Yoane 6 - Amashiwi Aba Lesa

¹ Lomba panuma pali fyefyo-fintu ŵaYesu ŵalifumine uko, nekwaŵuke' cisiŵa caGalili, ico copele caTibelya;

² neŵumba lyaŵantu ilikulu lyaliŵalondele, pakuti ŵalukuŵona utwisiŵilo uto ŵalukucita kuŵalwele.

³ Lomba ŵaYesu ŵalininine kulupili nekwikalo'ko neŵasambile ŵaŵo.

⁴ Lombe'mpindi yamuciluko, icitenje caŵaJuda, yalipalamine.

⁵ Peŋka'po ŵaYesu ŵaliinucile nekuŵona iŵumba lyaŵantu ilikulu lilukwisa kuli ŵo, popeleŵalilaŵile kuli Filipo ati: Mbanikwisa twakuula ŵasiŋkwa, ati aŵa-ŵantu ŵalye?

⁶ Sombi ŵalilaŵile'fyo ukumwesya lukoso, pakuti aŵene ŵaliisiŵile ifi ŵakucita.

⁷ Filipo waliŵaasucile ati: Indalama imyanda iŵili tekusita-po siŋkwa uwakukumana ŵonse ati aŵa ŵalye-po panini.

⁸ Peŋka umbi umusambile waŵo, isina lyakwe niAndaleya, umukwaŵo Simoni Petilo, alilaŵile kuli ŵo ati:

⁹ Epwali umusaŋkwa pano, uli nawasiŋkwa ŵamabali ŵasanu, nesaŵi linini liŵili! Mbefyo fikumane syani kuŵantu aŵenji aŵakuŵe'fi?

¹⁰ ŴaYesu ati: Ŵekalikeni aŵantu pansi. Apo pali ifyani ifinji; naŵo aŵantu ŵaliikele pansi, ubwinji bwaŵo bwalikumene koti masausande asanu.

¹¹ Eli ŵaŵulile ŵasiŋkwa ŵaYesu. Peŋka ili ŵatotele, ŵaliŵaaŵenye aŵo aŵaikele; fyopele'fyo kaŵili nekuŵaaŵanya isaŵi ilyo, nekukumana ukufwaya kwaŵo ŵonse.

¹² Lomba pakwikuta ŵo, ŵalilaŵile kuŵasambile ŵaŵo ati: Tolaleni ifyo ifyakumacile ifyasyala-po; peposeka neli kamo.

¹³ Popele ŵalifitolawile nekwisusya ututundu ikumi natuŵili ifyakumacile-ko ifyo ifyafumine kuli wasiŋkwa ŵamabali ŵasanu, ifyasyele-po kuli ŵaŵo aŵalile.

¹⁴ Lomba aŵo-ŵantu, ili ŵabwene akesiŵilo ako ŵacitile, ŵalilaŵile ati: Cine uyu ewakusimiko'yo ulukwisa mucalo capansi.

¹⁵ Sombi ŵaYesu, ili ŵaisiŵile ati ŵalukwisa mukunjikata nekumpanjilisya ati njikale nimfumu, ŵalikumbulucile liŵili kulupili eŋka.

¹⁶ Peŋka pakufika iciŋgulo aŵasambile ŵaŵo ŵaliile kucisiŵa,

¹⁷ nekwicila mubwato, ati twaŵuke ukuya kuKapanaumi; lomba bwaila'kale, sombi ŵaYesu tawaŋgafika kuli ŵo.

¹⁸ Popele amenda aliŵucile ŵafuŋgwe aŵakulu pakuti pacipupu icakuti uŵukulu.

¹⁹ Ati ŵoŵe ukusilo'musinso wamasitalyo amakumi aŵili naasanu, neli makumi atatu, ŵaliŵabwene ŵaYesu ŵalukwisa ili ŵenda peulu pamenda, ŵalukupalamina kubwato; naŵo nekuŵa nemwenso.

²⁰ Sombi ŵalilaŵile kuli ŵo ati: Nineŵo, mwitina!

²¹ Peŋka ŵalisumine ukuŵapoka mubwato; naŵo ubwato impindi iyo yopele bwalificile kumutunto'ko uku ŵalukuya.

²² Ŋgamailo ilyo-ŵumba lyaŵantu aŵaiminine pesilya lyacisiŵa ŵalibwene ati ubwato ŵumbi taŵu-po, nakaŵili ŵaliisiŵile ati ŵaYesu taŵainjile mubwato pamo neŵasambile ŵaŵo, sombi ati aŵasambile ŵaŵo ŵalifumine-ko ŵeŋka;

²³ (sombi icine amato ambi afumine kuTibelya aliisile apepi napapo apo ŵalile siŋkwa, ili ŵatotele ŵaSikulu).

²⁴ Lomba iŵumba lyaŵantu ilyo, pakuŵona ati ŵaYesu taŵa-po, neŵasambile ŵaŵo naŵo taŵa-po, aŵene ŵaliinjile mumato nekufika kuKapanaumi, ili ŵaŵafwaya ŵaYesu.

