Yoane 5 - Amashiwi Aba Lesa

¹ Panuma pali fyefyo-fintu kwali necitenje cimbi icaŵaJuda; ŵaYesu naŵo ŵaliile uko kujelusalemi.

² Uko kuJelusalemi apepi napaMusiko waMbelele, eko lili isiŵa, iliilicilwe muŵuEbeya ati niBetesida; kuli lyo lyopele kulisiŋgulucile neliŋga; mwiliŋge'lyo muli imisiko isanu.

³ Kaŵili mopele umo mwalukulala aŵantu aŵenji aŵaIwele—nempofu, nefilema, neŵauminine lukoso-aŵalukupembelela ukuŵilaka amenda.

⁴ Pakuti pampindi imbi iŋkalamba yaŵaLesa yalukuselucila mwisiŵa, nekuteŋkanya amenda; paŵantu ŵonse, uyo uwakutaŋgo'kwicila-mo, pakweŵa ati ateŋkanisiwa amenda, ewakuŵusiwa kuŵulwele ŵonso'ŵo ali naŵo.

⁵ Lomba ekwali umbi umwalalume, uwalukutenda imyaka amakumi atatu nemyaka isanu naitatu peulu.

⁶ Peŋka ŵaYesu, pakumuŵona alilele, nekwisiŵa ati alukutenda impindi ikulu, ŵalimwipwisye ati: Kani ulukufwayo'kutenduluka weŵo?

⁷ Naye umulwele nekuŵaasuka ati: Sombi Sikulu, nsikwete umuntu uwakuŋgawika-mo mwisiŵa impindi iyakuŵilaka amenda; sombi pakulukuya neŵo, umbi kale aicila-mo.

⁸ Naŵo ŵaYesu nekumweŵa ati: Ŵuka, upinte uŵulo ŵoŵe, ulukwenda!

⁹ Lomba impindi iyo yopele umuntu uyo aliŵele nemakosa, nekuŵulo'ŵulo bwakwe, nekulukwenda. Akasuŵa ako kali kasabata.

¹⁰ Pakuti pali fyefyo aŵaJuda ŵalilaŵile kuli woyo uwatendulucile ati: Weŵo, lelo kasuŵa kasabata, tekwelelwa weŵo ukupinto'ŵulo ŵoŵe.

¹¹ Naye nekuŵaasuka ati: Uyo uwambusya neŵo wopele ewandaya ati: Uŵule uŵulo ŵoŵe, ulukwenda.

¹² Naŵo ŵalimwipwisye ati: Mbaninani uwalaŵile'fyo kuli weŵo ati: Uŵule uŵulo ŵoŵe, ulukwenda?

¹³ Sombi uyo uwatendulucile taamwisiŵile-po, pakuti ŵaYesu ŵalikumbulucile, pakuti aŵantu ŵalifulile apo.

¹⁴ Pantanjile ŵa Yesu ŵalimusanjile mwitempuli, nekulaŵila kuli ye ati: Weŵo ŵona, ulitendulucile; tekuŵifya liŵili, wikesa-kuŵa nacimbi iciŵipile icakucila napaŵulwele uŵo.

¹⁵ Popele apo umuntu uyo alikumbulucile nekuŵaŵula aŵaJuda ati: NiŵaYesu aŵali ŵambusya neŵo.

¹⁶ Pakuti pali fyefyo naŵo aŵaJuda ŵaliŵakululwisye ŵaYesu, pakuti ŵalicitile'fyo-fintu pakasuŵa kasabata.

¹⁷ Sombi ŵa Yesu ŵaliŵaasucile ati: ŴaTata ŵalukucite'milimo iyakufika nakumpindi yaŵukumo, naneŵo ndukwicita.

¹⁸ Peŋka pakuti pali fyefyo aŵaJuda ŵalifwaisye ukwakucila ukuŵepaya pakuti ŵalipulaisye ifyasabata; nakaŵili pakuti ŵo ŵalisimbwile ŵaLesa ati niŵaTata, ŵalukulipalanya aŵene pamo naŵaLesa.

¹⁹ Pakuti pali fyefyo ŵa Yesu ŵaliŵaasucile ati: Cine cine, ndukumuŵuleni ati Umwana tesi ukucita akantu umwine, sombi fyeŋke'fyo ifi aŵono'kucita ŵaWisi efi esi ukucita; pakuti fyonse'fyo ifi waŋgacita ŵaWisi, fyopele'fyo neMwana kaŵili efi aŋgacita,

²⁰ Pakuti ŵa Wisi ŵalukumutemwo'kwakuti Umwana waŵo, nekumulanjisya fyonse'fyo ifi ŵalukucita aŵene. Kaŵili naimbi imilimo ŵakamulanjisya iyapatali iyakucila napali yiyi, ati mukalukukaŋkamana lukoso.

²¹ Pakuti koti nifyopele'fyo ifi ŵalukuŵaŵusya aŵafwile ŵaWisi nekuŵasinsimuna, fyopele'fyo neMwana alukuŵasinsimuna aŵantu ŵopele aŵo alukufwaya.

