Yoane 19 - Amashiwi Aba Lesa

¹ Pilati lomba aliŵekete ŵaYesu nekuŵakupaula.

² Naŵo aŵasilikani ŵaliposele umuntinya wamvuŋga, nekuŵika napamutwi waŵo, nekuŵafwika nemwinjila ukasicile;

³ peŋka ŵaliisile kuli ŵo nekulaŵila ati: Mutende, wemfumu yaŵaJuda! peŋka nekumupamala nemapi.

⁴ Lomba Pilati alifumine liŵili, nekulaŵila kuli ŵo ati: Ŵoneni, ndukumufumisya pesonde pali mweŵo, ati mwisiŵe ati neŵo nsibwene-po muli ye neli keŵo akakumuŵipila.

⁵ Lomba ŵa Yesu ŵalifumine ili ŵafwite umuntinya wamyuŋga, nemwinjila ukasicile. Naye Pilati alilaŵile kuli ŵo ati: Ŵoneni umuntu ŋgu!

⁶ Pakuti pali fyefyo aŵapapatilisi aŵakulu nefilolo, pakuŵaŵona, ŵaliŵilicisye ati: Mutalikeni, mutalikeni! Pilati naye alilaŵile kuli ŵo ati: Mweŵo mweŵene mumutwale, mumutalike; pakuti neŵo nsibwene-po muli ye neli keŵo akakumuwipila,

⁷ Naŵo aŵaJuda ŵalimwasucile ati: Sombi fweŵo tuli nefunde; nakwifunde'lyo ukwelelwa ati afwe, pakuti alukulieŵa ati nineMwana waŵaLesa.

⁸ Lomba Pilati, pakumfwa amasiwi ayo, aliŵele nemwenso ukucila;

⁹ peŋka nekwinjila liŵili mwilaŵililo, nekuŵepusya ŵaYesu ati: Mbawe ulitulile kwisa? Sombi ŵaYesu taŵamwasucile-po.

¹⁰ Pakuti pali fyefyo Pilati alilaŵile kuli ŵo ati: Tolukulaŵila kuli neŵo? Kansi tawisiŵile ati ndi neŵukulu ubwakukukakulula, kaŵili ndi neŵukulu ubwakukutalika?

¹¹ ŴaYesu nekumwasuka ati: Ŋga tamupelwe uŵukulu ubwakufuma kwiulu, ŋga tamuli-po neŵukulu pali ncŵo; pakuti pali fyefyo uwandetele ukumupeleni mweŵo, uyo euli nekuŵifya ukwakucila.

¹² Pakumfwe'fyo Pilati alukufwavo'kuwakakulula: sombi aŵaJuda ŵaliŵilicisye ati: Kani mumukakulule uyu, tamuli-po ciŵusa caŵaKaisa, pakuti aŵantu ŵonse uyo ulukulieŵa nimfumu eulukuŵaalucila ŵaKaisa.

¹³ Pakuti pali fyefyo Pilati, pakumfwa amasiwi ayo, aliŵafumisye ŵaYesu pesonde, nekwikala peteŵe ilyakusololwelapo imilandu pamupunda apailicilwe ati Luŵansa lwaMabwe, sombi muŵuEbeya ati niGabata.

¹⁴ Akasuŵa ako kalukwansicilwa pamuciluko; kaŵili akasuŵa kali pakati keulu, Peŋka Pilati alilaŵile kuŵaJuda ati: Ŵoneni, Imfumu yenu nji!

¹⁵ Eli ŵaŵilicisye ati: Mufumyeni, mufumyeni! Mumutalike! Pilati naye nekuŵepusya ati: Njitalike Imfumu yenu? Aŵapapatilisi aŵakulu ŵaliasucile ati: Tatukwete imfumu imbi sombi ŵeŋka waKaisa emfumu yesu.

¹⁶ Lomba Pilati aliŵaposele kuli ŵo mukutalikwa. Naŵo ŵaliŵapokele ŵaYesu nekuŵatwala.

¹⁷ Naŵo ŵalifumine ili ŵapintile aŵene umutaliko waŵo, ukuyo'ko ukwailicilwe ati nikwiKoŵoŋgo, sombi muŵuEbeya ati niGolagota.

¹⁸ Eko ŵaŵatalicile, naŵambi naŵo ŵaŵili pamo naŵo; umbi kumbali yacipiko, umbi naye kumbali yalwine, ŵaYesu aŵene pakati.

¹⁹ Kaŵili Pilati alilembele umutalilo nekuuŵika pamutaliko. Palilembelwe ati: YESU UWAKUNASALETI, IMFUMU YAŴAJUDA.

²⁰ Lomba aŵaJuda aŵenji ŵalipendele umutalilo uyo, pakuti apo apatalicilwe ŵaYesu pali apepi napamusi; kaŵili palilembelwe muŵuEbeya namuŵuEla namuŵuLoma.

²¹ Pakuti pali fyefyo aŵapapatilisi aŵakulu ŵaŵaJuda ŵalilaŵile kuli Pilati ati: Mwilemba ati—Nimfumu yaŵaJuda; sombi ati umwine alukulieŵa ati—Ninemfumu yaŵaJuda.