²⁵ Lomba pakuwasaŋgana bwisilya bwacisiŵa, ŵalilaŵile kuli ŵo ati: MweŵaLabi, mbamwaisa lisa kuno?

²⁶ ŴaYesu naŵo ŵaliŵaasucile ati: Cine cine, ndukulaŵila kuli mweŵo ati, mulukumfwaya-fwaya tepakuti patwisiŵilo uto utu mwabwene, koku, sombi pakuti mwalilile ŵasiŋkwa aŵo nekwikuta.

²⁷ Mweŵo, tekulukupyunjila ifyakulya ifyo ifiŵola; sombi mupyunjile ifyakulya ifiikalilila ukufika kumweo uwamuyayaya, ifyo ifi akamupeleni Umwana waMuntunsi; pakuti ŵa Wisi, eŵaLesa, ŵalimuŵicile-po akesiŵilo kaŵo.

²⁸ Pakuti pali fyefyo ŵaliŵepwisye ati: Mbefyo, tucite syani ati tulukucite'milimo yaŵaLesa?

²⁹ ŴaYesu ŵaliŵaasucile ati: Imilimo yaŵaLesa niyiyi, ati mucetekele muli woyo uyu ŵatumine.

³⁰ Peŋka ŵalilaŵile kuli ŵo ati: Mbacindo mulukucita icakesiŵilo, ati tuŵone, tucetekele muli mweŵo? Mulukucite' ndo?

³¹ Ŵawisifwe ŵalukulya mana mumpaŋga, koti nifyopele'fyo ifilembelwe ati, Siŋkwa uwafumine kwiulu ŵaliŵapele, ati ŵalye.

³² Pakuti pali fyefyo ŵa Yesu ŵalilaŵile kuli ŵo ati: Cine cine, ndukulaŵila kuli mweŵo ati, Taali niMose uwamupeleni siŋkwo'yo uwafumine kwiulu; sombi niŵaTata eŵalukumupeleni siŋkwa wacine ufumine kwiulu.

³³ Pakuti siŋkwa waŵaLesa ewoyo useluka kwiulu, nekuŵapelo'mweo aŵamucalo capansi.

³⁴ Pakuti pali fyefyo ŵalilaŵile kuli ŵo ati: MweŵaSikulu, insiku syonse mulukutupela siŋkwo'yo,

³⁵ Naŵo ŵaYesu nekuŵaasuka ati: Neŵo enesiŋkwa waMweo. Aŵantu ŵonse ulukwisa kuli neŵo, taakomfwa-po insala neli limo; fyopele'fyo ulukucetekela kuli neŵo taakomfwa-po neli cilaka conse insiku syonse.

³⁶ Sombi ndukumuŵuleni ati naŋgaŵa ati mwambona, tamulukucetekela.

³⁷ Aŵantu ŵonse, aŵo ŵalukumpela ŵaTata, ŵakesa kuli neŵo; peŋka aŵo aŵakwisa kuli neŵo, nsikaŵatamfya-po neli limo, koku.

³⁸ Pakuti nsiselucile ukufuma kwiulu mukucito' kufwaya kwanji, sombi nimukucita koti kufwaya kwaŵaŵo aŵantumine emo nselucile.

³⁹ Uko-kufwaya kwaŵaŵo aŵatumine nikuku, ati pali fyefyo fyonse ifi ŵampele, nsikalufye-po neli cimo; sombi ati ŋkafiwusye fyonse pakasuŵa ako akakupela-ko,

⁴⁰ Pakuti ukufwaya kwaŵaTata nikuku, ati aŵantu ŵonse uwakumuŵono'Mwana, nekucetekela muli ye, akaŵe nemweo uwamuyayaya; kaŵili ati ŋkamuwusye akasuŵa ako akakupela-ko.

⁴¹ Peŋka aŵaJuda ŵaliliŋwiŋwisisye ifyakuli ŵo, pakuti ŵalilaŵile ati—Neŵo enesiŋkwa uwafumine kwiulu.

⁴² Naŵo ŵalieŵele ati: Kansi uyu-muntu teYesu, umwana wakwe Josefi? Naŵawisi naŵanyina tuliŵesi. Mbasyani alukulaŵila pano ati—Ndiselucile ukufuma kwiulu?

⁴³ ŴaYesu lomba ŵaliŵaasucile nekulaŵila ati: Mwilukuliŋwiŋwisyansyanya.

⁴⁴ A ŵantu ŵonse, tapali-po neli umo uwisi ukwisa kuli neŵo, uwakuŵulo'kukulikwa kuli ŵaTata aŵantumine; naneŵo ŋkamuwusyo'yo akasuŵa akakupela-ko.

⁴⁵ Fililembelwe kuŵakusimika ati: Naŵo ŵonse ŵakafundwa kuli ŵaLesa: lomba aŵantu ŵonse uwaumfwile kuli ŵaTata, nekusambila, eulukwisa kuli neŵo.

⁴⁶ Sombi icine papo' muntu neli umo uwaŵabwene-po ŵaTata; sombi eŋko'yo ufumine kuli ŵaLesa, ewaŵabwene-po ŵaTata.

