Yoane 4 - Amashiwi Aba Lesa

¹ Pakwisiŵa lomba ŵaSikulu ati aŵaFalisi ŵaliumfwile ati ŵa Yesu ŵalukuŵaalula ati ŵasambile, nekuŵaŵatisya aŵakucilo'bwinji napaŵakwe Yoane

² (naŋgawe'fyo ŵaYesu aŵene taŵalukuŵatisya, yo, sombi ŵasambile ŵakwe eŵalukuŵatisya),

³ ŵalifumine mucalo ca Iudiya, nekukumbulucila liŵili kucalo caGalili.

⁴ Peŋka'po ŵaŋgapita pacalo caSamalya.

⁵ Lomba ŵalificile pamusi umbi waŵaSamalya, isina lyauo niSaika, apepi pali kako-kalo akapele Yakobi kuli Josefi umwana wakwe.

⁶ Kopele uko ekwali nemukalo wakwe Yakobi. Peŋka ŵaYesu, pakuti ŵalikatele kukwenda, ŵaliikele'fyo pamukalo. Lomba akasuŵa kali pakati keulu.

⁷ Peŋka nekwisa umwanakasi umuSamalya mukutapa'menda, Lomba ŵaYesu ŵalilaŵile kuli ye ati: Mpe-po, nwe!

⁸ Pakuti aŵasambile ŵaŵo ŵaliile kumusi mukuula ifyakulya.

⁹ Lomba uyo-mwanakasi umuSamalya alilaŵile kuli ŵo ati: Mbanindo weŵo wemuJuda ulukulombela amenda kuli neŵo, nemuSamalya? (Pakuti aŵaJuda taŵaambala-po neŵaSamalya, ŵaŵa.)

¹⁰ Sombi ŵaYesu nekumwasuka ati: Weŵo, ŋga uliisiŵile impese yaŵaLesa, nekumwisiŵo'yu ulukulaŵila kuli wewo ati, Mpe-po, nwe; ŋga walomba kuli ye, naye ŋga akupela amenda amweo.

¹¹ Naye umwanakasi nekulaŵila kuli ŵo ati: Pakuti Sikulu, tamukwete icakutapula-ko, nemukalo uyu uliile pansi apatali, mbefyo ayo-menda amweo muli nao alifumine kulipi?

¹² Kani mweŵo mulicilile uŵukulu napali ŵawisifwe Yakobi aŵatupele uyu-mukalo, nekulukunwamo naŵo aŵene, neŵana ŵaŵo, nenama syaŵo?

¹³ Peŋka ŵaYesu ŵalimwasucile ati: Aŵantu ŵonse uwakunwa kumenda aya akaŵa liŵili necilaka;

¹⁴ sombi ukanwa kumenda ayo aŋkamupela neŵo, taakomfwa-po liŵili icilaka neli panini insiku syonse lukoso; sombi ayomenda aŋkamupela neŵo akaŵa muli ye kantupuntupu akalukunyunya kumweo uwamuyayaya.

¹⁵ Peŋka umwanakasi alilaŵile kuli ŵo ati: Sikulu, mpeni-po amenda ayo, ati nsikalukumfwa-po liŵili icilaka, neli kwisa nakukuno konse kumenda akuloŵa.

¹⁶ Naŵo ŵaYesu kaŵamweŵa ati: Koya, ukete umulume woŵe, mubwelele kuno.

¹⁷ Sombi umwanakasi nekuŵaasuka ati: Nsikwete-mulume neŵo. Naŵo ŵaYesu nekumwasuka ati: Walaŵila bwino ati—Nsikwete-mulume neŵo;

¹⁸ pakuti weŵo waliupilwe aŵalume ŵasanu, sombi uyo uli nakwe ŵukumo taali mulume woŵe; ico ecacine walaŵila.

¹⁹ Lomba umwanakasi alilaŵile kuli ŵo ati: Sikulu, pano naisiŵa ati mweŵo muli ŵakusimika.

²⁰ Ŵawisifwe aŵakale ŵalukutembela kuli ŵaLesa palupili ulu; sombi mweŵo ati nimujelusalemi emwelelwe ukutembela kuli ŵaLesa.

²¹ Kumfwa ŵaYesu wamwewa ati: Wemwanakasi, uncetekele neŵo ati ilukwisa impindi, iyi tamukatembela kuli ŵaLesa ŵaWisifwe neli nipapano palupili neli nimujelusalemi.

²² Mulatembela kuli ŵaŵo aŵa tamwisi mweŵo; sombi fweŵo tulatembela kuli ŵaŵo aŵa twisi; pakuti umwakupulucila mulitulile kuŵaJuda.

²³ Sombi ilukwisa impindi iyo, eyafika pano, ili aŵakutembela aŵacine ŵakalukutembela kuli ŵaLesa ŵaWisifwe mumupasi namuli ŵucine; pakuti ŵaLesa ŵaWisifwe walukufwaya ati aŵakuŵe'fyo ŵakalukutembela kuli ŵo.

²⁴ ŴaLesa eMupasi, lomba aŵo aŵatembela kuli ŵo ŵaŋgelelwa ukutembela mumupasi namuli ŵucine.

²⁵ Naye umwanakasi alilaŵile kuli ŵo ati: Ndiisi ati ŵaMasaya ŵakesa, aŵo ŵopele aŵelicilwe ati niŵaKlistu; peŋka pakwisa ŵo, ŵakatufisulwila ifintu fyonse.

²⁶ Ŵa Yesu ŵalilaŵile kuli ye ati: Enineŵo, nendukulaŵila kuli weŵo.