²² Naŵo ŵaWisi taŵasololola imilandu yaŵantu, neli nipamuntu umo, sombi ŵo ŵalimupele Umwana waŵo ukusololola konse,

²³ ati aŵantu ŵonse ŵakalukumucindika Umwana koti nifyopele'fyo ifi ŵaŵacindika ŵaWisi. Uyo utaalukucindika Umwana, icine taalukucindika neli niŵaWisi aŵamutumine.

²⁴ Cine cine, ndukulaŵila kuli mweŵo ati, uyo ulukumfwisya amasiwi anji nekupema-mo muli ŵaŵo aŵantumine, uyo euli nemweo uwamuyayaya, naye taakesa kusininwa-po; sombi afuma-mo mumfwa, ainjila muMweo.

²⁵ Cine cine, ndukumuŵuleni ati, ilukwisa impindi, eyafika pano, iyo ŵakumfwa aŵafwile isiwi lyaMwana waŵaLesa; peŋka aŵo aŵalukuliumfwa ŵakalukuli neMweo.

²⁶ Pakuti koti nifyopele'fyo ifi ŵali nemweo aŵene ŵa Wisi, fyopele'fyo kaŵili ŵalimupele Umwana waŵo ukulukwikele nemweo umwine:

²⁷ nakaŵili ŵalimupele uŵukulu ubwakusololole'milandu, pakuti ye Mwana waMuntunsi.

²⁸ Tekulukukaŋkamana pakuti pali fyefyo; pakuti ikesa impindi iyo lomba, aŵantu ŵonse aŵali mufilende ŵakomfwe'siwi lyakwe,

²⁹ nekufuma-mo; aŵo aŵalukucite'fiweme ŵakaŵuka liŵili ukwaMweo; sombi aŵo aŵalukucite'fiŵipile ŵakaŵuka liŵili ukwakusololola.

³⁰ Neŵo neŋka nsiisi ukucita neli kantu; koti nifyopele'fyo ifi numfwa, fyopele'fyo nakaŵili ndasololola; nako ukusololola kwanji kuliluŋgeme, pakuti nsilonda ukufwaya kwanji, sombi ukufwaya kwaŵaŵo aŵantumine eko ndonda.

³¹ Kani neŵo neŋka ndukulisimicila, ukusimika kwanji takulukwikala kwacine.

³² Epwali naumbi ulukunsimicila; kaŵili ndiisi ati ukusimiko'ko uku alukunsimicila kwacine.

³³ Mweŵo mwalitumine aŵantu kuli Yoane, naye aliŵele nimboni yaŵucine;

³⁴ sombi ukusimiko'ko uku mpoka takufumine kuŵantunsi; sombi ndukulaŵile' fyo ati mukapuluke.

³⁵ Uyo-Yoane ewali mumosyo uwakwaka nekutuŵa; kaŵili impindi ice mwalukusumino'kusaŋgalala mukusweta kwakwe.

³⁶ Sombi ukusimiko'ko ndi nako kulicilile uŵukulu napali koko ukwakwe Yoane; pakuti imilimo iyo ŵaTata ŵampela ati njikonsye, imilimo yopele'yo iyi ndukucita, ilukunsimicila neŵo ati ŵaTata eŵantumine.

³⁷ Kaŵili ŵaTata aŵantumine aŵene ŵalukunsimicila neŵo. Mweŵo insiku syonse tamwalukuliumfwa-po isiwi lyaŵo, neli kuŵona nefumbi lyaŵo;

³⁸ kaŵili nemasiwi aŵo tamwakwete akwikala mumitima yenu; pakuti tamulukumucetekela uyo uyu ŵatumine.

³⁹ Mweŵo mulafwaya-fwaya mumalembo, pakuti mulukulaŋguluka ati muli o emuli neMweo uwamuyayaya; lomba ayo opele calukusimike'fyakuli neŵo;

⁴⁰ sombi tamulukufwaya ukwisa kuli neŵo ati mukaŵe neMweo.

⁴¹ Neŵo nsipoka kuŵantunsi ukucindikwa, tau;

⁴² sombi ndimwisini ati tamukwete uŵutemwe bwaŵaLesa mumitima yenu.

⁴³ Ndiisile neŵo mwisina lyaŵaTata; peŋka tamulukumpoka; sombi kani umbi akese mwisina lyakwe umwine, uyo eye mukapoka icine.

⁴⁴ Mweŵo mulukwisiŵa syani ukucetekela, mwemulukucindikansyanya; sombi uŵuleme uŵufumine kuli ŵaLesa aŵali ŵeŋka tamulukuŵupensela?

⁴⁵ Tekulukweŵa ati ŋkamusinineni kuli ŵaTata, koku: epwali uwakumusinineni, niMose, muli woyo wopele emo mupema;

⁴⁶ pakuti ŋga mwalukucetekela Mose, naneŵo ŋga mulukuncetekela; pakuti ye alilembele ifyakuli neŵo.

⁴⁷ Sombi kani tamulukucetekele'fyo ifi alembele, mbasyani muŋgacetekela amasiwi anji neŵo?