²² Eli aŋgaasuka Pilati ati: Ifyo ifi nalemba'kale, nalemba.

²³ Peŋka aŵasilikani, ili ŵaŵatalicile ŵa Yesu, ŵaliŵulile ifyakufwala fyaŵo nekulekanya pane, ukwaŵana-aŵana aŵasilikani ŵonse; kaŵili nemwinjila; sombi umwinjila tawakwete-milundo, wali lukoso uwakuposa ukufumya kwiulu ukufika nakunsi.

²⁴ Pakuti pali fyefyo ŵaliŵulansyenye ati: Twiukwamala, sombi ŋgatucite icipa, tuŵone nemwine uwakupoka; ifyo ati amalembo apelelwe pamo alaŵile ati: Ŵaliaŵene ifyakufwala fyanji, Napamwinjila wanji napo ŵalicitile icipa. Efyopele'fyo ifi ŵacitile aŵasilikani.

²⁵ Lomba apepi napamutaliko waŵaYesu paliimakene ŵanyinaŵo, neŵakwaŵo ŵanyinaŵo, Maliya umukasi wakwe Klopa, naMaliya uwakuMagadala.

²⁶ Lomba ŵaYesu pakuŵona ŵanyinaŵo nemusambile uyo ŵatemenwe ŵaliimakene apo, ŵalilaŵile kuli ŵanyinaŵo ati: Mweŵanakasi, ŵoneni, umwana wenu ŋgu!

²⁷ Eli ŵaŋgalaŵila kumusambile uyo ati: Ŵona ŵanoko mba! Lomba ukutatika nakumpindi iyo umsambile uyo aliŵatwite kwaŵo umwine.

²⁸ Lomba panuma pali fyefyo, ŵa Yesu, pakuti ŵaliisiŵile ati ifintu fyonse pano fyakonsiwa, ŵalilaŵile ati: Ndi necilaka! Ifyo ati amalembo akumanine.

²⁹ Kopele uko ŵaliŵicile-ko nemusasi uwiswile ifinega; peŋka ŵalisumpwilemo nesiponje mwifinega, nekuŵika namucipeti caesobi, nekusuntula ukufisya namukanwa kaŵo.

³⁰ Lomba ŵaYesu, pakupoke'finega ŵalilaŵile ati: Pano kwakonsiwa! Eli ŵalebwisye umukosi waŵo, nekuleko'mupasi waŵo.

³¹ Pakuti pali fyefyo aŵaJuda ŵalimukombetele Pilati ati aŵo aŵatalikwa amolu aŵo akonalwe, ŵafumisiwe-po; fiiŋgekala ifitumbi pamutaliko pakasuŵa kasabata, pakuti kalukwansicilwa pamuciluko; nako akasuŵa ako akasabata kakulu.

³² Eli ŵaisile aŵasilikani nekwakonala amolu awakutaŋga neawoyo uwatalicilwe pamo naŵo;

³³ sombi pakufika kuli ŵaYesu, nekuŵona ati ŵafwa' kale, taŵaŵakonawile-po amolu;

³⁴ sombi umbi umusilikani aliŵatibwile muntiŵi ifumo; peŋka nemilopa nemenda alipulilile ukupokomoka.

³⁵ Uwabwene'fyo alukufisimika, nako ukusimika kwakwe kwacine; naye aliisi ati alukulaŵile'fyacine, ati namweŵo mucetekele.

³⁶ Pakuti ifintu ifyo fyaliŵele, ati fikapelelwe pamo nemalembo ayo ati: Uyo, ifupa lyakwe neli limo talikakononwa-po.

³⁷ Nakaŵili ilembo limbi ati: Ŵakalukumulolesya-po uyo uyu ŵatibwile.

³⁸ Panuma pali fyefyo-fintu, Josefi uwakuAlimatea, uwali musambile waŵaYesu, sombi wakumfiso pakuti alukuŵatina aŵaJuda, alimulombele Pilati ati ŋgancifumye icitumbi caŵaYesu; naye Pilati alisumine. Pakuti pali fyefyo aliisile nekucifumya icitumbi caŵo.

³⁹ Kaŵili kwaliisile naNikodemo, uwaisile pakutaŋga kuli ŵa Yesu uŵusiku, ili apintile mola naŵaaloe awapataŋkene pamo; aŵo ukwesya kwaŵo kwali koti nimpondo umwanda umo.

⁴⁰ Lomba ŵoŵilo ŵaliciŵulile icitumbi caŵa Yesu nekucipamba munsalu syambafuta pamo nefinuncile bwino, koti kwisiŵila kwaŵaJuda ifi ŵacita pakusike'mfwa.

⁴¹ Kopele uko uku ŵatalicilwe kwali neŵala; mwiŵale'lyo mwali neceŋgo lyaŵukumo, umo tamuŋgawikwa-mo neli umo umuntu.

⁴² Peŋka mopele umo ŵaliŵaŵicile ŵaYesu, pakuti impindi yalimanamine napamuciluko waŵaJuda; pakuti ilyoceŋgo lyali apepi.