe'fyo ifi alukucita?

⁵² Naŵo ŵalimwasucile ati: Kani naweŵo uli wakuGalili? Ufwaya-fwaye, wisiŵe ati kuGalili taatulila uwakusimika.

⁵³ Peŋka ŵonse walipalaŋgene, ukuya kumananda aŵo aŵo.