Yoane 10 - Amashiwi Aba Lesa

¹ Cine cine, ndukumuŵuleni ati: Uyo utenjilila pamulyaŋgo wacipata cambelele, sombi nekuninina pambi, uyo muŋgo, esilumfundi.

² Sombi uyo uwinjilila pamulyaŋgo, uyo eMwembesi wambelele.

³ Uyo-ye mulonda alukumwiswila-ko; nembelele nasyo silomfwa isiwi lyakwe: naye nekusiita imbelele syakwe amasina asiko, nekusitanjilila ukusifumisya pesonde.

⁴ Pakusifumya isyakwe syonse, alasitanjilila kuntanjile; nasyo imbelele nekumulonda, pakuti siliisi isiwi lyakwe.

⁵ Sombi umwensu lukoso tasiisi ukumulonda, sombi kumuŵutuka; pakuti tasiŵesi aŵensu amasiwi aŵo.

⁶ Ukupalanyo'ko ŵaYesu ŵaliŵaŵulile; sombi ŵo taŵaisiŵile'fyo ifi ŵalukuŵaŵula.

⁷ Pakuti pali fyefyo kaŵili ŵaYesu ŵalilaŵile kuli ŵo ati: Cine cine, ndukumuwuleni ati: Neŵo eneMulyaŋgo wakumbelele.

⁸ Ŵonse lukoso aŵantanjilile neŵo ŵaŋo, niŵasilumfundi: sombi imbelele tasyaŵomfwile-po.

⁹ Neŵo enesiulyaŋgo: uyo ukenjila-po pali neŵo akapuluka; naye akalukwinjila, nekulukufuma, nekulukusaŋge'cembelelo.

¹⁰ Umuno tesa lukoso, sombi nimukwiŵa, namukwipaya, namukonala, emo esa. Neŵo ndiisile ati siŵe nemweo, enemweo ufulile.

¹¹ Neŵo eneMwembesi Uweme; Umwembesi Uweme alauposo'mweo wakwe pakuti pambelele.

¹² Umuntu lukoso uwamilimo, utaali mwembesi, utaali mwine wambelele, pakuŵono'mumbulu ulukwisa, alasileke'mbelele nekuŵutuka, peŋka umumbulu nekusiikata, nekusipalaŋganya.

¹³ Ifyo, pakuti ye wamilimo lukoso, taasitemwa imbelele,

¹⁴ Neŵo eneMwembesi Uweme; ndisiisi isyanji, nasyesyo isyanji silinjisi neŵo;

¹⁵ koti nifyopele'fyo ifi ŵanjisi neŵo ŵaTata, naneŵo ifi mbesi ŵaTata; nakaŵili ndukuuposa umweo wanji pakuti pambelele.

¹⁶ Nasimbi imbelele ndi nasyo, isi tasili syamucipate'ci; isyo nasyo niŋgaloŋganisya; peŋka sikalukumfwa isiwi lyanji; lomba likekala litaŋga limo, nemwembesi umo.

¹⁷ Pakuti pali fifi ŵaTata ŵalukuntemwa neŵo: pakuti ndukuuposo' mweo wanji, ati ŋkaupoke liŵili.

¹⁸ Tapali-po umuntu uwakuupokolola kuli neŵo; sombi ninemwine ndukuuposa. Ndi nemakosa akuuleka; kaŵili ndi nemakosa akuupoka liŵili. Ifunde'lyo nalilipokele kuli ŵaTata.

¹⁹ Peŋka'po kwaliŵucile liŵili umupaka uwakupicisya pakati kaŵaJuda, pakuti pamasiwi ayo.

²⁰ Aŵo aŵenji ŵalilaŵile ati: Ali neciŵanda, alifuntile; mbanindo mulukumumfwila?

²¹ Sombi ŵambi ati: Amasiwi aya taali awoyo uli neciŵanda, koku; kani iciŵanda ciliisi ukusiŵula amenso impofu?

²² Lomba kwali necitenje icakuswesye'Tempuli ku Jelusalemi; kaŵili nimpindi yamwela;

²³ peŋka ŵaYesu ŵalukupitana mwitempuli, munsense yapamulyaŋgo wakwe Solomoni.

²⁴ Naŵo aŵaJuda ŵaliŵasiŋgulucile, nekuŵepusya? ati: Impindi yasyani ucituleŋgela ukupalakanya? Kani weŵo niweKlistu, ŋgotuwule apaswetele.

²⁵ ŴaYesu nekuŵaasuka ati: Nalimuŵulileni, sombi tamulukucetekela. Imilimo iyo indukucita mwisina lyaŵaTata, yopele'yo eilukunsimicila:

²⁶ sombi tamulukucetekela, pakuti tamuli mwitaŋga lyambelele syanji.

²⁷ Imbelele syanji silomfwe'siwi lyanji; naneŵo ndisiisi; nasyo silandonda:

²⁸ kaŵili ndukusipela umweo uwamuyayaya: tasikonalwa insiku syonse lukoso; kaŵili tapali-po neli umo ukasisompola muminwe yanji.

²⁹ ŴaTata aŵo aŵampele syo ŵalicilile pali ŵo ŵonse uŵukulu; peŋka tapali-po uwisi ukusisompola muminwe yaŵaTata.

³⁰ Neŵo naŵaTata tuli ŵamo.

³¹ Kaŵili aŵaJuda ŵalitolawile amabwe ati tuŵapame.

³² ŴaYesu nekuŵaasuka ati: Imilimo iweme iinji nalukumubwenesyeni iyafumine kuli ŵaTata; pali yeyo wisamulimo mulukumposela-po amabwe?

³³ AŵaJuda ŵaliŵaasucile ati: Tatulukukuposa'mabwe pakuti pamulimo uweme, sombi nipakuti pamucobwe, napakuti weŵo, wemuntu lukoso, ulukulieŵa ati nineŵaLesa, epo tulukukuposa'mabwe.

³⁴ ŴaYesu nekuŵaasuka ati: Kansi tamulilembelwe mumafunde enu ati: Nalilaŵile ati mweŵo nimwewalesa?

³⁵ Peŋka kani ŵaliŵelicile ati niŵalesa aŵo aŵaisile-ko amasiwi aŵaLesa, (nemalembo tesi ukonaika),

³⁶ mulukumulaŵisya uyo uyu ŵasalulwile ŵaWisi nekutuma mucalo capansi, ati—Ulukucoŵola! pakuti neŵo nalaŵila ati—Neŵo eneMwana waŵaLesa?

³⁷ Kani nsilukucite'milimo yaŴatata, tekuncetekela;

³⁸ sombi kani ndukwicita, naŋgawa ati tamulukuncetekela neŵo, cetekeleni-ko imilimo; ati mukesiŵe, mucetekele ati ŵaTata ŵali muli neŵo, naneŵo ndi muli ŵaTata.

³⁹ Nakaŵili ŵaliesesye ukuŵekata; sombi ŵo ŵalisopokele kuminwe yaŵo.

⁴⁰ Naŵo ŵaliile liŵili bwisilya lyaJodeni, uko uku ataticile Yoane ukuŵaŵatisya aŵantu; naŵo nekulukwikele uko.

⁴¹ Lomba aŵantu aŵenji ŵaliisile kuli ŵo, nekulaŵila ati: Icine Yoane taacitile-po utwisiŵilo neli kamo; sombi ifyo fyonse ifi alukusimika Yoane ifyakuli wuyu fyacine.

⁴² Peŋka aŵenji ŵalicetekele kuli ŵo kopele uko.