Yoane 2 - Amashiwi Aba Lesa

¹ Lomba ŋgamasosi ekwali uŵuufi kumusi waKena uwamucalo caGalili; naŵanyinaŵo ŵaYesu eko ŵali.

² ŴaYesu naŵo nekwitwa pamo neŵasambile ŵaŵo kuŵuufi.

³ Lomba ili syatwite mukusila imfaina, ŵanyinaŵo ŵaYesu ŵaliŵaŵulile ati: Taŵakwete-mfaina!

⁴ Naŵo ŵaYesu ŵaliŵaasucile ati: Mbasyani ciŵele pali neŵo namweŵo mweŵanakasi? Taiŋgafika impindi yanji.

⁵ Naŵo ŵanyinaŵo ŵaliŵaŵulile aŵakutaŵa-taŵa ati: Ifintu fyonse ici ŵakumuŵuleni, mucicite.

⁶ Peŋka pali nemitondo yamabwe isanu naumo iyansicilwe koti kwisiŵila kwaŵaJuda ukwakuliswesya, yonse yalikumene umo umo amametilete kani aŵili kani atatu.

⁷ Lomba ŵaYesu ŵaliŵaŵulile ati: Isusyeni imitondo amenda. Naŵo nekwiisusya yonse paa.

⁸ Naŵo nekuŵeŵa ati: Pano kamutapula, mulukumutwalila umukulu wacitenje. Naŵo nekutwala.

⁹ Umukulu wacitenje, pakwesya ukusepula-po amenda ayo aalucile nimfaina, nekuŵulo'kwisiŵa uko syafumine (sombi aŵakutaŵa-taŵa aŵatapile amenda ewaisiwile), lombo'yo-mukulu wacitenje alimwitile uwaupile,

¹⁰ nekulaŵila kuli ye ati: Aŵantu ŵonse ŵalataŋgo'kupelaika imfaina isiweme; pantanjile, lomba ŵanwa-po isinji aŵantu, eli ŵaŋgaŵapelaika isiweme panini; sombi mweŵo mulilamine imfaina isiweme isyakucila ukufika nakuli ŵuŵuno-ŵukumo.

¹¹ Akesiŵilo ako akakutaŋga kutwisiŵilo twaŵo ŵa Yesu ŵalicitile mumusi waKena uwamucalo caGalili, nekufisulula uŵuleme bwaŵo; lomba aŵasambile ŵaŵo ŵaliŵacetekele.

¹² Panuma yafyefyo ŵaliselucile ukuya kumusi waKapanaumi, ŵonse naŵanyinaŵo neŵakwaŵo neŵasambile ŵaŵo; naŵo ŵaliikele-ko insiku isice.

¹³ Impindi iyo lomba icitenje caŵaJuda icamuciluko calipalamine; lomba ŵaYesu ŵaliile kuJelusalemi,

¹⁴ Peŋka ŵalisanjile mwitempuli aŵo aŵalukuulisya iŋombe nembelele naŵaciŵa, pamo neŵakusitula indalama ŵaliikele.

¹⁵ Peŋka'po ŵaliposele ubwembya bwamyando, nekuŵatamfya-mo ŵonse mwitempuli pamo nembelele neŋombe: nekusukumwina pansi indalama syaŵaŵo aŵakusitula, nematebulu aŵo nekwawisya:

¹⁶ popele ŵalilaŵile kuli ŵaŵo aŵalukuulisya ŵaciŵa ati: Ŵafumyeni-mo! Tekwalula Inanda yaŵaTata niŋanda yakuulila-mo!

¹⁷ Eli ŵaŋgalaŋguluka aŵasambile ŵaŵo amasiwi ayo alembelwe ati—Uŵulwisya ubwakunanda yenu bwandya.

¹⁸ Pakuti pali fyefyo aŵaJuda ŵaliŵaasucile ati: Mbakesa-kesiŵilo wakutulanjisya, kobwene ulukucite'fi-fintu?

¹⁹ Naŵo ŵaYesu nekuŵaasuka ati: Lipalayeni itempuli ili, lomba pakupita insiku sitatu ŋkaliwusya.

²⁰ Peŋka aŵaJuda ŵalilaŵile ati: Yalipitile imyaka amakumi ane naisanu muli isanu naumo, umu ŵeŵacila itempuli ili; peŋka weŵo ukaliŵusye pansiku sitatu?

²¹ Sombi ŵaYesu ŵalilaŵile ifyetempuli lyamuŵili waŵo.

²² Pakuti pali fyefyo, pakuŵusiwa ŵo paŵafwile, eli ŵalaŋgulucile aŵasambile ŵaŵo ati ŵalilaŵile' fyo; naŵo nekucetekela amalembo, pamo nemasiwi ayo ŵalaŵile ŵaYesu.

²³ Pampindi yacitenje camuciluko, ili ŵaikele mujelusalemi, aŵenji ŵalicetekele mwisina lyaŵo ili ŵabwene utwisiŵilo uto utu ŵalukucita.

²⁴ Sombi ŵaYesu taŵalukulicetekela kuli ŵo, pakuti ŵaliŵesiŵile aŵantu ŵonse;

²⁵ nakaŵili pakuti taŵafwaile ati aŵantu ŵonse neli umo akasimike ifyawuntunsi; pakuti ŵo aŵene ŵaliisiŵile fyonse ifili muŵantunsi.