Yoane 18 - Amashiwi Aba Lesa

¹ Lomba ŵaYesu, ili ŵalaŵileamasiwi ayo, ŵalikumbulucile pamo neŵasambile ŵaŵo, nekwaŵuka akanika kaKedilono, uko ukwali iŵala; muli lyelyo ŵaliinjile pamo neŵasambile ŵaŵo.

² Kaŵili naJuda, uwaŵaloŵele, aliisiŵileko uko; pakuti ŵaYesu ŵalukutampilako uko pamo neŵasambile ŵaŵo.

³ Peŋka Juda, ili apokele insoko yaŵasilikani nefilolo kuŵapapatilisi aŵakulu neŵaFalisi, aliisile nenyale nemimosyo nefyakulifuna-ko.

⁴ Lomba ŵaYesu, pakuti ŵalukwisiŵa fyonse ifintu ifilukwisa kuli ŵo, ŵaliŵacinsisye, nekulaŵila kuli ŵo ati: Mulukufwaya nani?

⁵ Naŵo nekuŵaasuka ati; NiYesu wakuNasaleti. ŴaYesu kaŵalaŵila ati: NDI! NaJuda naye, uwaŵaloŵele, aliimakene naŵo.

⁶ Peŋka' po pakuŵaŵula ati—NDI! ŵalibwelele ubwifutenuma, nekuwila pansi.

⁷ Pakuti pali fyefyo ŵaliŵepwisye liŵili ati: Mulukufwaya nani? Naŵo ati: NiYesu wakuNasaleti.

⁸ ŴaYesu nekwasuka ati: Nali namuŵuleni ati—NDI! lomba, kani mulukumfwaya neŵo, muŵaleke aŵa, woŋgoloke.

⁹ Ifyo ati amasiwi ayo ŵalaŵile akumanine ati: Pali ŵaŵo aŵa mwampele nsilufisye-po neli umo.

¹⁰ Lomba Simoni Petilo, uwali nempoko, aliisomwene, nekumupama umupyunjisi wamupapatilisi umukulu, nekumukwempula ukutwi kwakwe ukwakulwine. Isina lyamupyunjisi uyo niMaleko.

¹¹ Pakuti pali fyefyo ŵaYesu ŵalilaŵile kuli Petilo ati: Bwelesye'mpoko mucuŵo! Iŋkomeci iyo iyi wampele ŵaTata, kansi nsikanwina-mo?

¹² Peŋka insoko yafita iyo necilolo caiyo neŵasilikani ŵaŵaJuda ŵaliŵekete ŵaYesu nekuŵakaka;

¹³ lomba ŵalitanjile ukuŵatwala kuli Anasi, pakuti ye ewisi-fyala Kayafa, uwali mupapatilisi umukulu umwaka uyo.

¹⁴ Uyo-Kayafa ewaŵafundile aŵaJuda ati: Ukwelelwa ati umuntu umo akafwile aŵantu.

¹⁵ Lomba Simoni Petilo aliŵalondele ŵaYesu, fyopele'fyo naumbi umusambile umuŵyakwe; uyo-musambile aliisiŵilwe kumupapatilisi umukulu; lomba aliinjile pamo naŵaYesu kuluŵansa lwamupapatilisi umukulu,

¹⁶ Sombi Petilo waliimakene pamulyaŋgo pesonde. Popele apo uyo-musambile umbi, uwaisiŵilwe kumupapatilisi umukulu, alifumine nekulaŵila kumwanakasi uwalukupembelela pamulyaŋgo, nekumwinjisya Petilo.

¹⁷ Lomba uyo-mwanakasi uwalukupembelela pamulyaŋgo, alilaŵile kuli Petilo ati: Kani naweŵo uli wapaŵasambile ŵamuntu uyo? Naye ati: Yo, nsili nineŵo.

¹⁸ Lomba paliimakene neŵapyunjisi neŵasilikani apo apo ŵakuncile umulilo wamakalasi, pakuti pali impepo; lomba ŵalukonta; naye Petilo aliimakene naŵo ukulukonta.

¹⁹ Peŋka umupapatilisi umukulu aliwepwisye ŵaYesu ifyakuŵasambile ŵaŵo, nefyaŵusambisi bwaŵo.

²⁰ ŴaYesu ŵalimwasucile ati: Nalukulaŵila kuŵantunsi ŵonse apaswetele; insiku syonse nalukusambisya mumasunagoge namwitempuli, umu ŵaŵuŋganina aŵaJuda ŵonse; nsinalaŵile-po neli kantu kumfiso;

²¹ mbanindo mulukunjipusisya neŵo? Ŋgamuŵepusye aŵo aŵaumfwile ifyafyefyo ifi nalukulaŵila kuli ŵo; ŵoneni-ko aŵo ŵalifiisi ifyo ifi nalukulaŵila.

