Yoane 16 - Amashiwi Aba Lesa

¹ Ifintu ifyo namuŵuleni mwiŋgesakulitutula.

² Ŵakamuposyeni mumasunagoge; icine, impindi ikesa, lomba aŵantu ŵonse ukamwipayeni akalaŋguluka ati ndukuŵapyunjila ŵaLesa.

³ Kaŵili ifyo ŵakamuciteni pakuti taŵaŵesi ŵaTata, neli kunjisiŵa neŵo.

⁴ Sombi ifintu ifyo namuŵuleni ŵukumo, ati pakwisa impindi yafiko mukafilaŋguluke ati nalimuŵulileni akale. Kaŵili pakutaŋga nsinamuŵulileni ifyo, pakuti kancili nenu.

⁵ Sombi ŵukumo ndukuya kuli ŵaŵo aŵantumine; naŋgawe'fyo pali mweŵo tapali-po uwakunjipusya ati: Mbamulukuya kulipi?

⁶ Sombi pakuti namuŵuleni ifyo, insoni syaisula mumitima venu.

⁷ Sombi ndukumuŵuleni ŵucine, ati ukumwelelweni mweŵo ati ŋkakumbuluke; pakuti kani nsikakumbuluka-ko, Umupalamisi teti akese kuli mweŵo; sombi kani ŋkaya neŵo, ŋkamutuma kuli mweŵo.

⁸ Naye ili akesa akalukwisiŵisya aŵapacalo capansi iceŵo cafyakuŵifya, necafyakuluŋgama, necafyakusololola:

⁹ iceŵo cafyakuŵifya, pakuti taŵalukucetekela muli neŵo;

¹⁰ iceŵo cafyakuluŋgama, pakuti ndukuya kuli ŵaTata, namweŵo tamukalukumbona-po liŵili;

¹¹ iceŵo cafyakusololola, pakuti imfumu yapacalo capansi ŵasololola nayo.

¹² Nafimbi ifintu ifinji ncili nafyo ifyakumuŵuleni, sombi mweŵo tamwisi ukufipoka ŵukumo.

¹³ Sombi ili ukesa uyoMupasi wa Ŵucine, ukamutanjilileni mweŵo muli ŵucine ŵonse; pakuti tokalaŵila akufuma kuwine weŋka: sombi ifyo fyopele ifi ukomfwa kuli ŵaTata, efyo ukalaŵila; kaŵili ukamufisulwileni ifyo-fintu ifikesa.

¹⁴ Nawo ukandemya neŵo, pakuti ukaŵula-ko ifyanji nekumufisulwileni mweŵo.

¹⁵ Ifintu fyonse ifi ŵali nafyo ŵaTata fyanji: pakuti pali fyefyo efi nalaŵila ati: Ukaŵula-ko ifyanji, nekumufisulwileni mweŵo.

¹⁶ Yasyala-ko impindi inini, lomba tamukambona-po; kaŵili naimbi Impindi inini, lomba mukambona liŵili; pakuti ndukuya kuli ŵaTata.

¹⁷ Pakuti pali fyefyo aŵasambile ŵaŵo ŵambi ŵalukwipusyansyanya ati: Mbefyo fyasyani ŵalukulaŵila kuli fweŵo ati: Yasyalako impindi inini, lomba tamukambonapo; kaŵili naimbi impindi inini, lomba mukambona liŵili? nakaŵili ati: Pakuti ndukuya kuli ŵaTata?

¹⁸ Peŋka ŵo ati: Mbefyo fyasyani ŵalukulaŵila ati: Impindi inini? Tatufiisi ifyo ifi ŵalaŵila.

¹⁹ Naŵo ŵaYesu ŵaliisiŵile ati, ŵalukufwayo'kunjipusya fimbi, eli ŵalaŵile kuli ŵo ati: Kani mulukwipusyansyanya ifyo ifi nalaŵila ati: Yasyala-ko impindi inini, lomba tamukambona-po; kaŵili naimbi impindi inini, lomba mukambona liŵili?

²⁰ Cine cine, ndukumuŵuleni ati mweŵo mukalile'misowa, mukaaŵaila; sombi aŵapacalo capansi wakasaŋgalala: mweŵo mukaŵa nensoni, sombi insoni syenu sikaaluka kusaŋgalala.

²¹ Umwanakasi, pakupotwa, ali nensoni, pakuti impindi yakwe yafika; sombi pakufyala umwana, taalaŋguluka-po liŵili ukukululuka kwakwe, pakuti pakusaŋgalala ati umuntu afyalwa mucalo.

²² Pakuti pali fyefyo namweŵo ŵukumo muli nensoni; sombi ŋkamuwoneni liŵili, eli ikasaŋgalala imitima yenu; nakoko-kusaŋgalala kwenu tapali muntu ukakufumya-mo muli mweŵo.

²³ Akasuŵa ako tamukanjipusya-po neli kantu. Cine cine, ndukumuŵuleni ati ifintu fyonse ici mukalomba kuli ŵaTata ŵakamupeleni mwisina lyanji.

²⁴ Akale tamwalukulomba neli kantu mwisina lyanji: ŵukumo kamulukulomba, eli mukapoka, ati ukusaŋgalala kwenu kukakumane.

²⁵ Ifintu ifyo namuŵuleni mufyakupalanya; sombi impindi ikesa insikalaŵila-po nenu liŵili mufyakupalanya, sombi ŋkamuwulisisyeni apaswetele ifyakuli ŵaTata.

²⁶ Akasuŵa ako mukalukulomba mwisina lyanji; kaŵili nsilukulaŵila kuli mweŵo ati ŋkamupapatilileni kuli ŵaTata;

²⁷ pakuti ŵaTata aŵene ŵalukumutemweni; pakuti mwalukuntemwa neŵo, nekucetekela ati nalifumine kuli ŵaTata.

²⁸ Nalifumine kuli ŵaTata, nekwisa mucalo capansi; kaŵili ndukufuma-po pacalo capansi, nekubwelela kuli ŵaTata.

²⁹ Kumfwa aŵasambile ŵakwe ati: Ŵoneni, ŵukumo mulukulaŵilila apaswetele; tamulukupalanya lukoso, neli panini.

³⁰ Pano tuliisi ati mweŵo mulifiisi ifintu fyonse; kaŵili ati tamulukufwaya ati ŵamwipusyeni neli ŵantu ŵonse; pakuti pali fyefyo tulukucetekela ati icine mwalifumine kuli ŵaLesa.

³¹ Naŵo ŵaYesu nekuŵaasuka ati: Kani cine mulukucetekela ŵukumo?

³² Umfweni, impindi ilukwisa, icine kale yaisa, iyi mwakupalaŋganisiwa mwense ukuya mwenu mwenu, nekunsya neŋka; sombi nsili-po neŋka, pakuti ŵaTata ŵali naneŵo.

³³ Ifintu ifyo namuŵuleni, ati mwakulukuli neŵutende muli neŵo. Mucalo capansi muli nefyakukululuka; sombi koseni mumitima; neŵo ndicikomekele icalo capansi.