Yoane 13 - Amashiwi Aba Lesa

¹ Lomba ili taciŋgafika icitenje camuciluko, ŵa Yesu ŵaliisiŵile ati impindi yanji yaisa iyakufuma-mo neŵo mucalo capansi nekuya kuli ŵaTata; kaŵili pakuti ŵo ŵalukuŵatemwa aŵantu ŵaŵo aŵali mucalo capansi, ŵaliŵatemenwe ukufika nakumpindi iyakupela-ko.

² Peŋka pakulukulya umulalilo, lomba umusensesi kale ainjisye mumutima wakwe Juda lsikaliote, umwana wakwe Simoni, ukufwaya ukwakuŵaloŵela ŵaYesu.

³ Naŵo ŵaYesu ŵaliisiŵile ati ŵaTata ŵampela muminwe yanji ifintu fyonse; kaŵili ati ndifumine kuli ŵaLesa, nakuli ŵaLesa nako ndukuya;

⁴ lomba ŵaliimine apo ŵalukulya, nekufula neminjila yaŵo; peŋka ŵaliŵulile netaŵulu, nekulikaka paluŵunda.

⁵ Eli waitile amenda mumusambilo, nekutatiko'kusamfya aŵasambile kumakasa, nekwasumala kwitaŵulu ilyo ŵakacile muluŵunda.

⁶ Fyopele'fyo ŵalificile nakuli Simoni Petilo; sombi alilaŵile kuti ŵo ati: MweŵaSikulu, mweŵo emwe mwakunsamfya kumakasa neŵo?

⁷ ŴaYesu ŵalimwasucile ati: Ifi ifi ndukucita taufiisi ŵukumo, sombi ukafiisiŵa pantanjile.

⁸ Kumfwa Petilo kaaŵeŵa ati: Nensiku syonse tamukansamfya-po kumakasa anji neŵo! ŴaYesu kaŵamwasuka ati: Kani tesi ŋkusamtye-po, ifyo taukwete-po kantu kuli neŵo.

⁹ Simoni Petilo nekulaŵila kuli ŵo ati: MweŵaSikulu, mwinsamfya neŵo kumakasa kweŋka: sombi nakumawoko, nakumutwi musamfye.

¹⁰ ŴaYesu nekulaŵila kuli ye ati: Uwasamba'kale pamuŵili ponse, taalukufwaya fimbi, sembi kusamba kumakasa kweŋka, pakuti aliswetele limo; namweŵo muliswetele; sombi tamuswetele mwense.

¹¹ Pakuti ŵaliisiŵile uyo uwakuŵaloŵela; pakuti pali fyefyo epo ŵalaŵile ati—Tamuswetele mwense.

¹² Lomba, ili ŵaŵasamfisye kumakasa, nekuŵule'minjila yakwe, nekusamina liŵili, ŵalilaŵile kuli ŵo ati: Mulukwisiŵe'fyo ifi nacita kuli mweŵo?

¹³ Mulaŋgewa ati nimweŵaSambisi, pambi ati niŵaSikulu; ifyo mulukulaŵila bwino, pakuti ifyo efi ndi.

¹⁴ Peŋka kani neŵo, neSikulu nemuSambisi, namusamfyeni kumakasa, ukumwelelweni namweŵo ukulukusamfyansyanya kumakasa.

¹⁵ Pakuti namupeleni icakutuntulula-ko, ati namweŵo muŋgacita koti nifyopele'fyo ifi namuciteni.

¹⁶ Cine cine, ndukumuŵuleni ati, umupyunjisi taacilo'wukulu napali ŵawisikulu; neli niŋkalamba taicila-po uŵukulu napaŵaitumine, koku.

¹⁷ Kani mulukwisiŵe'fyofintu, mulisyucile kani mulukuficita.

¹⁸ Nsilukumweŵeni mwense; ndiŵesi aŵo nasalulwile; sombi ati fikapelelwe pamo nemalembo, ati: Uyo ulukulya pamo naneŵo siŋkwa wanji aimisya pali neŵo akasisilo kakwe.