²² Lomba pakulaŵile'fyo ŵo, umusilikani umbi uwaimakene apo aliŵapamine ŵaYesu ulupi, nekulaŵila ati: Ulukwasuke'fyo umupapatilisi umukulu?

²³ ŴaYesu nekumwasuka ati: Kani nalaŵile'fiŵipile ŋgosimike ifiŵipile'fyo; sombi kani nalaŵile'fiweme, mbanindo ulukumpamina?

²⁴ Peŋka'po Anasi aliŵatumine aŵakacilwe kuli Kayafa umupapatilisi umukulu.

²⁵ Lomba Simoni Petilo aliimakene ukulukonto'mulilo. Lomba ŵalimwipwisye ati: Kani naweŵo uli wapaŵasambile ŵakwe? Naye nekukana ati: Nsili nineŵo.

²⁶ Naumbi umupyunjisi wamupapatilisi umukulu, umukwaŵo uyo uwakwempucile ukutwi kuli Petilo, alilaŵile ati: Teweŵo nabwene mwiŵala pamo nawoyo?

²⁷ Pakuti pali fyefyo Petilo alikene liŵili; nempindi iyo yopele nakombolwe nekulila.

²⁸ Peŋka'po ŵaliŵakulicile ŵaYesu ukuwafumya kuli Kayafa, nekuwatwala kwilaŵililo. Lomba lucelocelo. Sombi tawainjile-mo aŵene mwilaŵililo, ŵeŋgesa-kusilulula, sombi ati ŵesiŵe ukulya umuciluko.

²⁹ Pakuti pali fyefyo Pilati walifumine nekuya kuli ŵo, nekulaŵila ati: Mbawisa-mulandu mulukumusinina uyu-muntu?

³⁰ Naŵo ŵalimwasucile ati: Uyu, ŋga taali nimbifi, ŋga tatumuletele-po kuli mweŵo.

³¹ Pakuti pali fyefyo Pilati aliŵeŵele ati: Mupinteni mweŵene, musololole nakwe koti mafunde enu. Sombi aŵaJuda ŵalimwasucile ati: Fweŵo tatupelwe uŵukulu ubwakwipayo'muntu.

³² Ifyo, ati amasiwi aŵaYesu akumanine, ayo alaŵile akulanjisya amekalilo amfwa iyo akafwa.

³³ Pakuti pali fyefyo Pilati aliinjile liŵili mwilaŵililo, nekuŵeta ŵaYesu nekuŵepusya ati: Kani cine uli nimfumu yaŵaJuda?

³⁴ ŴaYesu ŵaliasucile ati: Kani nimweŵo mweŵene mulukufilaŵile'fyo? Kani niŵambi ŵamuŵuleni ifyo ifyakuli neŵo?

³⁵ Pilati naye nekwasuka ati: Kani naneŵo ndi muJuda? Temusyoŵo woŵe wemwine neŵapapatilisi aŵakulu eŵakuleta-ko weŵo kuli neŵo! Walicitile'ndo weŵo?

³⁶ ŴaYesu nekwasuka ati: Uŵufumu bwanji taŵuli bwamucalo cino icapansi, koku; ŋga ŵuli bwamucalo cino uŵufumu bwanji, neŵapyunjisi ŵanji ŋga ŵalukulwa, niiŋgesa-kuposelwa kuŵaJuda; sombi ŵukumo uŵufumu bwanji taŵutulile pano, yo.

³⁷ Pakuti pali fyefyo Pilati alilaŵile kuli ŵo ati: Kani niwemfumu lomba? Kumfwa ŵaYesu ŵaasuka ati: Nimweŵo mwaŋgewa ŵumfumu. Pakuti pali fifi epo nafyelwe; kaŵili pakuti pali fifi epo naisile pacalo capansi, ati nakulukwikele nimboni iyakuli ŵucine. Aŵantu ŵonse uwaŵucine alomfwe'siwi lyanji.

³⁸ Pilati naye aliŵepwisye ati: Mbaŵucine ŵuli syani? Peŋka pakulaŵile'fyo alifumine liŵili ukuya kuŵaJuda, nekuŵaŵula ati: Neŵo nsibwene-po muli ye neli keŵo akakumuŵipila uyu-muntu.

³⁹ Sombi mweŵo muli nekwisiŵila ati imyaka yonse pampindi yamuciluko neŵo mukakulwileni-po umuntu umo; pakuti pali fyefyo mulukufwaya ati mukakulwileni-po imfumu yaŵaJuda?

⁴⁰ Eli ŵaŵilicisye liŵili ati: Uyu teye, sombi niBalaba! Uyo-Balaba emuno.