Yoane 21 - Amashiwi Aba Lesa

¹ Panuma pali fyefyo-fintu, ŵaYesu ŵalililanjisye liŵili kuŵasambile kucisiŵa caTibelya. Ŵalililanjisye'fi:

² Simoni Petilo naTomasi uwailicilwe ati niDidumo, naNatanyeli uwakuKena uwakuGalili, neŵana ŵakwe Sebedai, naŵambi aŵasambile ŵaŵo ŵaŵili, ŵali pamo ŵonse.

³ Lomba Simoni Petilo alilaŵile kuli ŵo ati: Ndukuya mukwikasye'saŵi. Naŵo ŵalimwasucile ati: Tulukuya noŵe nafweŵo. Naŵo ŵaliile nekwicila mubwato; sombi uŵusiku uŵo taŵaikesye-po neli kantu.

⁴ Lomba pakuco'lucelo, ŵaYesu ŵaliimakene kumumba; sombi aŵasambile taŵaŵesiŵile ati niŵaYesu.

⁵ Naŵo ŵaYesu ŵalilaŵile kuli ŵo ati: Mweŵana ŵanji, muli-po nekakulya? Kaŵaŵaasuka ati: Tatukwete.

⁶ Eli ŵaŵeŵele ati: Teyeni akombe kulwine lwabwato, eli mwakuwona, Pakuti pali fyefyo ŵalikateyele, lomba ŵalikafililwe ukukakulumwina mubwato pakuti amasaŵi alifulile.

⁷ Pakuti pali fyefyo umusambile uyo ŵatemenwe ŵa Yesu alilaŵile kuli Petilo ati: Kansi niŵaSikulu! Peŋka Simoni Petilo, pakumfwa ati niŵaSikulu, alifwite umwinjila wakwe, (pakuti taafwite-po), nekulituwula mucisiŵa.

⁸ Sombi aŵasambile ŵambi ŵaliisile mubwato ŵunini ili ŵakulumwina akombe akeswile amasaŵi, pakuti ŵo taŵali ukutali nakumutunta, sombi nikoti makubita imyanda iŵili.

⁹ Lomba pakutuntucila pamutunta, ŵalibwene nikumulilo wamakalasi walipo, nesaŵi ililele peulu, nasiŋkwa.

¹⁰ Ŵa Yesu ŵalilaŵile kuli ŵo ati: Letene-po limbi isaŵi pali ayo mwaikasya.

¹¹ Lomba Simoni Petilo aliile nekukakulumwina kumutunta akombe akeswile amasaŵi akulu umwanda umo nemakumi asanu nemasaŵi atatu peulu; peŋka naŋgawa ati amasaŵi alifulile ifyo, akombe takaputucile.

¹² ŴaYesu ŵalilaŵile kuli ŵo ati: Iseni, mususule. Lomba pali ŵaŵo-ŵasambile tapali-po neli umo uwamutima uwakuŵepusya ati: Mbanimweŵanani? pakuti ŵonse ŵaliisiŵile ati niŵaSikulu.

¹³ ŴaYesu ŵalipalamine, nekuŵula siŋkwa, nekuŵapela, nesaŵi nalyo fyopele' fyo.

¹⁴ iyo-mpindi yalitatu iyi ŵalilanjisye ŵaYesu kuŵasambile ili ŵaŵucile paŵafwile.

¹⁵ Peŋka, ili ŵasuswile, ŵaYesu ŵalilaŵile kuli Simoni Petilo ati: Simoni wemwana wakwe Jona, kani ulintemwesye ukucila napali aya? Naye nekuŵaasuka ati: Inya mweŵaSikulu, muliisi ati ndimutemenweni. Kaŵalaŵila kuli ye ati: Usanine utwana twambelele utwanji.

¹⁶ Peŋka ŵalimwipwisye liŵili ati: Simoni wemwana wakwe Jona, kani ulintemwesye? Naye nekuŵaasuka ati: Inya mweŵaSikulu, muliisi ati ndimutemenweni. Kaŵalaŵila kuli ye ati: Embela imbelele syanji.

¹⁷ Peŋka ŵalimwipwisye litatu ati: Simoni, wemwana wakwe Jona, kani ulintemenwe lukoso? Peŋka Petilo aliŵele nensoni, pakuti pakumwipusya litatu ŵo ati—Ulintemenwe lukoso? Eli aŵaasucile ati: MweŵaSikulu mulifiisi ifintu fyonse, muliisi ati ndimutemenweni. Kumfwa ŵaYesu ŵamweŵaati: Usanineimbelelesyanji.

¹⁸ Cine cine, ndukukuŵula ati ili wali musaŋkwa, niwemwine walukulisunsa, nekwenda konse uko walukufwaya; sombi ili ukacekula, ukatambika amaŵoko oŵe, lomba niumbi wakakusunsa nekukutwala uko uku taukafwaya ukuya.

¹⁹ Sombi ifyo ŵalifilaŵilile ukupalanisisya amekalilo amfwa iyo akaŵalemesyamo ŵaLesa. Peŋka pakufilaŵile'fyo, ŵalilaŵile kuli ye ati: Undonde neŵo.

²⁰ Lomba Petilo alisyolokele nekuŵona ati umusambile uyo ŵatemenwe ŵaYesu alukutulonda, uvo wopele uwaeyamine muntiŵi yaŵaYesu pakulyo'mulalilo pampindi iyo alaŵile ati: MweŵaSikulu, mboyo ninani mwaeŵa, uwakumuloŵeleni?

²¹ Petilo lomba pakumuŵono'yo, aliŵepwisye ŵaYesu ati: Mboyu syani?

²² Kaŵamweŵa ŵaYesu ati: Kani neŵo mfwaye ati ekale ukufika kumpindi yakwisa kwanji, mbefyo syani kuli weŵo? U ndonde neŵo.

²³ Pakuti pali fyefyo iceŵo ico calikumene kuŵanaŵaŋkasi ŵonse ati uyo-musambile taakafwa; sombi ŵaYesu taŵalaŵile kuli ye ati taakafwa, sombi ati: Kani neŵo mfwaye ati ekale ukufika kumpindi yakwisa kwanji, mbefyo syani kuli weŵo?

²⁴ Uyo-musambile eulukusimika ififintu, ewafilembele; peŋka tuliisi ati ukusimika kwakwe kwacine.

²⁵ Naka ŵili epo fili nafimbi ifintu ifinji ifi ŵacitile ŵaYesu; ifyo, ŋga fililembelwe fyonse, ndukweŵa ati necalo conse icapansi ŋga cilicepele kumabuku ayo aŋgalembwa.