Luku 1 - Amashiwi Aba Lesa

¹ Pakuti aŵenji ŵalitaticile ukulukulemba ifyakuŵulisisya ifyafyeŵo ifyo ifyacitilwe pakati pali fweŵo,

² koti nifyopele'fyo ifi ŵatuŵulile aŵo aŵali nimboni neŵutumisi bwesiwi ukufuma pampindi yakutaŋga;

³ naneŵo, ili naisiŵisye bwino ifyeŵo fyonse umu fyalukwendela ukufuma pakutatika, nalukulaŋguluka ati ukuŋgelelwa neŵo ukumulembeleni mweŵo umu fyakoŋkanine, mweŵaTeofilo, mweŵacindeme;

⁴ ati mwisiŵe ifyacine ifyafintu ifyo ifi mwalukusambisiwa.

⁵ Pampindi yakwe Elode, imfumu yamuJudiya, ekwali umupapatilisi umbi, isina lyakwe niSakaliya uwapacikoto cakwe Abija: uyo ali nemukasi uwapeŵumba lyaŵana ŵakwe Aloni, isina lyakwe niElisabeti.

⁶ A ŵo ŵoŵilo ŵali ŵaluŋgeme pamenso aŵaLesa, ŵalukwenda mumafunde onse namukwisiŵila kwaŵaSikulu.

⁷ Sombi taŵali-po nemwana neli umo, pakuti Elisabeti niŋumba; kaŵili ŵoŵilo ŵalicekwile.

⁸ Lomba Sakaliya, ili alukucite'milimo yaŵupapatilisi pamenso aŵaLesa, koti nimpindi yacikoto cakwe,

⁹ lomba calimuwilile icipa ati enjile mwitempuli lyaŵaSikulu nekulukoca libona, ukukoŋkana mukukombola koti kwisiŵila kwamilimo yaŵupapatilisi.

¹⁰ Lomba iŵumba lyaŵantu ŵonse lyali posonde, nekulukutembela pampindi yalibona.

¹¹ Peŋka yalibwenekele kuli ye iŋkalamba yaŵaSikulu, iliimakene kulwine lwaconto calibona.

¹² Peŋka Sakaliya, pakwiŵona, alitinine nekuŵa nemwenso.

¹³ Sombi iŋkalambe'yo yalilaŵile kuli ye ati: Witina Sakaliya; pakuti ukulomba koŵe kuliumfwanicile, nemukasi woŵe Elisabeti akakufyalila umwana umwalalume, ukamwilike'sina lyakwe ati niYoane.

¹⁴ Nawe ukaŵa nekutemwa nekulukusemba, neŵantu aŵenji naŵo ŵakasaŋgalala paku fyalwa ye;

¹⁵ pakuti akalukuli mukulu pamenso aŵaSikulu; taakalukunwa-po imfaina neli fyakunwa ifiŵilile fyonse; kaŵili akesula Umupasi Uswetelele ukufuma kumpindi acili munda mwaŵanyina.

¹⁶ Kaŵili aŵaIsilaeli aŵenji akaŵaalulwila kuli ŵaSikulu Lesa waŵo.

¹⁷ Kaŵili akaŵatanjilila pamenso aŵo mumupasi nemakosa akwe Elaija mukwalulwila imitima yaŵawisiŵo kuŵana ŵaŵo, neŵakupulaisya naŵo ati ŵakende mumano aŵaluŋgeme; mukuŵaansicila ŵaSikulu aŵantu aŵakuŵapembelela.

¹⁸ Naye Sakaliya alilaŵile kuŋkalamba ati: Syani ŋkafiisiŵe'fyo? Pakuti ndi mucekulu, nemukasi wanji naye alicekwile!

¹⁹ Nayo iŋkalamba yalimwasucile ati: Neŵo ndi Gabiliyeli, uwimakana muceni caŵaLesa; nalituminwe mukulaŵila kuli weŵo, nekukuletela ifyeŵo ifi ifiweme.

²⁰ Umfwa! wakusiŋke' siwi, ukwakuŵulo'kulukulaŵila ukuficila kukasuŵa ako akakacitwa ifintu ifi, pakuti tocetekele amasiwi anji, opele akapelelwa pamo pampindi ielelwe o.

²¹ Sombi aŵantu ŵalukumupembelela Sakaliya, nekulukukaŋkamana ili akokwele mwitempuli.

²² Popele, pakufuma ye, taesiŵile ukulaŵila kuli ŵo, eli ŵaisiŵile ati aŵona icakuŵoneka mwitempuli; naye alukuwalaŋga kuminwe nekulukwikele icisinsi.

²³ Peŋka, ili syakumene insiku syamilimo yakwe, alikumbulucile ukulukuya kwaŵo.

²⁴ Lomba, ili syapitile insiku isyo, Elisabeti umukasi wakwe aliambwile, nekulifisa imyensi isanu, ili alaŵila ati:

²⁵ Ifi ŵaSikulu ŵalincitile pansiku isyo isi ŵalukundolesya mukufumya ukupufiwa kwanji kuŵantu.

