Luku 24 - Amashiwi Aba Lesa

¹ Sombi pakasuŵa kakutatika umuluŋgu, kucinyamaca, ŵaliisile kucilende, ukuleta ifinuncile bwino ifyo ifi ŵacitile.

² Peŋka ŵalisanjile ati icibwe caalamuka-ko kucilende;

³ naŵo ŵaliinjile-mo, sombi taŵaubwene-po umuŵili waŵaSikulu Yesu.

⁴ Lomba ili ŵalukukaŋkamana ifyafyefyo, paliŵele ati aŵantu ŵaŵili awafwite ifisasamucile ŵaliiminine pali ŵo.

⁵ Peŋka pakususwa nekwinamisya pansi, ŵalilaŵile kuli ŵo ati: Mbanindo mulukuwafwaila aŵalaŵi pakati paŵafwile?

⁶ Taŵa-po pano, ŵaŵusiwa! Kamulaŋguluke'fyo ifi ŵalaŵile kuli mweŵo ili ŵacili muGalili,

⁷ ati, Ukumwelelwa Umwana waMuntunsi ukuloŵelwa kuminwe yaŵantu aŵakuŵifya, nekutalikwa, nekuŵuka liŵili pansiku yaŵusitatu.

⁸ Naŵo walilaŋgulucile amasiwi aŵo;

⁹ nekubwela kucilende, nekuŵaŵule'fyo fyonse aŵo ikumi naumo, naŵambi ŵonse.

¹⁰ Aŵo-ŵanakasi, umbi niMaliya uwakuMagadala, umbi nijoana, umbi niMaliya ŵanyina Jakobo, pamo neŵanakasi ŵambi, eŵasiŵulile intanjisi ifyo-fintu.

¹¹ Nemasiwi ayo aliumfwanicile pamenso aŵo ati alukoso; naŵo taŵaacetekele.

¹² Sombi Petilo aliimine, nekuŵutucila kucilende; peŋka ili ainamisye nekuliŋgamisya-mo mukati, alibwene iŋguwo sili syeŋka: lomba alikumbulucile ukulukuya kwaŵo, nekulukukaŋkamana pakuti pali fyefyo ifyacitilwe.

¹³ Lomba akasuŵa ako kopele ŵambi ŵawili aŵapali ŵo ŵalukuya kumusi umbi uilicilwe ati niEmau, umusinso pakufuma kuJelusalemi ukwesya amasitalyo amakumi asanu nalimo.

¹⁴ Peŋka ŵalukwambala ifyafyefyo fyonse ifyacitilwe.

¹⁵ Lomba, ili ŵalukwambala, nekwipusyansyanya, paliŵele ati ŵaYesu aŵene ŵalipalamine nekwenda naŵo.

¹⁶ Sombi pamenso aŵo palikenwe ati ŵeŋgesa-kuŵesiŵa.

¹⁷ Naŵo ŵalilaŵile kuli ŵo ati: Mbafisa-fyeŵo ifi mulukwambala, pakulukwenda? Naŵo ŵaliimakene, nekulukuŵombomene.

¹⁸ Peŋka umbi uwailicilwe ati niKleopa, aliŵaasucile ati: Kani mweŵo mweŋka mulukulinsya lukoso mujelusalemi, mweŵakuŵulo' kwisiŵa ifyafyefyo ifyacitilwe mulya sino-nsiku?

¹⁹ Naŵo nekuŵeŵa ati: Mbafisa-fintu? Naŵo kaŵalaŵila kuli ŵo ati: Ifintu ifyo ifyakuli ŵaYesu aŵakuNasaleti, aŵali ŵakusimika ŵamakosa mumilimo namumasiwi pamenso aŵaLesa napamenso aŵantu ŵonse;

²⁰ nefyafyefyo ifi ŵaŵaloŵele aŵapapatilisi aŵakulu nempemba syesu, mukuŵasinina kumfwa, peŋka nekuŵatalika.

²¹ Sombi fweŵo twalukucetekela ati ŵo eŵaŵo aŵakaŵaluŵula aŵaIsilaeli. Icine nakaŵili, lelo kasuŵa kaŵusitatu aka fyawele ifyo-fintu.

²² Nakaŵili ŵambi aŵanakasi aŵamwiŵumba lyesu, watukaŋkamtka, aŵacelele ukuya kucilende;

²³ peŋka, pakuwulo'kusaŋga umuŵili waŵo, ŵali ŵaisa nekulaŵila ati: Twaŵona nekuŵoneka kŵaŋkalamba isyalaŵila ati: Ŵalukulaŵa!

²⁴ Eli ŵaile kucilende ŵambi naŵo, aŵali nafweŵo, nekufiŵone'fyo fyopele ifi ŵalaŵila aŵanakasi; sombi ŵo taŵaŵabwene-po.

²⁵ Naŵo ŵalilaŵile kuli ŵo ati: Mweŵatumpile, mwemulukukokola mumitima yenu ukucetekela muli fyefyo fyonse ifi ŵalaŵile aŵakusimika!

