Yoane 11 - Amashiwi Aba Lesa

¹ Lomba kwali umuntu uwalukulwala, Lasalo uwakuBetania, kumusi kwaŵo Maliya naMalita umukwaŵo.

² Uyo-Maliya ewopele uwasufisye ŵaSikulu amafuta anuncile bwino, nekuŵasumala amakasa kumisisi yakwe: uyo, indume yakwe, Lasalo, yalukulwala.

³ Eli syatumine umuntu iŋkasi kuli ŵo ukulaŵila ati: MweŵaSikulu, umfweni, uyo umutemenwe alukulwala.

⁴ Sombi ŵaYesu, pakumfwe'fyo, ŵalilaŵile ati: Ukulwalo'ku takuli kwakufwa koku; sombi nipakuti paŵuleme bwaŵaLesa, ati Umwana waŵaLesa acindikwe pakuti pali ko.

⁵ Naŵo ŵaYesu ŵalukutemwa Malita nemukwaŵo naLasalo.

⁶ Lomba ŵo, pakumfwa ati uyo alukulwala, ŵaciikele lukoso insiku siŵili kopele uko uku ŵali.

⁷ Peŋka pakusila insiku isyo, ŵalilaŵile kuŵasambile ati: Katuyeni, tubwelele liŵili kucalo caludiya.

⁸ Naŵo aŵasambile ŵalilaŵile kuli ŵo ati: MweŵaLabi, niŵukumo lukoso aŵaJuda ŵalukufwayo'kumwipayeni kumabwe; lomba uko eko mulukuya liŵili?

⁹ ŴaYesu nekwasuka ati: Kansi pakasuŵa kamo tapali impindi ikumi nasiŵili? Peŋka kani umuntu alukwenda pakasuŵa ve tekulitutula, pakuti alukuŵona ukusweta ukwapacalo cino icapansi;

¹⁰ sombi kani ende umuntu uŵusiku alalitutula, pakuti tamuli ukusweta muli ye.

¹¹ Ifyo-fintu efi ŵalaŵile, eli ŵaŋgaŵaŵula ati: Lasalo, iciŵusa cesu, aliile mutulo; sombi ndukuya mukumuŵusya.

¹² Pakuti pali fyefyo aŵasambile ŵalilaŵile kuli ŵo ati: MweŵaSikulu, kani aliile mutulo, ciweme akalwaluka.

¹³ Sombi ŵa Yesu ŵalilaŵile ifyakufwa kwakwe; sombi ŵo ŵalukulaŋguluka ati ŵalukweŵa ifyakulala lukoso mutulo.

¹⁴ Pakuti pali fyefyo lomba ŵaYesu ŵalilaŵile kuli ŵo apaswetele ati: Lasalo alifwile;

¹⁵ peŋka ndukusaŋgalala pakuti pali mweŵo ati neŵo nsinali-ko, ati mukacetekele. Sombi ŵukumo katuyeni kuli ye.

¹⁶ Peŋka Tomasi, uwilicilwe ati niDidumo, alilaŵile kuŵasambile aŵaŵyakwe ati: Ŋgatuye nafweŵo, ati tukafwile pamo naŵo.

¹⁷ Lomba ŵa Yesu, ili ŵaisile, ŵalisanjile ati kale alala insiku sine mucilende.

¹⁸ Lomba umusi waBetania wali apepi nanajelusalemi umusinso koti wamasitalyo ikumi naasanu;

¹⁹ peŋka aŵaJuda aŵenji kale ŵaŵutucila kuli Malita naMaliya, mukuwasaŋgalasya pakuti pandume yaŵo.

²⁰ Peŋka'po Malita, pakumfwa ati ŵa Yesu ŵalukwisa, ŵalimucinsisye, sombi Maliya aciikele muŋanda,

²¹ Naye Malita alilaŵile kuli ŵaYesu ati: MweŵaSikulu, mweŵo ŋgeko mwali kuno, nendume yanji ŋga taifwile-po:

²² sombi naŋgawa ati niŵuŵuno-ŵukumo, ndiisi ati fyonse'fyo ici muŋgalomba kuli ŵaLesa, ŵaLesa ŵaŋgamupeleni.

²³ Kumfwa ŵaYesu ŵamweŵa ati: Indume yoŵe ikaŵuka.

²⁴ Naye Malita nekuŵaasuka ati: Ndiisi ati akaŵuka, pakuŵuka ukwapakasuŵa ako akakupela-ko.

²⁵ ŴaYesu ŵalilaŵile kuli ye ati: Neŵo eneKuŵuka, eneMweo; uyo ulukupema-mo muli neŵo, naŋgawa ati akafwe, akalukuli nemweo:

²⁶ kaŵili ŵonse uli nemweo, nekulukupema-mo muli neŵo, taakafwa-po insiku syonse lukoso. Ulukucetekele'fyo?

²⁷ Naye nekuŵaasuka ati: Inya mweŵaSikulu, ndicetekele akale ati mweŵo niŵaKlistu, Aŵana ŵaŵaLesa, aŵasimicilwe ati ŵakesa mucalo capansi.

²⁸ Peŋka pakulaŵile'fyo, alikumbulucile, nekumwita Maliya umukwaŵo, kumpelo, ati: Aŵasambisi ŵaisa, ŵalukukwita weŵo.

²⁹ Naye Maliya, pakumfwe'fyo, aliimine bwaŋgu, nekuya kuli ŵo.

³⁰ (iyo-mpindi lomba ŵaYesu taŵaŋgafika mumusi, ŵacili kopele uko uku ŵakumanine naMalita.)

³¹ Lomba aŵoŵaJuda aŵaikele muŋanda naMaliya, awalukumusaŋgalasya, pakuŵona ati aima bwaŋgu, afuma, ŵalimulondele, ukweŵa ati alukuya kucilende mukulila kopele uko.

