Tito 1 - Amashiwi Aba Lesa

¹ NinePaulu, nemupyunjisi waŵaLesa, nentanjisi yaŵaYesu Klistu, koti kucetekela kwaŵasalulwilwe ŵaŵaLesa, nakoti kwisiŵa kwaŵucine uŵuli koti kupala-ŵaLesa,

² nendukucetekela ukupoka umweo wamuyayaya, uyu ŵalaile ŵaLesa, aŵataŵaŵepa, ili tasiŋgatatika impindi syamuyayaya;

³ sombi pampindi syaŵo aŵene ŵalibwenesye isiwi lyaŵo muceŵo ico ici nacetekelwe ukutulisya koti kufunda kwaŵaLesa aŵakutupulusya.

⁴ Ndukukulembela, Tito, wemwana wanji uwacine koti kucetekela kwesu fwense: uluse neŵutende, ubwakufuma kuli ŵaLesa ŵaWisifwe nakuli ŵaKlistu Yesu aŵakutupulusya, bwikale naweŵo.

⁵ Pakuti paceŵo ico nalikusile muCilete, ati ukafiansike bwino ifintu ifyasyele-po, nekwikalika aŵakulu mumisi yonse, koti nifyopele'fyo ifi nakuŵulile;

⁶ kani umuntu wakuŵule'milandu, mulume wamwanakasi umo, uli neŵana aŵalukucetekela awataŵasininwe pakuti paŵucencemesi neli nipakuti paŵuŋgwa.

⁷ Pakuti ukwelelwa icilolo cekelesya ukulukwikele cakuŵule'milandu, pakuti co muntu wakutaŵa-taŵa kuli ŵaLesa; umuntu uwakuŵule'citala, utaafitwa bwaŋgu, utaatosya pakupendwa, uwakuŵulo'ŵuŋgwa, utaakumbwe'ndalama isiŵipile;

⁸ sombi uwakupokelela bwino aŵensu, uwakutemwe'fiweme, uwamilaŋgwe yamano, uluŋgeme, uswetelele, ulikanya ifyafintu fyonse;

⁹ ulukwikatilila isiwi ilyakucetekelwa ilili koti ŵusambisi, ati akalukuli nemakosa akucenjesya muŵusambisi uŵukosele nekuŵasinina aŵakuleŋgulula.

¹⁰ Pakuti epo ŵali aŵoŋgwa aŵenji, aŵamaŋkuluŵinda, aŵakutumpaika, tanje cine aŵakopwelwe,

¹¹ ukwelelwa ukuŵasiŋka mutunwa. Ŵali ŵantu aŵawisya amaŋanda aŵuluŵulu, nekulukusambisya ifintu ifitafyelelwe, pakuti pandalama isiŵipile.

¹² Umbi uwapeŵumba lyaŵo, uwakusimika waŵo aŵene, walilaŵile ati: AŵaCilete ŵalaŵepa insiku syonse, filwani ifiŵipile, niŵapumpunta aŵafila.

¹³ Ukusimiko'ko kwacine. Pakuti paceŵo ico ukaŵapatile makosa, ati ŵakakose mukucetekela,

¹⁴ aŵakuŵulo'kukutika ifisimicisyo fyaŵaJuda, nemafunde aŵantu aŵafutata kuli ŵucine.

¹⁵ Kuŵaswetele ifintu fyonse filiswetele: sombi kuŵaŵipile nakuli ŵaŵo aŵataŵacetekela takuli-po iciswetele, sombi amano aŵo naŵacimaŋga ŵaŵo, fyoŵilo fyaŵipa'kale.

¹⁶ Walalaŵila ati tuliŵesiŵile ŵaLesa; sombi kumilimo yaŵo ŵalaŵakana, pakuti ŵakunekasya mumitima, ŵakupulaisya, ŵafinaŋgwa kumilimo yonse iweme.