⁴⁷ Cine cine, ndukumuŵuleni ati, Uyo ulukucetekela ali nemweo uwamuyayaya.

⁴⁸ Neŵoenesiŋkwawamweo.

⁴⁹ Ŵawisinwe ŵalukulya mana mumpaŋga; aŵo lomba ŵalifwile;

⁵⁰ sombi uno nisiŋkwa useluka kwiulu ati aŵantu ŵalye, ŵaŵule ukufwa.

⁵¹ Neŵo enesiŋkwa wamweo uselucile kwiulu. Aŵantu ŵonse uwakulya siŋkwa uyu akalukuli nemweo uwamuyayaya: icine, nawoyo-siŋkwa munefu wanji, uŋkapela pakuti pamweo waŵamucalo capansi.

⁵² Pakuti pali fyefyo aŵaJuda ŵalitaticile ukupicisye'cikaka ati: Uyu-muntu aliisi syani ukutupelo'munefu wakwe ati tulye?

⁵³ Peŋka ŵaYesu ŵalilaŵile kuli ŵo ati: Cine cine, ndukumuŵuleni ati: Teti mwikale nemweo mweŵene, apakuŵulo'kulya umunefu waMwana waMuntunsi nekunwe'milopa yakwe.

⁵⁴ Uyo ulukulyo'munefu wanji, nekulukunwe'milopa yanji, ali nemweo uwamuyayaya; uyo, neŵo ŋkamuwusya pakasuŵa ako akakupela-ko.

⁵⁵ Pakuti umunefu wanji icine cakulya, nemilopa yanji icine fyakunwa.

⁵⁶ Uyo ulukulyo' munefu wanji, nekulukunwe'milopa yanji, alukwikala muli neŵo, naneŵo ndukwikala muli ye.

⁵⁷ Koti nifyopele'fyo ŵaTata aŵamweo ifi ŵantumine neŵo, naneŵo ifi njikele nemweo pakuti pali ŵaTata; fyopele'fyo kaŵili uyo ulukundya, uyo-ye akalukuli nemweo pakuti pali neŵo.

⁵⁸ Uno nisiŋkwa uwaselucile kwiulu: topalene nawoyo uŵalile ŵawisinwe, lomba nekufwa, yo; sombi uyo ulukulya siŋkwa uyu, akalukuli nemweo uwamuyayaya.

⁵⁹ Ifyo ŵalifilaŵilile pakusambisya mwisunagoge kuKapanaumi.

⁶⁰ Peŋka pakufiumfwa ŵambi aŵasambile ŵaŵo aŵenji ŵalilaŵile ati: Amasiwi ayo alikatesye, mbaniŵani awaŋgaomfwisya?

⁶¹ Sombi ŵa Yesu, pakuti ŵaliisiŵile mumutima waŵo ati aŵasambile ŵanji walukuliŋwiŋwisya pali fyefyo, ŵalilaŵile kuli ŵo ati: Kani filukumututwisyeni ifyo?

⁶² Mbefyo syani kani mukaŵone Umwana waMuntunsi alukwimino'ko ukwalukwikala akale?

⁶³ Umupasi eupela umweo; umunefu lukoso tomuŵisyeni-po kantu: amasiwi analaŵila kuli mweŵo emupasi, emweo.

⁶⁴ Sombi peŵumba Iyenu epo ŵali ŵambi aŵataŵalukucetekela. (Pakuti ŵaYesu ŵaliŵesiŵile napakutaŋga aŵo aŵataŵacetekele, nekumwisiŵa nawoyo ukaŵaloŵela).

⁶⁵ Naŵo ati: Pakuti pali fyefyo nalaŵila kuli mweŵo ati—Aŵantu ŵonse tapali-po neli umo uwisi ukwisa kuli neŵo, uwakuŵulo'kufipelwa kuli ŵaTata.

⁶⁶ Pakuti pali fyefyo ŵambi aŵasambile ŵakwe aŵenji ŵalibwelele, nekuleko'kulukwenda naŵo.

⁶⁷ ŴaYesu lomba ŵaliŵepwisye aŵo aŵali ikumi naŵaŵili ati: Kani namweŵo mulukufwayo'kuya?

⁶⁸ Kumfwa Simoni Petilo kaaŵaasuka ati: MweŵaSikulu, mbatukaye kuli nani? Mweŵo muli nemasiwi amweo uwamuyayaya;

⁶⁹ kaŵili fweŵo twacetekela, twaisiŵa icine ati mweŵo muli niŴaŵo Aŵaswetelele ŵaŵaLesa.

⁷⁰ ŴaYesu nekuŵaasuka ati: Kansi nsinalimusalulwileni mweŵo ikumi naŵaŵili? Sombi umo peŵumba Iyenu musensesi.

⁷¹ Ifyo ŵalieŵele Juda, umwana wakwe Simoni lsikaliote; pakuti uyo wopele eukaŵaloŵela, uwapali ŵaŵo ikumi naŵaŵili.