²⁷ Peŋka'po ŵalificile neŵasambile ŵaŵo; naŵo nekukaŋkamana lukoso ati ŵalukwambala nemwanakasi; sombi naŋgawa nifyefyo, tapali-po uwakwipusya ati: Nindo mulukufwaya? neli ati: Pakuti pando mulukwambawila nakwe?

²⁸ Lomba umwanakasi alisile umutondo wakwe, nekuya kumusi, nekuŵaŵula aŵalalume ati:

²⁹ Twendeni, mukaŵone-po umuntu uwambule'fyo ifi nalukucita neŵo fyonse: kani niKlistu uyo?

³⁰ Naŵo aŵantu aŵo ŵalifumine mumusi nekuyo'ko kuli ŵo.

³¹ Sombi impindi iyo aŵasambile ŵalukuŵakombetela ati: MweŵaLabi, muIye!

³² Sombi naŵo nekuŵaasuka ati: Ndi nafyo neŵo ifyakulya ifi tamwisi mweŵo.

³³ Lomba aŵasambile nekwipusyansyanya ati: Kani umbi aŵaletelapo ifyakulya?

³⁴ Sombi ŵaYesu ŵaliŵeŵele ati: Ifyakulya fyanji nififi, ati ncite neŵo ukufwaya kwaŵaŵo aŵantumine, nekwikonsya imilimo yaŵo.

³⁵ Tamulukweŵa mweŵo ati yasyalako imyensi ine, eli ikafika impindi yakuteŵula? Ŵoneni, ndukumuŵuleni ati: Inukeni, mutontomeke pamaŵala; kale atuŵa neŋkope isyelelwe ukuteŵula.

³⁶ Uwakuteŵula alukupoka ukulambulwa kwakwe, nekuloŋgela iŋkope isyakumweo uwamuyayaya; ati uwakuŵyala nawoyo uwakuloŋgela wakasaŋgalalile pamo.

³⁷ Pakuti ico-cisimpi cacine ati—Umbi alaŵyala, sombi niumbi naye euteŵula.

³⁸ Nalimutumineni mukufiteŵule'fyo ifi tamwalimine; ŵambi eŵalimine, sombi mweŵo mwainjila mumilimo yaŵo.

³⁹ Naŵo aŵaSamalya aŵenji aŵamumusi uyo ŵalicetekele muli ŵaYesu, pakuti pamasiwi amwanakasi uyo uwasimicile ati: Ŵambule'fyo ifi nalukucita neŵo fyonse.

⁴⁰ Lomba pakwisa kuli ŵo aŵaSamalya, ŵaliŵakombetele ati: Mwikale nafweŵo. Naŵo ŵaliikele kopele uko insiku siŵili.

⁴¹ Kaŵili naŵambi naŵo aŵenji ŵalicetekele pakuti pamasiwi aŵo;

⁴² nekulaŵila kumwanakasi uyo ati: Pano tulukucetekela; sombi tepakuti pakusimika koŵe; pakuti twaŵomfwa nafweŵo fweŵene; peŋka tuliisi ati aŵa icine eŴakupulusya ŵafintunsi fyonse.

⁴³ Lomba pakupita insiku isyo syoŵilo ŵalifumine-ko uko nekuya kucalo caGalili;

⁴⁴ pakuti ŵaYesu aŵene ŵalisimicile ati: Uwakusimika taacindikwa mucalo cakwaŵo.

⁴⁵ Sombi pakufika ŵo mucalo caGalili, lomba aŵaGalili ŵaliŵasekelele bwino, pakuti ŵalibwene fyonse'fyo ifi ŵacitile mu Jelusalemi kucitenje, pakuti aŵo naŵo ŵaliile kucitenje.

⁴⁶ Lomba ŵalificile liŵili kuKena ukwakuGalili, uko uku ŵaalwilile amenda nimfaina. Lomba eko yali impemba imbi, iyo umwana waiyo umwalalume ali mulwasi kuKapanaumi.

⁴⁷ Iyo, pakumfwa ati ŵaYesu ŵalifumine mucalo caludiya nekwisa kucalo caGalili, yaliile kuli ŵo, nekuŵakombetela ati: Twendeni, mukambusisye-ko umwana wanji, pakuti imfwa yapalamina'kale kuli ye.

⁴⁸ Eli ŵalaŵile kuli yo ŵaYesu ati: Ŋga tamuŵona utwisiŵilo nefimpelampela, ŋga tamucetekela neli kucetekela konse.

⁴⁹ Sombi impembe' yo yalilaŵile kuli ŵo ati: Sikulu mwise kwanji, ekesa-kufwa umwana wanji.

⁵⁰ Naŵo ŵaYesu nekuyasuka ati: Kamuyeni; umwana wenu alukulaŵa. Peŋka umuntu uyo alicetekele amasiwi ayo walawile ŵaYesu kuli ye, nekukumbuluka.

⁵¹ Pansila ili alukubwela alikumene neŵapyunjisi ŵakwe; aŵo nekumuŵula ati: Umwana wenu pano alukulaŵa.

⁵² Naye nekuwepusya ati: Isa-mpindi ataticile ukulwaluka? Naŵo ŵalimwasucile ati: Mailo akasuŵa pakati keulu uŵulwele eli bwamulekele.

⁵³ Lomba ŵawisi ŵaliisiŵile ati niyeyompindi yopele eyo ŵalaŵile-mo ŵaYesu kuli ye ati: Umwana wenu alukulaŵa. Naŵo nekucetekela, pamo newamuŋanda yaŵo ŵonse.

⁵⁴ Akesiŵilo ako kaŵutuŵili akacitile ŵaYesu, pakufuma mucalo caludiya mukwisa kucalo caGalili.