²⁶ Lomba, pamwensi uwakuleŋga isanu naumo, Gabiliyeli Iŋkalamba yalituminwe kuli ŵaLesa mukuya kumusi umbi uwakuGalili, isi na lyauo niNasaleti,

²⁷ kumwanakasi umbi umusice uswetele uwambisiwe ku muntu umbi isina lyakwe niJosefi, uwamucikoto cakwe Dafidi; isina lyamwanakasi uyo niMaliya.

²⁸ Nayo yaliinjile umwali ye, nekulaŵila ati: Mutende weucindeme, ŵaSikulu ŵaŵe noŵe!

²⁹ Sombi naye alitutumine pakumfwe'fyo, nekulukwalakanya ati—Mbo'kusekela uku kwasyani?

³⁰ Kumfweŋkalamba yamweŵa ati: Witina Maliya, pakuti waŵa nesyuko pamenso aŵaLesa.

³¹ Umfwa! Ukaambule'pafu nekufyalo'mwana umwalalume, popele ukamwilike isina lyakwe niYesu.

³² Akaŵa mukulu nekwilikwa ati Mwana waŴacilile; kaŵili ŵaSikulu Lesa ŵakamupela iteŵe lyakwe Dafidi ŵawisi;

³³ peŋka akalukuŵekalika aŵamucikoto cakwe Yakobi insiku syamuyayaya; nakaŵili taŵukasila-po uŵufumu bwakwe.

³⁴ Peŋka Maliya alilaŵile kuŋkalamba ati: Mbefyo fikaŵa syani, pakuti nsiŋgesibwa kumwalalume?

³⁵ Nayo iŋkalamba yalimwasucile ati: Umupasi Uswetelele ukesa pali weŵo, nemakosa a Ŵaŵo A ŵacilile akakusesemucila; kaŵili, pakuti pali fyefyo, uyo ukafyalwa akelikwa ati Uswetelele, Mwana waŵaLesa.

³⁶ Nakaŵili umfwa, Elisabeti umukwanu naye aambula ipafu lyamwana umwalalume muŵucekulu; kaŵili uno mwensi wakuleŋga isanu naumo kuli ye uwailicilwe ati ninumba.

³⁷ Pakuti tapali-po icintu icakuwakaŋga ŵaLesa.

³⁸ Naye Maliya ati: Ŵoneni nemusya waŵaSikulu! Ŋgafikaŵe kuli neŵo koti masiwi enu. Peŋka iŋkalamba yalifumine kuli ye.

³⁹ Peŋka pansiku isyo Maliya aliimine nekuyo'luŵilo kucalo camapili kumusi umbi uwakuJuda,

⁴⁰ Lomba nekwinjila namuŋanda yakwe Sakaliya, nekumusekela Elisabeti.

⁴¹ Lomba, ili aumfwile Elisabeti ukusekela kwakwe Maliya, nekana kalicilucile munda mwakwe; peŋka Elisabeti aliiswile Umupasi Uswetelele,

⁴² nekuŵilicisya nesiwi'likulu, nekulaŵila ati: Ulicindeme weŵo pakati paŵanakasi, newamunda moŵe naye alicindeme!

⁴³ Kaŵili mbanindo ifi fyacitwa kuli neŵo ati ŵanyina ŵaSikulu ŵanji ŵaisa kuli neŵo?

⁴⁴ Pakuti, umfwa, paku fika mumatwi anji isiwi lyakunsekela koŵe, lomba nemwana nekuciluka munda mwanji pakuti pakusemba!

⁴⁵ Lomba alicindeme uyo uwacetekele, pakuti fikapelelwa pamo nefintu ifyo ifi ŵalaŵile ŵaSikulu kuli ye.

⁴⁶ Kumfwa Maliya ati: Umutima wanji ulukuŵalemya ŵaSikulu;

⁴⁷ Umupasi wanji wasaŋgalala muli ŵaLesa aŵakupulusya ŵanji;

⁴⁸ Pakuti ŵalitontomekele pakupeŋga kwamusya waŵo; Pakuti, ŵoneni, ukufuma kumpindi yaŵukumo, Ifitentekwa fyonse fikalukuŋgewa neŵo ati ucindeme,

⁴⁹ Pakuti Aŵo aŵamakosa ŵancitila neŵo ifintu ifikulu—Isina lyaŵo liliswetelele!

⁵⁰ Iŋkumbu syaŵo sili nakuŵantu aŵakufyaluluka nakufyaluluka, Ekuli ŵaŵo aŵalukuŵatonda.

⁵¹ Ŵalicitile ifyamakosa nekuŵoko kwaŵo; Ŵaliŵapalaŋgenye aŵakulitota mufyakulaŋguluka ifyamumitima yaŵo.

⁵² Ŵalisitentwile-po nemfumu pamipando yasisyo, Nekuŵapyanika-po awapeŋgele.

