Yoane 15 - Amashiwi Aba Lesa

¹ Neŵo nineMufaina Uwine; ŵaTata eŴalimi.

² Imisimba yonse ili muli neŵo, utawikata-po ifisepo, ŵalaufumya; kaŵili yonse uwikata ŵalauswesya ati ukekate nafimbi ifisepo.

³ Ŵukumo muliswetele, pakuti pesiwi namuŵuleni.

⁴ Mwikale muli neŵo, naneŵo njikale muli mweŵo. Koti nifyopele'fyo ifi tawisi umusimba uwine ukwikata-ko ifisepo, uwakuŵulo'kwikala mumufaina; fyopele'fyo namweŵo, kani muŵule ukwikala muli neŵo, tamwisi ukwikata-po ifisepo.

⁵ Neŵo nineMufaina; mweŵo nimwemisimba. Uyo uwikala muli neŵo, naneŵo ukwikala muli ye, uyo akekata ifisepo ifinji; pakuti apakuŵula naneŵo, mweŵo mweŵene tamwisi-po ukucita neli kantu.

⁶ Kani umuntu taekala muli neŵo, aŋgaposwa kwisonde koti musimba, nekuuminina; lomba aŵantu nekwiwuŋganisisya, nekwiposa mumulilo, nayo nekupya.

⁷ Kani mulukwikele muli neŵo, nemasiwi anji nekulukwikele muli mweŵo, ifintu fyonse ici mulukufwaya, kamulukucilomba, peŋka cikalukuli kuli mweŵo.

⁸ ŴaTata ŵalicindicilwe muli fifi, ati mwikate ifisepo ifinji; ifyo mukekala ŵasambile ŵanji.

⁹ Koti nifyopele' fyo ifi ŵantemenwe ŵaTata, naneŵo fyopele'fyo nalimutemenweni; mwikale mweŵo muŵutemwe bwanji.

¹⁰ Kani mwakulukwalama amafunde anji, eli mwakulukwikele muŵutemwe bwanji; koti nifyopele'fyo ifi nalukulama amafunde aŵaTata neŵo, nekulukwikele muwutemwe bwaŵo.

¹¹ Ifintu ifyo namuŵuleni ati ukusaŋgalala kwanji kukalukwikele muli mweŵo, nako ukusaŋgalala kwenu nekulukufula.

¹² Ifunde lyanji nilili, ati mulukutemwansyanya, koti nifyopele'fyo ifi mutemenweni naneŵo.

¹³ Tapali umuntu uli neŵutemwe ubwakucilo'ŵukulu napali ŵuŵu, ati umuntu apose umweo wakwe pakuti pafiŵusa fyakwe.

¹⁴ Kani mulukucite'fintu ifyo ifi mufundeni, ifyo muli fiŵusa fyanji.

¹⁵ Nsikamwilikeni liŵili ati nimweŵapyunjisi ŵanji, pakuti umupyunjisi taafiisi ifyo ifi ŵalukucita ŵawisikulu; sombi namwilikeni muli fiŵusa, pakuti ifintu fyonse ifi naumfwile kuli ŵaTata, ifyo namwisiŵisyeni mweŵo.

¹⁶ Mweŵo tamwansalulwile; sombi neŵo enenamusalulwileni, nekumwikalikeni ati muye, mukekate ifisepo, nefisepo fyenu ati fikekalilile; ati ifintu fyonse, ici mukalomba kuli ŵaTata mwisina lyanji, ŵakamupeleni.

¹⁷ Ifintu ifyo ndukumufundeni ati mukalukutemwansyanya.

¹⁸ Kani ŵalukumufitilweni aŵapacalo capansi, ifi muliisiŵile ati ŵalitanjilile pali mweŵo ukumfitilwa naneŵo.

¹⁹ Ŋga muli ŵapacalo capansi, neŵapansi pano ŋga ŵalimutemenweni ati ŵaŵyesu; sombi pakuti tamuli ŵapacalo capansi, sombi nalimusalulwileni pali ŵo, pakuti pali fyefyo aŵapacalo capansi ŵalukumufitilweni,

²⁰ Mulaŋguluke isiwi ilyo namuŵuleni ati—Umupyunjisi taacilo'ŵukulu napali ŵawisikulu. Pakuti ŵalukuŋkululusya neŵo, namweŵo ŵakamukululusyeni. Ŋga ŵalukulama amasiwi anji, ŋga ŵakalukulama nemasiwi enu mweŵo.

²¹ Sombi ifintu ifyo fyonse ŵakalukumuciteni pakuti pesina lyanji, pakuti taŵaŵesi aŵo aŵantumine.

²² Ŋga nsiisile mukuŵaŵula, ŋga taŵali-po nemulandu wakuŵifya; sombi ŵukumo taŵakwete icakufimba-po pakuŵifya kwaŵo.

²³ Uyo umfitilwa neŵo, alafitilwa naŵaTata.

²⁴ Ŋga nsinacitile pakati pali ŵo imilimo iyo itaŵalukucitapo ŵambi ŵonse neli umo, ŋga taŵali-po nemulandu wakuŵifya. Sombi ŵukumo ŵatuŵona nekutufitilwa naneŵo naŵaTata.

²⁵ Sombi ifyo ati fipelelwe pamo nemasiwi alembelwe mumafunde aŵo ati: Ŵalimfitilwe neŵo ukwakumfumbucila.

²⁶ Sombi ili akesa Umupalamisi, uyo uŋkatuma kuli mweŵo, ukufuma kuli ŵaTata, Umupasi waŵucine uwakufuma kuli ŵaTata, uyo ukansimicila.

²⁷ Namweŵo mulukusimika, pakuti mwali naneŵo napakutaŋga.