¹⁹ Ukufuma kumpindi ino, nakulukumuŵuleni ifintu ili tafiŋgacitwa, ati pakucitwa mukacetekele ati NDI.

²⁰ Cine cine, ndukumuŵuleni ati—Ulukumupokelela uyu natuma, eulukumpokelela neŵo; kaŵili uyo ulukumpokelela neŵo, eulukuŵapokelela naŵaŵo aŵantumine.

²¹ Ili ŵalaŵile'fyo ŵaYesu nemutima nekulemuka, peŋka ŵalisimicile ati: Cine cine, ndukumuŵuleni ati apa apo muli mweŵo umbi akundoŵela.

²² Lomba aŵasambile ŵalukulolansyanya ili ŵapalakanya ati mbaninani ŵalukweŵa?

²³ Naumbi umusambile waŵo, uyu ŵatemenwe ŵaYesu, alukweyamina muntiŵi yaŵaYesu.

²⁴ Lomba Simoni Petilo alimucebwile, nekulaŵila ati: Tuŵule ninani ŵalukweŵa.

²⁵ Naye, ili eyamine muntiŵi yaŵaYesu, alilaŵile kuli ŵo ati: MweŵaSikulu, mboyo ninani mwaeŵa?

²⁶ Kumfwa ŵaYesu kaŵaasuka lomba ati: Niwoyo unakutantila-mo umukusu nekupela. Elyo ŵatantile-mo umukusu, nekuuŵula, nekumupela Juda, umwana wakwe Simoni Isikaliote.

²⁷ Peŋka panuma yamukusu epo ainjile Satana muli ye. Pakuti pali fyefyo ŵaYesu ŵalilaŵile kuli ye ati: Ifi wakucita, uficite bwaŋgu,

²⁸ Sombi pali ŵaŵo aŵasamine-po petebulu tapali-po neli umo uwaisiŵile iceŵo ici ŵalukumweŵa.

²⁹ Pakuti ŵambi ŵalukulaŋguluka ati—Pakuti Juda euli nemukopa, lino ŵaYesu ŵalukumweŵa ati, ufiule ifintu ifyo ifi twakufwaya pakuti pacitenje; neli ati, upele simbi kuwapeŋgele.

³⁰ Naye, pakuupoko'mukusu, alipulilile ukufuma; lomba newusiku kale bwaila.

³¹ Popele apo, ili afumine-mo, ŵaYesu ŵalilaŵile ati: Ŵukumo Umwana waMuntunsi acindikwa, naŵaLesa naŵo ŵacindicilwa muli ye;

³² kaŵili ŵaLesa ŵakamucindika ye muŵene, eŵakapulilila ukumucindika.

³³ Mwetwana twanji, ncili namweŵo imbi impindi inini; mweŵo mukamfwaya-fwaya, sombi koti nifyopele'fyo ifi nalaŵile kuŵaJuda ati, uko uku ŋkaya neŵo, tamukesiŵa mweŵo ukwisa-ko; fyopele'fyo efi ndukumuŵuleni namweŵo ŵukumo.

³⁴ Ifunde lyaŵukumo ndukumupeleni, ati mulukutemwansyanya; koti nifyopele'fyo ifi nalukumutemweni neŵo, efi mulukutemwansyanya namweŵo.

³⁵ Pakuti pali kuku aŵantu ŵonse ŵakesiŵa ati muli ŵasambile ŵanji, kani mukalukwikele nekutemwansyanya.

³⁶ Simoni Petilo alilaŵile kuli ŵo ati: MweŵaSikulu, mbamulukuya-pi? Kumfwa ŵaYesu ati: Uko uku ndukuya, tawisi ukundonda ŵukumo, sombi ukandonda pantanjile.

³⁷ Petilo naye nekuŵeŵa ati: MweŵaSikulu, mbanindo nsiisi ukumulondeni naŵukumo? Nasumina neŵo ukuuposa umweo wanji pakuti pali mweŵo!

³⁸ ŴaYesu nekwasuka ati: Kani cine ulukusumina ukuposo' mweo woŵe pakuti pali neŵo? Cine cine, ndukukuŵula weŵo ati kombolwe taakalila, ili tauŋgaŋkana litatu.