⁵³ Aŵansala ŵaliŵekutisye nefintu ifiweme; Sombi aŵaŵile naŵo ŵaliŵatumine aŵakuŵula neli kantu;

⁵⁴ Ŵalimofwele-ko Isilaeli umuntu wakwe, Ukulukulaŋguluke'ŋkumbu—

⁵⁵ Koti nifyopele'fyo ifi ŵalaŵile kuli ŵawisifwe— Isyakuli Ablaamu neŵana ŵakwe insiku syonse lukoso.

⁵⁶ Lomba Maliya aliikele nakwe Elisabeti koti myensi itatu; peŋka nekubwelela kwaŵo.

⁵⁷ Lomba impindi yakufyala Elisabeti yalikumene; naye alifyele umwana umwalalume.

⁵⁸ Peŋka aŵaŵyakwe neŵakwaŵo ŵaliumfwile ati ŵaSikulu ŵasikusya iŋkumbu syaŵo kuli ye; naŵo nekulukusaŋgalala pamo nakwe.

⁵⁹ Lomba, pakasuŵa kakuleŋga insiku sisanu nasitatu, paliŵele ati ŵaliisile aŵantu mukumukopola umwano'yo; lomba ŵati ŵakamwilike'sina lyakwe niSakaliya, koti lisina lyaŵawisi.

⁶⁰ Sombi ŵanyina ŵaliŵaasucile ati: Ilyo telyo; sombi akelikwa ati niYoane.

⁶¹ Naŵo kaŵamweŵa ati: Tapali-po aŵakwaŵenu neli umo uwilicilwe isine'li.

⁶² Peŋka ŵalicebwile ŵawisi ati lise'sina ulukufwayo'kumwilika?

⁶³ Naŵo ŵalilombele icakulembela-po, nekulemba ati, Isina lyakwe niYoane. Eli ŵakaŋkamene ŵonse.

⁶⁴ Impindi iyo yopele nekanwa kaŵo nekwisuka, nelumini lwaŵo nekukakuluka, naŵo nekulukulaŵila, nekulukuŵacindika ŵaLesa.

⁶⁵ Peŋka'po ŵonse aŵaikele ukuŵasiŋguluka ŵaliŵele nemwenso; nefyeŵo ifyo fyonse nekutulika monse mucalo camapili icamucalo caludiya.

⁶⁶ Naŵo ŵonse aŵaumfwile'fyo ŵalifilamine mumitima yaŵo, nekweŵa'ti: Mbasyani kansi akaŵa umwano'yu? Pakuti ukuŵoko kwaŵaSikulu kwali nakwe.

⁶⁷ Lomba naŵawisi ŵaSakaliya, ŵaliiswile Umupasi Uswetelele, nekulukusimika ati:

⁶⁸ Ŵalicindeme ŵaSikulu, Lesa waŵaIsilaeli, Pakuti ŵaliisile nekuŵaluŵula aŵantu ŵaŵo,

⁶⁹ Nekuŵusya neseŋgo lyakutupulu sya Mucikoto cakwe Dafidi umuntu waŵo—

⁷⁰ Koti nifyopele'fyo ifi ŵalaŵile mutunwa twaŵakusimika ŵaŵo aŵaswetelele aŵalukwikala ukufuma kumpindi yakuleŋgwa kwacalo capansi—

⁷¹ Mukutupulusya kutupondo twesu, Nakuminwe yaŵantu ŵonse aŵakutufitilwa.

⁷² Mukulukuwalanjisya iŋkumbu ŵawisifwe, Nekulaŋguluka ukulayana kwaŵo ukuswetelele,

⁷³ Uko-kulayana uku ŵalayene nakwe Ablaamu, wisifwe,

⁷⁴ Ati ŵakatusumine fweŵo, pakupuluka kuminwe yatupondo twesu, Twakulukuŵapyunjila apakuŵulo' kutina,

⁷⁵ Mukuswetelela namukuluŋgama mumitima pamenso aŵo insiku syesu syonse.

⁷⁶ Icine naweŵo, wemwana, ukelikwa ati wakusimika waŴaŵo Aŵacilile: Pakuti ukalukutanjila pamenso aŵaSikulu mukuŵaansicila insila syaŵo.

⁷⁷ Mukuŵapela aŵantu ŵaŵo ukwisiŵisya ukupuluka Mukulekelela ifyakuŵifya fyaŵo,

⁷⁸ Pakuti pamutima waŋkumbu waŵaLesa ŵesu, Pakuti pali wo ukuca kwakwiulu kukesa kuli fweŵo.

⁷⁹ Mukuŵatuŵila aŵo aŵalukwikala mumfinsi namucinto camfwa; Mukutusolwela amakasa munsila yaŵutende.

⁸⁰ Lomba umwana alukukula, nekuŵa nemakosa mumupasi, nekulukwikele mumpaŋga lukoso, ukufika kukasuŵa akakuŵoneka ye kuŵaIsilaeli.