³² Peŋka, pakufika Maliya uko uku ŵali ŵaYesu, nekuŵaŵona, aliwilile pansi muceni caŵo, nekulaŵila kuli ŵo ati: MweŵaSikulu, mweŵo ŋgeko mwali kuno, nendume yanji ŋga taifwilepo.

³³ Lomba ŵaYesu, pakumuŵona alukulila, newaJuda aŵo aŵo aisile naŵo ŵalukulila, ŵalisisimine lukoso mumutima, nekulemuke'cine;

³⁴ peŋka nekwipusya ati: Mbamwalimuŵicile kulipi? Naŵo nekuŵeŵa ati: MweŵaSikulu, twendeni, mukaŵone.

³⁵ Lomba ŵaYesu ŵalukulila.

³⁶ Pakuti pali fyefyo, aŵaJuda ŵalilaŵile ati: Ŵoneni, cine ŵalimutemenwe!

³⁷ Sombi ŵambi naŵo ati: Uyu-muntu, uwasibwile impofu amenso, kansi taesiŵile ye ukukanya ukufwa nawuyu-Lasalo?

³⁸ Peŋka ŵaYesu, ili ŵasisimina liŵili mumutima, nekufika nakucilende; icocilende cali ceceŋgo, nebwe kaŵili lyalisincilwe-ko.

³⁹ ŴaYesu ati: Siŋkuleni-ko ibwe. Lomba Malita, iŋkasi yawoyo uwafwile, alilaŵile kuli ŵo ati: MweŵaSikulu, pano afuka; pakuti insiku syapita sine.

⁴⁰ ŴaYesu ŵalilaŵile kuli ye ati: Kani neŵo nsililaŵile kuli weŵo ati—Kani ulicetekele, wakuŵono ŵuleme bwaŵaLesa?

⁴¹ Peŋka'po ŵaJisiŋkwileko nebwe. Naŵo waYesu nekulolesya amenso mwiulu, nekulaŵila ati: Tata, ndukumutoteni mweŵo, pakuti mwanumfwa neŵo;

⁴² neŵo icine ndiisiŵile ati mulanumfwa insiku syonse; sombi nalaŵilila amasiwi aya pakuti peŵumba lyaŵantu aŵeminine kuno; ati ŵo ŵacetekele'cine ati nimweŵo emwemwantumine.

⁴³ Lomba, pakulaŵile'fyo, ŵaliŵilicisye nesiwi'likulu ati: Lasalo, fumamo!

⁴⁴ Newafwile alifumine, umwakacilwe kumolu nakumaŵoko nensalu isyapamfwa; napamenso palikacilwe-po necitambala. ŴaYesu ŵalilaŵile kuli ŵo ati: Mukakululeni, alukuya!

⁴⁵ Pakuti pali fyefyo aŵo-ŵaJuda aŵaisile kuli Maliya, pakuŵona ifyo ifi ŵacitile ŵaYesu, ŵambi aŵenji ŵalicetekele kuli ŵo.

⁴⁶ Sombi ŵambi naŵo ŵaliile kuŵaFalisi nekuŵaŵula ifintu ifyo ifi ŵacitile ŵa Yesu.

⁴⁷ Pakuti pali fyefyo aŵapapatilisi aŵakulu neŵaFalisi ŵaliŵuŋgenye icilye ukulukwalika ati: Mbapo fweŵo tucite syani? pakuti uyu-muntu alukucita utwisiŵilo utwinji.

⁴⁸ Kani tumuleke lukoso fyopele'fi, aŵantu ŵonse ŵakacetekela muli ye; lomba neŵaLoma ŵakesa nekutupokolola umupunda wesu nemusyoŵo wesu wonse!

⁴⁹ Sombi umbi uwapali ŵo, isina lyakwe niKayafa, uyo uwaikele ati mupapatilisi umukulu umwako'yo, alilaŵile kuli ŵo ati: Tamwisi-po neli kantu mweŵo;

⁵⁰ neli kulaŋguluka ati ukumwelelweni ati umuntu umo akafwile aŵantu, wiŋgesa-konalwa umusyoŵo wonse.

⁵¹ Sombi taalaŵilile' fyo umwine eŋka, koku; sombi pakuti ye ali mupapatilisi umukulu umwako'yo, alisimicile ati ŵaYesu waŋgautwilo'musyoŵo uyo;

⁵² kaŵili tewoyo-musyoŵo weŋka, sombi ati ŵakaŵuŋganisisye pamo ŵonse aŵana ŵaŵaLesa awapalaŋgene.

⁵³ Peŋka, ukufuma kukasuŵa ako, walukuwaalicila ati tuŵepaye.

⁵⁴ Pakuti pali fyefyo ŵaYesu taŵae'ndele liŵili apaswetele paŵaJuda, sombi ŵalifumine-ko uko, nekuya kucalo icipalamine kumpanta, kumusi uwilicilwe ati niEfilayimi; lomba ŵaliikele kopele uko neŵasambile.

⁵⁵ Peŋka'po kwalipalamine umuciluko waŵaJuda; lomba tauŋgafika umuciluko, aŵantu aŵenji aŵafumine kumitala yonse ŵaliile kuJelusalemi mukuliswesya.

⁵⁶ Naŵo ŵalukuŵafwaya-fwaya ŵaYesu; nekwipusyansyanya apo ŵaimakene mwitempuli ati: Mbamweŵo mulukulaŋguluka syani? Kani teti ese kucitenje?

⁵⁷ Lomba aŵapapatilisi aŵakulu pamo neŵaFalisi kale ŵafundile aŵantu ati—Kani umbi esiŵe ukuli Yesu, ŋgaatuŵule, ati twisiŵe ukumwikata.