²⁶ Kansi tafyaliŵelelwe ŵaKlistu ukusomenwa kufintu ifyo nekwinjila muŵuleme bwaŵo?

²⁷ Lomba ukutatika kuli Mose nakuŵakusimika ŵonse, ŵaliŵaŵulisisye mumalembo onse ifyo-fintu ifyakuli ŵo aŵene.

²⁸ Eli ŵapalamine nakumusi, uko ŵalukuya, naŵo ŵaYesu ŵalibwenekele koti ŵalukuya kuntanjile.

²⁹ Naŵo ŵaliŵakakatisye, nekulaŵila ati: Mwikale nafweŵo; pakuti iciŋgulo capalamina nekasuŵa nako kalukuwa. Naŵo ŵaliinjile mukwikala naŵo.

³⁰ Lomba ili ŵasamine naŵo ukulukulya, ŵaliŵulile siŋkwa, nekucindika, nekumukumala nekuŵapela.

³¹ Peŋka nemenso aŵo nekusiŵuka, naŵo ŵaliŵesiŵile; sombi ŵalisimine pamenso aŵo.

³² Lomba naŵo nekulaŵilana ati: Kansi imitima yesu tayalukupya muli fweŵo, ili ŵalukwambala nafweŵo munsila, nekulukutuŵulisisya amalembo.

³³ Naŵo ŵaliimine iyompindi yopele, nekubwelela kujelusalemi, nekuŵaŵona aŵo ikumi naumo ŵaliwuŋgene, pamo naŵaŵo aŵo ŵali naŵo,

³⁴ aŵalukulaŵila ati: ŴaSikulu ŵaŵuka icinenene, nekulibwenesya kuli Simoni.

³⁵ Eli ŵaŵaŵulile ifyafintu ifyo ifyamunsila, nefyafyefyo ifi ŵaisiŵilwe kuli ŵo pakukumala siŋkwa.

³⁶ Ili ŵacilaŵile'fyo, ŵaYesu aŵene ŵaliimakene pakati pali ŵo, nekulaŵila kuli ŵo ati: Uŵutende bwikale nenu!

³⁷ Sombi naŵo ŵalisusilwe nekutina, nekulukweŵa ati tulukuŵono'mupasi.

³⁸ Naŵo ŵalilaŵile kuli ŵo ati: Mbanindo mulukulikutwila? Pakuti pando kwaŵucila ukwipusya mumitima yenu?

³⁹ Ŵoneni amapi anji, nemakasa anji, ati nineŵo nemwine: ŋgamunsalale muŵone; pakuti umupasi taukwete umunefu nemafupa, koti nififi ifi mulukuŵona ati ndi nafyo.

⁴⁰ Ili ŵalaŵile'fyo, ŵaliŵalanjisye amapi aŵo nemakasa.

⁴¹ Lomba ili ŵacikanika pakuti pakutemwa, nekulukukaŋkamana, ŵalilaŵile kuli ŵo ati: Muli-po nekakulya muno?

⁴² Peŋka ŵaliŵapele icisinsa cesaŵi icakoca.

⁴³ Naŵo ŵaliciŵulile nekulukulya pamenso aŵo.

⁴⁴ Eli ŵalaŵile kuli ŵo ati: Aya masiwi anji, analaŵile kuli mweŵo, ili ncili nenu, ati ukwelelwa ati ifintu fyonse fikonsiwe, ifilembelwe mumafunde akwe Mose namuŵakusimika namuMasamo, ifyakuli neŵo.

⁴⁵ Peŋka ŵaliiswile-mo mumitima yaŵo ati ŵesiŵe bwino amalembo;

⁴⁶ naŵo ŵalilaŵile kuli ŵo ati: Palilembelwe ifyakuŵe'fi ati ukuŵelelwa ŵaKlistu ati ŵasomenwe, ŵaŵuke-po pakati kaŵafwile pansiku yaŵusitatu;

⁴⁷ nakaŵili ati, ifyakulapila nefyakufitulucilwa kwaŵumbifi fikaŵulisisiwe mwisina lyaŵo kuŵantu aŵamisyoŵo yonse, ukutatika kuJelusalemi.

⁴⁸ Mweŵo muli nimboni syafintu ifi.

⁴⁹ Peŋka ŵoneni, ŋkatuma ukulaya kwaŵaTata pali mweŵo; sombi mwakulukupembelela mumusi ili tamuŋgafwikwa nemakosa akufuma kwiulu.

⁵⁰ Lomba ŵaliŵatanjilile ukufika uko ukusiŋkamene naBetania: naŵo ŵalisuntwile nemaŵoko, nekulukuŵasyucisya.

⁵¹ Lomba, pakulukuŵasyucisya, ŵalilekene naŵo, nekupintwa kwiulu.

⁵² Naŵo ŵaliŵalambile, nekubwelela kuJelusalemi nekutemwa ukukulu;

⁵³ nekulukwikele mwitempuli, ili ŵaŵalemya ŵaLesa.