Yoane 20 - Amashiwi Aba Lesa

¹ Lomba pakasuŵa akakutatiko' muluŋgu, Maliya uwakuMagadala aliisile kucilende ulucelocelo, lomba tawuŋgaca: eli aŋgawona ati ibwe lyasiŋkuka-ko kucilende.

² Pakuti pali fyefyo aliŵutucile ukuya kuli Simoni Petilo nakumusambile umbi uyo ŵatemenwe ŵaYesu, nekuŵaŵula ati: Ŵaŵafumyamo ŵaSikulu mucilende; tatwisi-ko uko ŵaŵaŵika.

³ Pakuti pali fyefyo Petilo nemusambile uyo umbi ŵaliimine nekuya kucilende.

⁴ Woŵilo ŵaliŵutucile pamo; sombi umusambile umbi uyo walicilile-po uluŵilo napali Petilo, nekutaŋgo' kufika kucilende.

⁵ Naye aliineme ukuliŋgamisya-mo mukati, nekuŵona-mo insalu syambafuta sililele-mo; sombi taenjile-mo, woyu.

⁶ Lomba naSimoni Petilo nekufika, ili amulonda panuma, nekwinjila mucilende; nekuŵona insalu syambafuta sililele,

⁷ necitambala icali kumutwi waŵo tacali pamo nembafuta, calipetelwe kumpelo ceŋka,

⁸ Lomba apo aliinjile-mo nawoyo-musambile umbi uwatanjile ukufika kucilende; naye alibwene nekucetekela.

⁹ Pakuti ŵo impindi iyo lomba tawaŋgesiwa amalembo ayo ati ukuŵelelwa ukuŵuka paŵafwile.

¹⁰ Eli ŵabwelele kwaŵo aŵasambile aŵo.

¹¹ Sombi Maliya aciimakene pesonde pacilende ukulukulila; lomba ili alukulila aliineme ukuliŋgamisya mucilende,

¹² nekuŵona nikuŋkalamba siŵili isyafwite ifituŵile siliikele, imbi kumitwi, imbi nayo kumolu, uku walalicilwe umuŵili waŵaYesu.

¹³ Nasyo syalimwipwisye ati: Wemwanakasi, nindo ulukulilila? Naye nekusyasuka ati: Nipakuti ŵaŵafumya ŵaSikulu ŵanji, neko ŵaŵaŵika nsiisiŵile-ko.

¹⁴ Lomba pakulaŵile'fyo alisyolokele, kusaŋgana nikuli ŵaYesu ŵaliimakene; sombi taaŵesiŵile-po ati niŵaYesu.

¹⁵ Kumfwa ŵaYesu kaŵamweŵa ati: Wemwanakasi, nindo ulukulilila? Ninani ulukufwaya? Uyo-ye nekutamuka ati lino emulimi weŵala, nekulaŵila kuli ŵo ati: Sikulu, kani nimweŵo emwemwaŵafumya kuno, ŋgamumbule uko uku mwaŵaŵika, eli nakuŵafumya-ko.

¹⁶ ŴaYesu ŵalilaŵile kuli ye ati: Maliya! Naye alialucile, nekulaŵila kuli ŵo muŵuEbeya ati: Laboni! (ilyakwaluka ati MweŵaSambisi).

¹⁷ Kumfwa ŵaYesu kaŵamweŵa ati: Wiŋkuma; pakuti nsiŋgema ukuya kuli ŵaTata; sombi uye kuŵakwasu, ukaŵaŵule ati ndukwima ukuya kuli ŵaTata, ekuli ŵa Wisinwe namweŵo, kuli ŵaLesa ŵanji ekuli ŵaLesa ŵenu.

¹⁸ Lomba Maliya uwakuMagadala aliisile nekuŵaŵula aŵasambile ati: Naŵaŵona ŵaSikulu; kaŵili aliŵaŵulile fyonse'fyo ifi ŵalaŵile kuli ye.

¹⁹ Ili caŵele iciŋgulo caŵusiku icakasuŵa kopele ako, akasuŵa akakutatiko' muluŋgu, napamilyaŋgo ili paiselwe uko ukwali aŵasambile, pakuti pakuŵatina aŵaJuda, lomba ŵaYesu ŵaliisile nekwimakana pakati pali ŵo, nekulawila kuli ŵo ati: Uŵutende bwikale nenu.

²⁰ Peŋka pakulaŵile'fyo ŵaliŵalanjisye amapi aŵo napantiŵi. Pakuti pali fyefyo aŵasambile walisaŋgalele pakuŵaŵona ŵaSikulu.

²¹ Lomba ŵaYesu ŵalilaŵile liŵili kuli ŵo ati: Uŵutende bwikale nenu; koti nifyopele'fyo ifi ŵantumine ŵaTata, naneŵo efi ndukumutumeni mweŵo.

²² Peŋka pakulaŵile'fyo ŵalipemene pali ŵo, nekulaŵila kuli ŵo ati: Ŋgamuupoke Umupasi Uswetelele.

²³ Aŵantu ŵonse aŵo mukafitulucila ifyakuŵifya fyaŵo, ifyo fikafitulucilwa; sombi aŵo aŵa mukalekele ifyakuŵifya fyaŵo, ifyo fikalukwikele.

²⁴ Sombi Tomasi, uwailicilwe ati niDidumo, umbi uwapali ŵaŵo ikumi naŵawili, tawa-ko ili ŵaisile ŵaYesu.

²⁵ Pakuti pali fyefyo aŵasambile ŵambi ŵalilaŵile kuli ye ati: Twaŵaŵona ŵaSikulu! Sombi naye alilaŵile kuli ŵo ati: Kani tesi mfiŵone ifiweŋga fyampopo mumapi aŵo, neli kwinjisya-mo umunwe wanji mufiweŋga fyampopo, neli kwinjisya iminwe yanji muntiŵi yaŵo, tesi ncetekele-po.

²⁶ Lomba pakupite'nsiku sisanu nasitatu aŵasambile ŵaŵo ŵali muŋanda liŵili, naTomasi ŵali nakwe. Lomba, ili kwaiselwe-ko kumilyaŋgo, ŵaYesu ŵaliisile nekwimakana pakati pali ŵo, nekulaŵila ati: Uŵutende bwikale nenu.

²⁷ Peŋka ŵalilaŵile kuli Tomasi ati: Tambiko'munwe woŵe kuno, uŵone mumapi anji; nekuŵoko koŵe nako utambike kuno, winjisye muntiŵi yanji; wikanaika, sombi ucetekele.

²⁸ Lomba Tomasi aliŵaasucile ati: MweŵaSikulu ŵanji, mweŵaLesa ŵanji.

²⁹ Kumfwa ŵaYesu kaŵalaŵila kuli ye ati: Weŵo ulicetekele pakuti wambona: ŵalisyucile aŵo aŵataŵabwene-po, sombi ŵalicetekele.

³⁰ Icine netwisiŵilo tumbi utwinji ŵaYesu ŵalicitile pamenso aŵasambile ututatulembelwe-po mwibuku ili;

³¹ sombi utu tulilembelwe ati mucetekele ati ŵaYesu niŵaKlistu, Aŵana ŵaŵaLesa; nakaŵili ati pakucetekela mukaŵe nemweo mwisina lyaŵo.